وفري وقتك ومجهودك.. واستخدمي التكنولوجيا لصالحك..

وقتك ضايع على الموبايل وبتشتكي من التكنولوجيا ؟..

بتجري كل يوم ومش لاحقة تعملي نص المطلوب منك؟

احنا بقينا في عالم افتراضي كبير، كلنا قاعدين جواه.. إحنا وولادنا وكل اللي حوالينا..

قانون نيوتن الأول: بينصّ على أن الجسم الساكن يبقى ساكنا والجسم المتحرك يبقى متحركا في خط مستقيم وسرعة ثابتة ما لم تؤثر عليه قوة خارجية تغير من حالة السكون أو الحركة.

فيه تغييرات كتيرة وسريعة بتحصل حوالينا، ف بناء على القانون ده، مينفعش نفضل زي ما احنا علشان ده من قوانين الطبيعة في عالم الانفتاح التكنولوجي اللي احنا فيه ده..

أنا حاولت كتير أعمل زي ماما الله يرحمها، اللي هو لما أرجع من الشغل أفضل أعمل شغل البيت لغاية ما أنام وأبقى مهدودة ومش قادرة أتكلم مع ولادي حتى.. لغاية ما أدركت إنه مينفعش أصلا أبقى زيها.. ولا هي زي مامتها..

ماما الله يرحمها كانت بتشتغل بس شغلها مش زي شغلي، وأنا طبيعتي مختلفة عنها.. كمان ولادي في تمارين وأنشطة، وأنا مكنتش بلعب رياضة لأننا كنا بره مصر ومكانش ده مركز الاهتمام.. والحياة ساعتها كانت أهدى بكتير والأنشطة أقل جدا..

حقيقة مش هنعرف نهرب منها.. لازم نعترف ونقر إننا مش زي أمهاتنا.. مش علشان إحنا أحسن ولا أوحش.. ببساطة إحنا زماننا مختلف.. عالم سريع، أنشطة كتير.. متطلبات حياة كتيرة جدا.. علشان كده مينفعش نعيش النهاردة بتفكير امبارح.. ولازم نتقبل ده ونسلم ليه..

كلنا بنستمتع برحلة السوبرماركت وأنا شخصيا بعتبره فسحة ، بس كام مرة مبيبقاش عندك وقت تروحي تشتري حاجات البيت ويوم ورا التاني البيت بيفضى وبتضغطي في وقت صعب وتروحي وانتي تعبانة وعلى آخرك..

مع سرعة  الحياة وكمية الحاجات المطلوبة مننا، ربنا أنعم علينا بحاجات كتير جدا تسهل لنا حياتنا.. واحدة من الحاجات دي هي ال applications  على الموبايل.. واللي لازم نستفيد منها علشان نرتاح ومنكركبش نفسنا ونتحمل فوق طاقتنا..

في البوست ده أنا هتكلم عن نوع واحد من ال apps  اللي هي بتساعد أي أم مشغولة إنها توفر وقت ومجهود في شراء احتياجات البيت، الوقت ده هي وولادها أولى بيه..

من ال apps  اللي أنا وناس كتير مجربينها وبتساعدني جدا هي :

1. Instashop : وده أبليكيشن بيوضحلك أقرب سوبرماركت ليكي ولما بتختاريه بيحيبلك السوبرماركت متقسم زي ما تكوني فيه، يعني ده سكشن المنظفات ، وده الخضار و ده الجبن وهكذا.. وانتي بتمري على كل سكشن وبتدوسي على صور المنتجات اللي انتي عايزاها وطبعا أسعارها بتبقى مكتوبة وفي الآخر بتراجعي الأوردر بتاعك وتكتبي لو ليكي ملاحظات خاصة ( أنا بكتبلهم عايزة تواريخ جديدة  .. وبعدين بتختاري الساعة اللي انتي عايزة يوصلك فيها الأوردر ( ودي حاجة بتفيدني جدا لما أكون بره وعايزة الحاجات تيجي لما أروح البيت على طول ، يعني مش لسه هطلب وأستنى) ولما المنتج اللي انتي عايزاه بيبقى مش موجود، بيبعتلك رسالة إن ليه بديل لو حابة تختاريه..
2. MAF Carrefour online shopping: وده زي ما هو واضح كارفور … زي الأبليكيشن اللي فات بس زيادة عليه إنه عامل حتة مخصوص لكل المنتجات اللي عليها عروض، وعليها نسبة خصم أد إيه.. وطبعا معظمنا بيحب كارفور علشان العروض اللي دايما بيعملها..
3. Gourmet Egypt : وده أسعاره غالية حبتين لأنه مركز على الأكل الصحي عموما وكمان بيقدم تشكيلات خاصة بيه هو (زي مشكل جبن ولانشون مثلا معمول ل من 25-30 شخص أو مشكل فطاير ل 15-20 شخص وهكذا)

كمان بيقدم بعض الوصفات وطريقة عملها وسعر كل حاجة مستخدمة فيها، ولو عجبتك الوصفة، بتدوسي مباشرة عليها وهما بيبعتولك مكونات الوصفة ولو فيه حاجة من المكونات عندك ممكن تدوسي إنك تقفلي المكون ده وتطلبي الباقيين..

4. Breadfast : وزي ما هو باين من إسمه إنه بيعمل عيش ويوصله.. تقدري تطلبي لغاية الساعة 11 بليل لتاني يوم أو أي يوم انتي عايزاه وبتختاري الساعة اللي عايزاها يوصل فيه ابتداء من الساعة 5 الفجر.. أيوة الفجر والله .. وعاملين توصيل مجانا لو طلبتي إنه يوصل في مدة مفتوحة من الساعة 8 صباحا ل 12 ظهرا، لكن لو طلبتي في ساعة محددة، التوصيل ب 10 جنيه..

وفيه أبليكيشنز تانية كتير وفيه apps  التوصيل فيها بفلوس وفيه ببلاش.. ,وفيه اختيار إن الدفع لما الطلب يوصل كاش أو بكريديت كارد أو دفع أونلاين بكريديت كارد.. اختيارات كتير متاحة.. المهم إننا عايزين نختار اللي يناسبنا منها ونستخدم التكنولوجيا لصالحنا ونستغل الموارد التكنولوجية المتاحة علشان عصبيتنا وتوترنا يقل و نوفر وقت ومجهود، نديه لولادنا ولنفسنا..