٣ طرق نقدر نتقبل بيهم اختلافاتنا عن الآخرين
admin2023-10-04T22:49:59+00:00هو احنا فعلا بنتقبل اختلافاتنا ولا بنقول كليشيهات وخلاص؟
أنا بحب أصوّر أي حاجة تلفت نظري 📸.. وفي يوم كنت بتفرج على الورد 🌼🌻🏵، ولقيت وردة قافلة بالعكس.. يعني أنا طول عمري بشوف الورد بيقفل والشيء الأصفر ده بيبقى جوه مش باين، إلا الوردة دي لقيتها قافلة لبره… فأول حاجة جت في بالي “إيه ده هي الوردة دي مش عارفة تقفل صح؟… وبعدين وقفت شوية ولقيت نفسي حكمت على الوردة إنها غلط…
وطبعا الوردة مش موضوعي، أنا موضوعي إني قفشت نفسي وأنا بحكم أصلا، وبعدين فكرت “هو إيه الصح أصلا؟” ومين قال إن الوردة دي قافلة غلط؟ والصح ده من وجهة نظر مين؟ الصح بالنسبالي؟ ولا بالنسبة للناس التانيين؟
فيه ثوابت منقدرش نتكلم فيها، زي الدين.. ربنا نزله وهو ده الصح بلا نقاش..
لكن أنا هنا مبتكلمش عن الثوابت، انا بتكلم عن وجهات النظر أو التصرفات…
مين قال إن تصرفك أو كلامك هو الصح وأنا اللي غلط؟ والعكس صحيح بردو..
قال الشافعي رحمه الله “قولي صحيح يحتمل الخطأ وقول غيري خطأ يحتمل الصواب”..
📣”يا جماعة عايزين نقبل الاختلافات”.. الجملة دي بقت بتتقال طول الوقت… إننا كلنا مختلفين واحنا مش نسخ من بعض، فطبيعي إنه نكون مختلفين في المشاعر وطريقة التفكير والتصرفات وردود الأفعال..
المشكلة بتبقى فين؟ لما نكون فاكرين إننا بنقبل بعض بجد وبنقبل اختلافاتنا وتلاقينا بنقول لبعض مثلا “بس دي حاجة متضايقش” أو “مكانش صح إنك تتصرف بالطريقة دي” ونبتدي نحاكم الآخر ونحكم عليه على أساس تفكيرنا إحنا ومشاعرنا إحنا… كل ده مش تقبل للإختلاف..
وطبعا أول ناس بنطبق عليهم ده هما ولادنا للأسف.. لبسك وحش… شعرك شكله بايخ.. ليه بتاكل الملوخية بالعيش.. لازم تاكل البامية مع الرز.. إيه الكلام الغريب اللي بتقوله ده.. إنت هتفتكسلنا أي افتكاسة وخلاص.. آراءك كلها غريبة وغلط…
خلينا نبص للإختلاف بنظرة أعمق شوية.. الاختلاف ما هو إلا تميز الشخص وتفرده عن الآخرين..
إيه هو أصلا التميز؟؟ دي بعض التعريفات اللي الناس عرفوا بيها التميز:
١. “الصفة الوحيدة من نوعها.”
٢. “القدرة على الاحتفال بتفرد كل فرد”
٣. ” الصفة أو الخصلة التي تكون رائعة ، خاصة ، أو غير عادية”..
🍀 إذن خلينا نبص على نفسنا وعلى ولادنا ك حد متميز مش بس مختلف.. وخلينا كمان نطلع الصفات المتميزة دي ونكتبها قدامنا، ويا ريت كمان نعلقها، هنلاقي أد إيه ربنا خالق كل حد فينا وهو فعلا متفرد بحاجة مختلفة ومتميزة .. بس إحنا ندور 🔍ونتدبر..
ال ٣ خطوات دي هتخليكي تقدري تتقبلي تميز الآخرين:
١. خليكي واعية دايما بالأفكار اللي بتجيلك.. يا ترى بتحكمي على الناس طول ما انتي ماشية🚶♀️؟ بتحكمي على نفسك؟ .. مجرد وعيك بالأفكار دي هيخليكي تقفي شوية قبل ما تحكمي على حد✋..
٢. حاولي تخلي أفكارك إيجابية ناحية نفسك وولادك.. يعني دوري على مواطن قوتك وقوة ولادك واكتبيها، علقيها قدامك.📃 متسيبيش نفسك لنقط ضعفك.. كلنا عندنا نقط ضعف، بس اللي بيشتغل عل نقط قوته وبيقويها أكتر، هو اللي يتقبل نفسه بشكل أحسن وبالتالي بيتقبل الآخرين بسهولة…
٣. حطي نفسك مكان الشخص الآخر.
Put yourself in his shoes.
المثل بيقولك اللي على البر عوام.. يعني كلنا بنعمل نفسنا شاطرين وبنعرف نتصرف طول ما احنا بره الموقف، كلنا دكاترة وكوتشز وخبراء🎓.. لكن الشطارة اللي بجد إنك تحطي نفسك مكان الشخص التاني وتلتمسي له الأعذار في تصرفه وتحسي بإحساسه.. وعلشان تبقوا عارفين… ده مستحيل 🛑.. كل حد فينا ليه تركيبته النفسية المختلفة وتربيته وثقافته اللي بتخليه يفكر ويتصرف بشكل معين.. فأنا لا يمكن أكون الشخص الآخر..
ف يا ريت نسيب بعض في حالنا ونبقى لطاف ولذاذ مع بعض ومنحكمش على بعض ونتقبل تميزنا عن بعض علشان يبقى كلام بجد مش كليشيهات..
اترك تعليقاً