ازاي الأم متخليش تجربة الطلاق تهدها ولا تكسر ولادها؟
admin2023-10-04T22:43:23+00:00المشكلة بتبدأ فعلا من مجتمعنا وضغطه اللي بيحسس أي ست مطلقة انها مقدرتش تنجح في حياتها ويدوها لقب الست الفاشلة وعلشان الأم متاخدش أي ألقاب من دي تاني و تثبت للناس انها لم تفشل في تربيتها لولادها زي ما فشلت في حياتها، فبتبتدي – غصب عنها وهي مش حاسة – تضغط على ولادها علشان الناس لما يشوفوهم يلاقوهم ناس متربيين ومثاليين فيقولوا انها أم مش فاشلة فمتاخدش اللقب ده كمان وتكتفي باللقب الأول بس…
بتدخل الأم وولادها سبق محموم من انهم لازم يطلعوا الأوائل في دراستهم وإنهم لازم يطلعوا مهذبين ومينطقوش قدام الناس وإن اللي يشوفهم لازم يمدحها ويمدح تربيتها علشان زوجها السابق ميشمتش فيها هو وعيلته وده طبعا بيخلي الأم تحاول تمشّي ولادها على الصراط المستقيم فتبتدي تزعق كتير وتتنرفز كتير عليهم علشان يسمعوا كلامها وبتبقى مركزة على الهدف الأوحد عندها وهو انها متاخدش لقب الأم الفاشلة وبتنسى تسمعلهم وبتنسى انهم عندهم احتياجات عاطفية وانهم محتاجين حبها ودعمها ومساندتها ليهم…
النتيجة ان الولاد بيبعدوا عاطفيا عن الأم وممكن يقربوا لأفراد تانيين في العيلة نجحوا انهم يحتووهم ويحسسوهم بالدعم وممكن يقربوا لباباهم أكتر كمان وده بيحسس الأم بضغط زيادة وبيحسسها بالفشل أكتر، لأنها بتحس ان ولادها كمان هي مش عارفة تخليهم يحبوها ويبعدوا عنها زي باباهم ما بعد عنها وتدخل في دايرة من الاكتئاب والإحساس بالفشل وعدم تقدير الذات وتبتدي تجلد في نفسها طول الوقت ويبقى صوتها الداخلي عبارة عن صوت سلبي بيكسر فيها (negative self- talk ) وتبقى هي دي حياتها….
علشان الأم متدخلش في الدايرة دي أو تقدر تخرج منها بسرعة إذا اتزحلقت فيها غصب عنها بعد الطلاق، يلزمها الآتي:
١. انه يكون حواليها ناس بتدعمها نفسيا بعد تجربة الطلاق وتذكرها دايما انه الطلاق مش مرادف للفشل، بالعكس دي تجربة وبنتعلم منها علشان نقدر نبني بقية حياتنا صح (لو مش حواليها الناس دي تدور عليهم وتبتدي تبني علاقات تساعدها على ده)..
٢. انه يكون معاها ناس بتسمع لمشاعرها كتير علشان تقدر تعبر عن كل اللي جواها والنقطة دي مهمة جدا وأساسية لأنها كل ما عبرت عن مشاعرها أكتر، كل ما حست إنها أخف وده بيساعدها على تخفيف الضغط والتوتر وبيخلي ال prefrontal cortex في المخ يشتغل بشكل كويس وتقدر الأم تاخد قرارات سليمة بعد الانفصال..
٣. تعرف ان هي نفسها مهمة ومهم انها تاخد بالها من نفسها وان ولادها صحيح جزء مهم جدا من حياتها لكنه مش كل حياتها، فمينفعش تقول أنا هعيش علشان ولادي وتنسى انها عندها أهداف كتير في حياتها محتاجة تحققها علشان تبقى حياتها متوازنة وانها لو اهتمت بجانب واحد في حياتها، التوازن الحياتي بيختل وبتبقى مش عارفة تعيش حياتها بشكل سليم.. الأهداف التانية دي زي صحتها، علاقتها بربنا، علاقاتها بالناس، تطوير شغلها،….
٤. انها تتعرف على ناس جديدة وتعمل حاجات جديدة هي مش متعودة عليها، اعملي الحاجات اللي كان نفسك من زمان تعمليها زي لعب رياضة جديدة، الاشتراك في أنشطة خيرية، السفر لأماكن جديدة،… لأن التجارب الجديدة بتخلي المسارات العصبية في المخ تنمو وبالتالي المخ بينمو ويتطور وبيبقى أكثر قدرة على حل المشكلات..
٥. انها تعرف ان ولادها كويسين زي ما هما وان نجاحهم الدراسي من عدمه مش ده اللي هيحدد اذا كانت ام فاشلة أو لأ، اللي هيحدد ده هي بناء علاقة سوية بينها وبين ولادها، مطلوب جدا انها تسمع لولادها ولمشاعرهم كتير، تقعد معاهم كتير وتقيم حوار يحترم رأيهم حتى لو مكانش مضبوط ١٠٠%، ده هيديهم ثقة في نفسهم وفيها وهيزود التواصل بينهم ويقلل الضغط والتوتر اللي بيتولدوا بعد الطلاق. الاستماع الكتير لولادها وهما بيتكلموا هيخلي الأم تشوف ولادها بشكل مختلف لأنها هتفهمهم أحسن وبالتالي هتعرف تربيهم أفضل، تربيهم تربية قائمة على الاحترام والدفء مش تربية قائمة على الأوامر والقهر والزعيق المتبادل… ده هيخليهم يشوفوا مامتهم انها ست قوية وبرغم الصعاب إلا إن قوتها النفسية مخلياها حريصة على علاقتها بيهم وده هيعلمهم ازاي يتعاملوا مع الصعاب اللي هتواجهم في حياتهم بعد كده..
٦. انها تقرأ كتب كتير للتحفيز ولزيادة الثقة بالنفس وانها تحضر كورسات في مجالات مختلفة لتطوير معارفها ولتطوير مهارات التواصل مع الناس التانيين في نفس الوقت وده هيزود نسبة الوعي عندها جدا وهيخليها تنظر لأمور حياتها نظرة مختلفة وتقدر تتعامل مع ولادها ومع الناس بشكل أفضل..
٧. انها تدعي ربنا كتير جدا وتستعين بيه انه يقويها على نفسها وعلى اللي جاي وتتصدق كتير..
الطلاق تجربة صعبة جدا و الموضوع مش بالسهولة دي وبياخد وقت، لكن الخطوات العملية دي هتقصر المسافة جدا ووضوح الهدف انك هتعدي منها انتي وولادك من غير ما تتكسروا هيديكي القوة والقدرة…
من ضمن الإرشادات إنه بيقولك سيبي الحلة ترتاح لمدة 10 إلى 20 دقيقة تقريباً قبل فتح الغطا و طبعا معروف إنه خطر جدا إنك تستعجلي و تفتحي غطا حلة الضغط من غير ما تخفي الضغط – عن طريق فتح الصفارة الأول أو إنك تسيبيها لغاية ما تبرد خالص علشان الضغط اللي جوه يقل- وإلا الغطا هيلبس في وش اللي بتطبخ والسائل اللي جوه الحلة هيندفع بقوة ويغرق الحيطان وقد يتسبب في حروق خطيرة…..
– احنا عاملين زي حلة الضغط بالضبط، علينا ضغوط من نواحي كتير زي البيت والولاد والشغل وغيرهم… فلو قعدنا نكتم مشاعرنا جوانا ومنخرجهاش خالص، الضغط بيزيد جوانا وممكن عند أي موقف ولو بسيط وتافه ننفجر في وش اللي قدامنا…..
– واحنا كمان لما بنزود الضغط على ولادنا ومنسمحلهمش بالتعبير عن مشاعرهم والتنفيس شوية هينفجروا في وشنا وساعتها بنبقى مش فاهمين هو إيه اللي حصل فجأة….
فيه فرق كبير أوي بين حكاية أحداث حياتنا والتعبير عن مشاعرنا، أي حد ممكن يحكي حاجة حصلت، لكن التعبير عن المشاعر محتاج وعي عالي مننا إننا نقدر نحط إيدينا على اللي احنا حاسين بيه ونعبر عنه وللأسف مجتمعنا مش متعود على الكلام ده بالرغم من أهميته الشديدة جدا…..
*** طيب ازاي تعبري عن مشاعرك علشان متنفجريش؟
أفضل شيء إنك تختاري أم تانية وتفضفضيلها بمشاعرك من غير نصائح ولا تعليقات منها غير انها تدعمك نفسيا فقط (مهم جدا).. إنتي لو عرفتي تعبري عن مشاعرك صح وتدخلي بعمق في مشاعرك، هتعرفي تحلي كتير من المشاكل اللي انتي بتمري بيها علشان الضبابية اللي موجودة على الجزء المسؤول عن التفكير العقلاني في المخ وقت التوتر هتروح وهتبتدي تفكري كويس وتلاقي حلول كتير، الأداة دي اسمها listening partnership وهي أداة مهمة من ادوات التربية بالتواصل (hand in hand, parenting by connection)…..
*** ازاي تخلي ولادك يعبروا عن مشاعرهم علشان مينفجروش؟
تسمعيلهم كويس من غير ما تقاطعيهم، تحاولي تفهمي الرسائل اللي بيبعتوهالك ورا كلامهم، تسمعيلهم وهما بيعيطوا ومتمنعيهمش عن العياط، تقدري مشاعرهم ومتقلليش منها (staylistening) ، تعلميهم ازاي يعبروا عن مشاعرهم وعن كل اللي جواهم، تبقي قدوة ليهم في التعبير عن مشاعرهم…
خفي الضغط عن نفسك وعن ولادك….
اترك تعليقاً