دايما عندك إحساس بعدم التقدير؟
إنك تلمّي ورا ولادك الحاجات اللي بعتروها بعد ما لعبوا بيها، إنك تلمي هدوم جوزك وولادك بعد ما يقلعوها ويرموهالك في أي حتة، إنك تحلي مشاكل ولادك في المدرسة، إنك تذاكريلهم وتوديهم للدكتور وتوصليهم تمارينهم، إنك تاكلي بسرعة علشان تلحقي تعملي اللي وراكي سواء في شغل البيت أو في شغلك المتأخر، إنك تلاقي ولادك بيكلموكي بطريقة مش لائقة، إنك تحسي إنها مسؤوليتك إنك تسعدي كل الناس…..
بعد كل ده، بتبقي عايزة تحسي بالتقدير من اللي حواليكي، من ولادك و جوزك. أي أم إحساسها بالتقدير هو اللي بيغذي إحساسها إنها مهمة كل يوم وإن وجودها فارق….
وخلينا نقول الحقيقة، محدش بيجي في باله إنه يقدرك لأنه اللي بتعمليه بقى روتين في حياة عيلتك، فلو قعدتي تستني التقدير هيجيلك إحباط وهتحسي إن محدش مهتم ومحدش شايفك أصلا… بس دي مش الحقيقة، ده مجرد إحساس بيجيلك لما متلاقيش التقدير اللي بيخليكي مكملة في رعايتك لبيتك وعيلتك، وفي نفس الوقت الإحساس ده لا يمكن إنكاره، هو موجود وبيضايقك…
طيب تعملي إيه لما الإحساس بعدم التقدير يجيلك وبقوة؟
** افتكري إن اللي بتعمليه حاجة كبيرة وعظيمة، وإنك بتتصدقي من وقتك ومجهودك عليهم، أيوة دي صدقة بس لازم تنويها علشان تكسبي ثوابها…
** افتكري إن ولادك نعمة في حياتك، جوزك اللي بيتعب في شغله نعمة في حياتك، بيتك اللي بتنضفيه و وبتلمي منه الكراكيب نعمة في حياتك…
** افتكري إن انتي ملكة البيت وإنهم من غير رعايتك ليهم ولكل تفاصيلهم مش هيعرفوا يعملوا حاجة… الموضوع مش أكل وشرب، الموضوع اهتمام بأدق تفاصيل حياتهم، فهمك لكل احتياجاتهم، لازم تبقي فخورة بنفسك وباللي بتعمليه، إنتي نعمة في حياة زوجك وولادك، لازم تشوفي نفسك كده…
انتي ممكن متسمعيش منهم كلمة شكر، لكن إنتي اللي تشكري نفسك على كل الحاجات الحلوة اللي انتي بتعمليهالهم… قولي لنفسك شكرا….
اترك تعليقاً