زهقتي من المذاكرة لبنتك؟؟

زهقتي من المذاكرة لبنتك؟؟

احنا لسه في أول السنة وحاسين اننا نخوض معارك لا أحد يعلم عنها شيئا.. أومال إيه؟؟😒..
أنا كنت بذاكر لبناتي وهما صغيرين، وكنت براجعلهم علشان أضمن إنهم يجيبوا أعلى درجة، وأنا كنت بتوتر وكنت بوترهم وفعلا قبل ما تبتدي الامتحانات كانت بتبقى فترة عصيبة علينا كلنا بما فيهم أنا😩..
طبعا فيه معركة الواجب.. ومعركة مذاكرة الامتحان.. ده غير معركة الأكل.. ومعركة التمارين.. ومعركة رتبي أوضتك.. ومعركة إيه اللبس اللي انتي لابساه ده.. معارك لا نهائية..
وعلشان احنا بنتعب بجد، بيبقى أسهل لنا نريح نفسنا من جنب.. قوم إيه؟؟.. نحل الواجب احنا أو نساعد فيه.. ونقعد نذاكر للعيال علشان “نضمن” تحقيقهم لدرجات عالية علشان نستريح على الأقل من معركة صعبة..
وممكن تلاقي أم بتذاكر لبنتها وهي في ثانوية عامة.. أيعقل هذا يا جماعة؟؟.. هيتفطموا امتى العيال دي؟؟..
هل ده هو الحل؟؟..🤨
الأبحاث أثبتت إنك لما تساعدي كتير في المذاكرة والواجبات، انتي بتعيقي تنمية مهاراتها ونمو شخصيتها وكمان بتخليها تحس بعدم الكفاءة..
كمان جو المذاكرة بيبقى جو مليان بالتوتر والضغط العصبي ليكي وليها..
هل ده معناه إنك متساعديهاش خالص وتسيبيها؟؟.. أكيد لأ.. لكن انتي محتاجة تعرفي إمتى تتدخلي وامتى تتراجعي..
لغاية سن تسع سنوات أو نقول الصف الثالث الابتدائي، انتي ممكن تساعدي بنتك علشان تعلميها يعني إيه مذاكرة ويعني إيه نظام سواء لوقتها أو طريقتها في المذاكرة..
لما يبقى عندها 12 سنة، اسحبي نفسك من المذاكرة تماما، دورك هيبقى المتابعة وفقط علشان تنمي الاستقلالية والمسؤولية عند بنتك.. لو استمريتي بعد السن ده، هتبتدي تعتمد عليكي وتريّح دماغها من المذاكرة
لما بناتي وصلوا ل سن حوالي تسع أو عشر سنوات، أنا قررت إني مذاكرلهمش، وكنت مستعدة تماما لتحمل العواقب وهي إن مستواهم هيتراجع، لأن ده مكانش مستواهم الحقيقي، ده كان ضغطي عليهم طول الوقت.. وأنا كنت عايزة أكسر الدايرة بتاعة الضغط العصبي للمذاكرة والامتحانات لأنها فعليا أثرت على علاقتنا🙁..
وقد كان.. لما شيلت إيدي من مذاكرتهم، مستواهم تراجع شوية، لكن أنا قررت إني أتأكد إنهم حلوا الواجب وذاكروا، وبس.. ولما حد فيهم كانت عايزاني أشرح لها درس، كنت بقولها حاولي تقرئيه لوحدك الأول، واسألي المس على اللي انتي مش فاهماه، وكنت بزقهم إنهم يعتمدوا على نفسهم إلى أقصى حد، وكنت بساعد لما ألاقيهم فعلا جابوا الماكسيمام بتاعهم، أكيد مش هسيبهم يقعوا ومقدملهمش أي مساعدة..
الموضوع أخد كام شهر لغاية ما مستواهم ارتفع مرة تانية الحمد لله، بس المرادي بفضل الله أولا، ثم مجهودهم هما🥰..
وفي أثناء ما انتي بتشيلي إيدك من المذاكرة ليهم طول الوقت، أكيد مش هتقفي تتفرجي عليهم وهما مستواهم بيقل، ولكن اعملي الآتي:
1- اهتمي بفكرة التعليم.. إنها تحب تتعلم.. مثلا فرجيها على فيديوهات تعليمية ملهاش علاقة بالمنهج علشان تبقى متشوقة أكتر إنها تشوفها.. خلي فكرة التعليم نفسها خاصة بيها هي، مش بيكي إنتي..
2- متعرضيش مساعدتك عليها.. استني لما هي تيجي تسألك علشان تديها ثقة في اللي هي بتقدر تعمله..
3- وجهي، ومش لازم تصلحي كل الأخطاء.. سيبيلها أخطاء تبقى مسؤولة عنها.. لو نسيت الواجب، متفكريهاش بيه كل مرة، سيبيها تتعاقب عليه من المدرسة علشان تفتكره بعد كده لوحدها..
4- اسألي بدل ما تدي معلومة جاهزة، خليها تشغل مخها.. اسألي “إيه اللي احنا المفروض بنعمله قبل ما نتفرج على التليفزيون؟”..
5- اتكلموا مع بعض، إيه هي المهارات اللي ناقصاها؟؟.. الاستقلالية؟؟.. إنها تفتكر اللي وراها لوحدها؟؟.. التنظيم والتخطيط؟؟.. مهارات الاستذكار نفسها.. مهم إنك تعرفي علشان تساعديها في تطوير المهارات اللازمة..
شاركيني أول خطوة هتعمليها علشان تعلمي بنتك تذاكر لوحدها..
و متنسيش تعملي لايك وشير للبوست علشان الكل يستفيد..
ملحوظة: بعض بوستاتي ينفع تطبقي المبدأ بتاعها مع الولاد كمان، مش البنات بس، لكن مع اختلاف اللغة المستخدمة أو الأسلوب اللي توصليلهم بيه..

Share this post

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *