ازاي ندعم الأمهات؟؟

الفيلم الأمريكي (unstoppable) بيحكي عن قصة قطر، السواق بتاعه نزل منه علشان يصلح حاجة ونسي يشغل الفرامل فالقطر سرعته زادت والسواق معرفش يطلع تاني علشان يوقفه وفضل القطر تزيد سرعته جدا وطبعا مفيهوش سواق يوقفه ولا هو هيقف لوحده لأنه كان متبرمج على أقصى سرعة، وهما فضلوا طول الفيلم يحاولوا يوقفوه علشان ميعملش كارثة، لأن القطر ده كان عليه مواد كيميائية ممكن تنفجر لو القطر انحرف عن القضبان أو دخل منطقة مأهولة بالسكان….

لما الأم بتتعرض لضغوطات كتير من البيت والولاد والحياة وتفضل مستحملة وساكتة كتير وبعدين يحصل أي حاجة حتى لو صغيرة تضايقها، تبتدي تتخانق مع ولادها وتزعق فيهم، وبتبقى عاملة زي القطر ده بالضبط، منطلقة بأقصى سرعة ليها في الزعيق والخناق ولا هي عارفة تقف ولا حد عارف يوقفها… ليه؟ علشان السواق مش موجود…

السواق هنا هو الجزء من المخ المسؤول عن المنطق والعقلانية، هو فعليا مبيبقاش موجود في اللحظات دي، بيبقى غايب تماما وبالتالي الفرامل مش موجودة، وهنا بتبتدي سلسلة من الكوارث، زعيق، شتيمة ، ممكن ضرب، حاجات بتقولها تضايق بيها ولادها، وبعدين….. بعدها بشوية لما تفرغ كل الل عندها وتبعد شوية، يبتدي ندم رهيب على كل حاجة عملتها وكل كلمة قالتها أثناء الخناقة… وفي اللحظة دي، هي مبتبقاش عارفة تعمل إيه، نفسها تصالح ولادها، بس كرامتها بتنقح عليها علشان البهدلة اللي بتشوفها منهم ومن ضغط الحياة عموما، فبتقرر انها متعملش حاجة وتستنى لغاية ما ولادها يناموا وبعدين تبوسهم وتتأسفلهم وهما مش سامعينها، وتقرر انها مش هتعمل كده تاني ومش هتسمح لنفسها انها توصل لمرحلة الانفجار دي مرة تانية، وفعلا بلتزم بإنها تتعامل معاهم كام يوم بشكل كويس جدا وبعدين….. كام يوم ويحصل الانفجار تاني….

الانفجارات المتكررة دي بتحصل وهتحصل طول ما الأم مضغوطة ومبتاخدش فرصتها إنها تعبر عن اللي مضايقها وتقول مشاعرها لحد ميحكمش عليها ويقول انها مقصرة في حق ولادها وبيتها، هتحصل طول ما بتلاقيش حد يسمعها، هتحصل طول ما هي مبتلاقيش فرصة تستريح….

الناس بتعتبر إن الأم مصممة على إنها متنامش عادي وتتحمل الضغط عادي وتتحمل مشاوير الولاد وتمارينهم وتتحمل الانتقادات اللاذعة عن طبيخها وتقصيرها في البيت ودرجات ولادها وكل ده تاخده عادي وتفضل مبتسمة ومرحة عادي…

الأم بني آدم في الأول والآخر، محتاجة تستريح، محتاجة تنام، محتاجة حد يشيل عنها مشاويرو مسؤوليات أحيانا لما تكون تعبانة… والأهم من ده كله، محتاجة حد يسمعلها، حد تعبر له عن أد إيه هي تعبانة ومتضايقة من غير ما يحكم عليها، من غير ما يقولها ما كل الأمهات تعبانة عادي، من غير ما يوجهلها نصيحة… الأم محتاجة دعم علشان تقدر تكمل رسالتها في تربية ولاد صالحين، متوازنين ومنفتحين للحياة…