هو احنا بجد محتاجين كورسات؟
ليه بنتكلم في التربية؟ هو احنا محتاجين كورسات علشان نعرف نربي صح؟ كل الأجيال اللي فاتت كانت بتربي ولادها عادي من غير الدوشة دي؟
طيب ليه بنتكلم عن ازاي نحب نفسنا؟ هو احنا محتاجين حد يعلمنا ده؟ هو احنا بنكره نفسنا؟
طيب ليه بنتكلم عن ازاي نقود نفسنا ونمتلك زمام أمورنا؟ ما احنا عايشين وزي الفل أهو…
طيب ليه بنتكلم عن أسباب العصبية وازاي نقدر نهدّي نفسنا؟ طيب ما احنا مش محتاجين نسمع الكلام ده لأن لما بيعدي علينا موقف، شوية وبنهدى وبترجع الدنيا كويسة…
الدنيا اختلفت كتير جدا، الضغوط بقت كتير، ريتم التغيير بقى أسرع من الأول…
السوشال ميديا بقت في متناول الجميع والشهرة بقت سهلة، أي حد عايز يشتهر، يطلع يعمل اي حاجة تافهة والناس تتفرج وتسقف وخصوصا الشباب والمراهقين ونفسهم يبقوا زيهم…
الألعاب الأونلاين واللي ب تتيح إن أي حد يلعب مع حد تاني في الجهة الأخرى من العالم… وبالتالي الأطفال مبيلعبوش لعب فعلي زي زمان مع أطفال تانيين وكل حياتهم بقت افتراضية و محبوسين بين الأربع جدران، مفيش تفاعل حقيقي ومفيش حياة بجد …
التكنولوجيا اللي كل يوم بتتغير، العالم الافتراضي اللي كلنا بقينا عايشين فيه واستغنينا بيه عن مقابلات الناس وصلة الرحم، ده حتى الناس بقت بتفضل تحضر كورسات افتراضية اونلاين بدل التفاعل مع الناس ومع المدرب..
المعلومات بقت في متناول الجميع وده شيء ممتاز جدا، لكن في نفس الوقت بقى فيه معلومات كتير جدا، كلنا مضطرين إننا نبقى على علم بيها علشان منبقاش خارج الركب…
العالم بقى مليان توتر وسرعة وجري… احنا متوترين وبالتالي ولادنا كمان متوترين ومع الضغوط دي، أحيانا بنفهم الكلام غلط، بنتسرع في الحكم على الناس، ومخنا بيبقى مقفول تجاه المنطق والتحليل…
وعلشان المتغيرات دي كلها، بنبقى عايزين نفهم أكتر عن نفسنا وعن طبيعة ولادنا اللي اتغيرت عن زمان ونفهم نظرتهم المختلفة للأمور علشان نقلل الفجوة بينا وبينهم، عايزين نحس إننا مش لوحدنا، وان فيه ناس كتير زينا حاسين بنفس اللخبطة ونفس التوتر بتاعنا، فاهمين بعض وبندعم بعض وبنتعرف على امهات جديدة وبنتبادل الخبرات…
كل ما فهمنا نفسنا أكتر ووصلنا لتقدير ذات أعلى، كل ما قدرنا نفهم ولادنا صح ووصلنا معاهم لعلاقة أفضل مبنية على ثقة واحترام متبادل
اترك تعليقاً