مرهقة جدا وتعبانة؟
admin2023-10-04T22:43:46+00:00أنا مش عارفني 😂😂
فيه بوست قصير جدا عبارة عن سطر واحد قرأته من كام يوم مفهمتوش وأعدت قراءته كتير جدا بردو مفهمتوش، فقلت لنفسي أكيد البوست مش مفهوم وملوش معنى (ده طبعا حسب رؤيتي ساعتها 😀) وطبعا مشكتش في نفسي لحظة 😊…
النهاردة بالصدفة عدى عليا نفس البوست وقرأته وفهمته على طول ولقيته انه مش صعب الفهم خالص وواضح جدا كمان، سبحان الله 😁..
إيه اللي حصل؟ أنا هو هو نفس الشخص، والفرق يومين فقط..
اللي حصل اني كنت مرهقة جدا من يومين فطبيعي ان ال prefrontal cortex المسؤول عن التفكير المنطقي كان مقفول وواضح انها كانت قفلة جامدة كمان 😂 وعلشان كده مفهمتش الكلام المكتوب بالرغم اني قريته كتير و عدت وزدت فيه. النهاردة أنا مرهقة صحيح بردو لكن يمكن مش زي من يومين فال prefrontal cortex مفتوح وقابل للتعلم والفهم…
طبعا الموقف ده بيمر علينا بأشكال مختلفة ومتنوعة، على هيئة بوست أو حد بيكلمنا أو كتاب بنذاكره أو نقرؤه… فإذا كان ده بيحصل معانا احنا الكبار أصحاب الخبرات المتنوعة في الشغل وفي الحياة واللي عدى علينا آلاف المواقف واللي بنفهمها وهي طايرة، فما بالكم بالأطفال والمراهقين لما يكونوا تعبانين من المدرسة والتمارين ومطلوب منهم يذاكروا بيبقى مخهم مقفول أحيانا واحنا نصوت فيهم ونبقى مش مصدقين نفسنا انهم مش فاهمين حاجة سهلة كده.. ده مبيبقاش استعباط منهم ولا غباء، ده بيبقى مجرد غلق مؤقت لمنطقة المنطق والفهم والعقلانية في المخ….
طبعا أنا عارفة ان معظم الولاد خلصت امتحانات دلوقتي بس هنرجع نتكلم في مواضيع المذاكرة تاني على اول السنة الجديدة ان شاء الله علشان كل شوية نفكر نفسنا ومنفتريش على العيال جامد في المذاكرة….
لكن ده كمان ممكن يحصل في أي موقف وهما تعبانين أو مرهقين فيه، احنا نكلمهم فيفهموا كلامنا غلط فيبقى رد فعلهم مش طبيعي علشان المنطق عندهم اتقفل…
نعمل إيه لما نحس انهم بيتصرفوا بلا منطقية؟
١. التواصل الفوري معاهم في الحالات دي مهم جدا لأن ده اللي بيفتح منطقة المنطق في المخ ويخليها ترجع تشتغل تاني.. نتواصل بال warm eye contact يعني نبص في عينيه بحنية، وشنا يبقى relaxed، النظرة ولغة الجسد الحنينين الدافيين لهم مفعول السحر في التواصل، مش بس مع الولاد، لأ ده كمان في الحياة مع الناس التانيين. ممكن كمان نهزر بدل ما نقلبها غم ونكد (ودي مهارة محتاجة تدريب شوية بشوية لغاية ما نتقنها)، ممكن نلعب لعبة سريعة لو الطفل صغير… هنلاقي الولاد بدأت تبقى relaxed هي كمان ورد الفعل هيبقى كويس وهيلموا نفسهم لو أفوروا وممكن يعتذروا كمان…
٢. اذا مش هنعرف نتواصل يبقى ممكن نتغافل عن الموقف لو عندنا من برود الأعصاب ما يكفي اننا نعديه فيبقى كويس ونأجل الكلام لبعدين…
٣. الحل الثالث اللي دايما بقولكو عليه اني مبحبوش ومش مفضل إلا في الحالات الشديدة جدا😉 إني هقول طيب أتا همشي دلوقتي وارجع تاني. اللي هو اسمه time-out بس ليا مش للطفل..
فهمنا لطبيعة ولادنا وطبيعة مشاعرهم هيسهل علينا التعامل معاهم جدا..
اترك تعليقاً