اسمحي لنفسك تبقي بني آدم، مش بس أم
كنت مع واحدة صاحبتي امبارح وبنتكلم عن ذكرياتنا مع ولادنا، فقعدنا نقول إحنا بيعدي علينا كتير أوي
..
..سبحان الله، مرض الولاد وتعبهم، العمليات اللي عملوها، التدوير على المدارس والدروس.. طبيعة كل شخصية ومشاكلها.. مرحلة المراهقة وازاي بيتقلبوا ١٨٠ درجة
..
..ده غير البيت والشغل والناس اللي حوالينا.. مسؤوليات لا تنتهي.. حقيقي نعمة كبيرة جدا ولازم نشكر ربنا عليها ليل ونهار..
الأمومة والتربية مش موقف بيعدي علينا ويخلص، دي عملية مستمرة سنين طويلة
..
..وعلشان هي عملية طويلة، أكيد بتعدي علينا أوقات حلوة.. وأكيد بردو بتعدي علينا مواقف بنتمنى إنها مكانتش تحصل..
وعلشان كده، انتي محتاجة في وسط الدوشة دي إنك تسمحي لنفسك تبقي بني آدم عادي من غير ما تحسي بالذنب، علشان تقدري تستحملي الصعوبات والتحديات اللي بتمري بيها..اسمحي لنفسك:
١. إنك أحيانا تزعقي وعادي سامحي نفسك، بس خلي الزعيق في ٢٠ % من الوقت بالكتير..
٢. إنك تستريحي وتقفلي عليكي الاوضة ولو نص ساعة في اليوم، واللي يزعل يزعل.
٣. إنك تسمحي لنفسك تحسي بالضعف والعجز أحيانا لغاية ما تستعيدي قوتك وتقدري تحلي مشاكلك..
٤. إنك تتقبلي إن ليكي أخطائك ومتحاوليش تبقي مثالية أبدا.. ولا حتى تتوقعي المثالية من بناتك وولادك.. احنا بشر.. ولكن مهم بردو إننا نعتذر عن أخطاءنا من غير ما نقعد نبرر..
٥. إنك تحسي بالغيرة أحيانا من أم عارفة تتصرف، وتحولي الغيرة دي لطاقة تحسّن مستمر مع ولادك..
٦. إنك متقبليش بالفتافيت ولا البقايا.. وتحطي لنفسك أكل بتحبيه، أو تجيبي لنفسك لبس حلو أو تعملي لنفسك حاجة حلوة، زيك زي جوزك وولادك..
٧. إنك متلتزميش بالمواعيد أحيانا وممكن تفوتي شوية تمارين للولاد وتقللي الجري هنا وهنا طول الوقت..
احنا بشر ومينفعش نفكر في نفسنا كمواطنين درجة تانية علشان هنخلي اللي حوالينا يعاملونا على هذا الأساس..********
وعلشان تفهمي بنتك وتقللي العصبية في مراحل التربية المختلفة، اطلبي كتاب “افهميني يا ماما”، من خلال إرسال رسالة على الصفحة..
اترك تعليقاً