بنتك بتقولك انك عمرك ما حبتيها؟
“انتي مبتحبنيش.. ومبتعمليليش أي حاجة من اللي أنا عايزاها”..
سمعتي الجملة دي أو حاجة شبهها من بنتك قبل كده؟؟..
كلنا اتقالتلنا الجملة دي بشكل ما أو بآخر وسط خناقة أو زعل بينا وبين بناتنا.. 
وحقيقي بتوجع أوي..
وبيبقى ردنا عليهم ” إزاي تقولي كده، ده أنا مفيش ورايا غيركم.. بعملكم كل اللي أقدر عليه.. ازاي مفيش تقدير خالص كده”..
احنا كل يوم بنعمل كل حاجة علشان ولادنا يبقوا كويسين ومبسوطين..
بنحبهم وبنهتم بيهم، ومع ذلك فيه دايما انكار من بنتك انك بتحبيها وانك مش بتعمليلها حاجة..
فيه فريق من الأمهات، هيقول إن ده جحود من البنات وإنهم بقى عندهم قلة تقدير.. وإن ده ابتزاز عاطفي من بنتك علشان تاخد منك موافقة على حاجة مبتوافقيش عليها غالبا أو إنك تجيبيلها حاجة إنتي مش عايزة تجيبيها”..
وفريق تاني هيحاول يدور على الأسباب علشان يصلح علاقة هتستمر للأبد.. 
..
..عايزة أقول إن حتى الابتزاز العاطفي معناه إن ناقصها فعلا إشباع عاطفي.. وكمان حاسة إنها معندهاش الشجاعة إنها تطلب منك وتتناقش معاكي وتقنعك بالحاجة اللي هي عايزاها، إما لأنها عارفة إنك بترفضي كتير من طلباتها، أو لأنها بتخاف تطلب في العادي..
ازاي بقى أوصل لبنتي الحب والاهتمام؟ ازاي بنتي تفهم إني فعلا بحبها؟؟اني أعملها أكل وشرب وادفعلها مصاريف المدارس والتمارين؟
لأ هذا لا يكفي للأسف..
ده إشباع مادي لا يغني من جوع..
أنا بتكلم عن إشباع العواطف واللي بيوصلها فعلا إنك بتحبيها..
فيه حاجة مهمة جدا اتعلمتها وأنا بربي بناتي، وهما صغيرين، أنا كنت فاكرة إن طالما أنا بهتم بأكلهم وشربهم وتعليمهم وبوصلهم التمارين وأفضل قاعدة متكتكة في عز البرد مستنياهم لما يخلصوا، وببوسهم وبحضنهم، يبقى كده هما هيوصلهم أكيد إني بحبهم.. اكتشفت إن ده مكانش كفاية بالنسبالهم.. وإنهم طول ما هما مشبعوش عاطفة بتوصلهم بجد وبيحسوا بيها، بتبقى علاقتي بيهم وحتى علاقتهم ببعض مش أحسن حاجة..فاتعلمت، إن فيه فرق كبير بين إني أرعى مصالحهم وإني أحبهم.. وفيه فرق كبير بين إني بحب بنتي، وبين إني أوصلها الإحساس ده بطريقة هي تفهمها..
10 طرق لو عملتيهم بنتك هتحس انك بتحبيها:1- اسمعي وأنصتي وأبدي حماسة لكلامها.. ومثلا لما تلاقيها بتعيط، تقعدي معاها طول ما هي بتعيط حتى لو السبب تافه ومتزهقيش ومتقوميش وتقوليلها أنا حاسة بيكي وحاسة إنك موجوعة (حتى لو انتي مش مقتنعة بالسبب بتاع عياطها)، يعني تهتمي بمشاعرها بغض النظر إنك متغاظة منها من تفاهة الموقف..
2- احضان وبوس بمناسبة ومن غير مناسبة كل ما تشوفيها
ولما في وقت تعلي صوتها، بدل ما تقوليلها وطي صوتك زي كل مرة، إنك تاخديها في حضنك وتهديها..
3- حسسيها بالفخر.. أي حاجة تعملها حسسيها انها عملت حاجة كويسة واتكلمي عنها بفخر قدام الناس..
4- بصيلها بإعجاب..
5- خليها تساعدك.. لأ مقصدش في البيت، اقصد تساعدك في حاجة انتي مبتعرفيش تعمليها زي مثلا انها تعملك اكاونت انستجرام أو تظبطلك حاجة في الموبايل
6- اعملي ليكم روتين مع بعض.. زي مثلا انكم كل يوم خميس بتخرجوا مع بعض بتروحوا كافيه أو بتعملوا شوبنج أو بتتغدوا سوا في مكان.. ومثلا زي انك تخصصي وقت ولو نص ساعة في اليوم علشان تقعدي مع بنتك، انتي وهي لوحدكم تتكلموا زي أي اتنين ستات قاعدين يتسلوا مع بعض..
7- خليها تشارك في قرارات مهمة في البيت.. زي سفر لمكان، او ترتيب لعزومة، أو تاخدي رأيها في شغل جديد ليكي..
8- لو ليها اخوات، لازم تعدلي في التعامل معاهم.. ومتاخديش صف حد فيهم لما يتخانقوا، اسمعي كل حد فيهم واتكلمي معاه من غير ما تتحيزي لطرف ضد طرف.. انتي مامتهم، مش قاضي.. حسسيهم ان كل حد فيهم مميز وانك بتحبي تميزه.. متقوليش ان اختك دي مريحة وانتي لأ.. أو أخوكي بيسمع الكلام وانتي متعبة.. وقضي وقت حلو مع كل حد لوحده.. وحسسي كل بنت وكل ابن لوحدهم إن مكانة كل حد فيهم خاصة جدا..
9- ادعميها حتى لو هي غلطانة.. أسوأ حاجة ان لما حد يبقى غلطان يحس إنه منبوذ ولا يستحق أي حاجة كويسة.. غلطت، علميها، اتكلمي معاها، احكيلها على خبراتك، لكن أبدا متنبذيهاش..
10- خلي أول اليوم دايما جميل.. ومعاد صحيانها يبقى لطيف.. يعني وانتي بتصحيها دلعيها وملسي على شعرها.. وغنيلها وهزري معاها حتى لو هي كبيرة.. أول دقائق في اليوم بتفرق جدا..
الأمهات الواعية عارفين إننا بشر وبنغلط عادي، بس المهم نصلح، عارفين إن مهما كانت التربية فيها تعب وإجهاد، ولكن ثمرتها بتبقى عظيمة.. لأن تربية بناتنا وولادنا جهاد عظيم ومحتاج صبر وتعلم وطول بال
..
..شاركيني هتبدئي بأي طريقة من العشرة؟؟..
و متنسيش تعملي لايك وشير للبوست علشان الكل يستفيد..
ملحوظة: بعض بوستاتي ينفع تطبقي المبدأ بتاعها مع الولاد كمان، مش البنات بس، لكن مع اختلاف اللغة المستخدمة أو الأسلوب اللي توصليلهم بيه..
اترك تعليقاً