بنتي عنيدة.. أعاقبها ازاي؟😔 بنتي حركية اوي.. أعاقبها ازاي؟😔 بنتي بتجادلني.. اعاقبها ازاي؟😔 ابني متأخر في الكلام وعصبي.. أعاقبه ازاي؟
ده جزء صغير من الأسئلة الخاصة بالعقاب اللي بتجيلي سواء على التعليقات أو الرسائل..
مينفعش تبقى أول حاجة تيجي على دماغنا هي العقاب، وأحيانا على حاجات مينفعش العقاب فيها أصلا..
هتقولولي يعني ازاي منعقبش على العند والجدال وغيره؟؟
..
..هقولكم انه دايما في وجهة نظر مختلفة لكل حاجة..
بنتي وهي صغيرة كانت عنيدة جدا إلى أقصى حد، وفعلا كانت بتنرفزني.. لكن لقيت ان الانتقاد مكانش حل أبدا.. وعِندها ده مكانش هدفه انها تضايقني، ولكن هي كطفلة عايزة تعمل حاجة معينة، ممكن متكونش مناسبة أحيانا، ولكن ده هدفها.. مش في دماغها انها تعند معايا أبدا.. هي هدفها تاخد اللي هي عايزاه.. وهي مركزة على ده..
لما بطلت آخد الموضوع بشكل شخصي وانها موجهه العند ضدي، بدأت أشوفها بشكل مختلف خالص.. وبدأت أتعامل مع الموقف نفسه، مش معاها هي.. يعني هي عايزة تشتري حاجة انا مش مواقفة عليها، بركز على اني مش موافقة على الحاجة دي علشان كذا وكذا.. وحتى لو مقتنعتش وفضلت تلح، كنت بثبت على موقفي بهدوء.. ولما مقدرش أبقى هادية، كنت بنسحب من الحوار مؤقتا..
مشكلتنا اننا بناخد الأمور بطريقة شخصية وعلشان كده ردود أفعالنا أحيانا بتبقى عنيفة..
طيب نشوف السلوكيات دي على حقيقتها فعلا ازاي؟؟
بنتك العنيدة.. العند هو في حقيقته قوة شخصية.. والشخصية القوية منكسرهاش، بالعكس، نديها اختيارات ونخليها تشارك معانا في بعض القرارات..أومال هيتعلموا ازاي؟بنتك اللي بتجادل، العلماء أثبتوا ان اللي بيجادلوا ويحاوروا بيبقوا ناس ناجحين في حياتهم وعندهم القدرة على حل المشكلات لأنهم بيشوفوا المشكلة من كل الزوايا وبيحاولوا ياخدوا أكبر مكاسب ممكنة.. وهكذا..بنتك الحركية طبيعتها كده.. ليه أعاقب حد على طبيعته.. أحميها بإني أهيألها البيت بحيث يكون آمن ليها، تتحرك فيه من غير ما تتعور أو تتأذي..انتي عايزة تشوفي الموضوع مشكلة، هتشوفيها مشكلة وهتنغص عليكي حياتك.. لكن لو هتبصيلها من وجهة نظر تانية وتشوفيها على حقيقتها، هتبقي قادرة تتعاملي مع المواقف اللي بتقابلك بهدوء علشان بنتك متفقدش ثقتها في نفسها
..
..قوليلي ممكن تشوفي السلوكيات اللي بتقابلك ازاي؟؟
اترك تعليقاً