مشغلين ال autopilot ؟

عارفين أول ما بنتعلم السواقة؟ بنبقى مركزين أوي في الطريق وواعيين لكل حاجة بتحصل، بنبص في المراية اللي في النص كل ٢٠ ثانية و في المرايات الجانبية كل ٣٠ ثانية وماشيين بين الخطين اللي لونهم أبيض ومركزين تمام… بعد شوية لما نبقى متمرسين في السواقة ممكن نسرح نلاقي نفسنا وصلنا البيت وده مش معناه إننا بقينا سواقين شاطرين، لأ خالص.. ده معناه إن ال autopilot بتاعنا اشتغل، ال autopilot هو الطيار الآلي اللي هو جهاز في الطيارة أو السفينة بيخليها تمشي في اتجاه معين بدون تدخل الإنسان، اللي هو أنا بعمل الحاجة دي كل يوم ومتعود عليها فمبقيتش أحس بحاجة وأنا بعملها وبقيت بعملها بالدفع الذاتي من غير تفكير خالص…

احنا مشغولين طول الوقت.. غالبا معندناش وقت نفكر هو احنا بنعمل اللي بنعمله ده ليه؟ إيه معناه في حياتنا؟ إيه هدفنا منه؟ the why behind …

بنوصل ولادنا المدرسة ليه؟ ليه أصلا مودينهم مدارس؟ بنوديهم تمارين ليه؟ بنعمل أكل ليه؟ بننظف البيت ليه؟ بنديهم فلوس ليه؟ مبنديهمش ليه؟….. هل علشان “هذا ما وجدنا عليه آباءنا” ولا علشان فعلا أنا بعمل ده علشان أحقق معنى وهدف في كل حاجة من الحاجات دي؟ والمعنى ده مش علشان يكبروا أو علشان يدخلوا جامعات أو… المعنى أكبر وأكثر قيمة بكتير…

كل واحد فينا عنده معنى في حياته مختلف، المعنى ده اللي بيخليكي تقومي من النوم الصبح، بيبقى عامل زي البوصلة، بيخليكي تاخدي قرارات معينة في حياتك، بيأثر على سلوكياتك وتصرفاتك، المعنى ده هو اللي بيخليكي سعيدة، هو اللي بيخلي عندك إدراك ووعي أكتر بمشاعرك وبنفسك وبأهدافك وبكل حاجة انتي بتعمليها في حياتك ومع ولادك…

معنى حياتنا هو اللي بيخلينا نتوقف عن فعل أشياء بتضيع وقتنا هباء، هو اللي بيخلينا مدركين لقيمة الوقت وقيمة كل حاجة في حياتنا مهما كانت بسيطة وبكده بنبقى مستشعرين نعم ربنا علينا وبنشوفها صح ومبنستصغرش أي نعمة لأن فعلا مفيش نعم صغيرة أبدا…

لو كل حد فينا اكتشف معنى حياته، هيكتشف معاها الحاجات اللي بيحب يعملها، هيكتشف نقاط قوته، هيكتشف قيمته وقِيَمه، هيصحى من النوم وهو عارف المفروض يعمل إيه النهاردة وكل يوم..

معنى الحياة ممكن يدور حوالين الشغل، العيلة، الولاد، خدمة الناس، التعليم، مساعدة الناس في حاجة أنا شاطرة فيها، أتعلم ديني وأعلم اللي حواليا، الصحة، وحاجات كتير تانية..

المعنى لازم يبقى داخل في كل حاجة بنعملها في حياتنا.. وأنا بعلم ولادي قيمة جديدة في دينهم وفي أخلاقهم، يبقى بحقق استخلافنا في الأرض وعبادة ربنا وبحقق معنى “كلكم راعٍ وكلكم مسؤول عن رعيته”… لما بوصل بنتي امتحان أول مرة تمتحنه وأقعد أستناها، يبقى بحقق معنى الدعم والتراحم والتعاطف…

وأنا بعلم الطلبة في المحاضرات أو في رسائل الماجيستير والدكتوراه ويبعتولي بعد سنين ويقولولي انهم فاكرين محاضراتي واللي كنا بنقوله فيها بحس فعلا إن المعنى بتاعي في التعليم اتحقق، معنى العلم والتعلم.. لما أم بتكلمني وتقولي أد إيه هي حاسة بتغيير في حياتها وحياة ولادها يبقى المعنى في تعليم الأمهات ودعمهم والتعاطف معاهم ورفع الوعي بينهم اتحقق… لما يبقى فيه حد محتاج يفهم معلومة أو يتعلم مهارة ببقى مبسوطة وأنا بشرحهاله وأخليه يطبقها وأتابع طريقة تطبيقه علشان أتأكد إنه استوعبها وبقت جزء من كيانه.. بحس إنه “الحمد لله رب العالمين”، اللهم استخدمنا ولا تستبدلنا..

عايزين نقعد ربع ساعة مع نفسنا، نقفل ال autopilot شوية و نفكر إيه معنى حياتنا اللي احنا عايشين بيه؟ إيه أكتر حاجة بنبقى مبسوطين لما بنعملها؟، إيه اللي اكتشفناه عن نفسنا؟ أهدافنا إيه؟ إيه اللي احنا نحب نقابل ربنا عليه؟ إيه المعنى ورا كل حاجة بنعملها في حياتنا؟..

عايزاكم تشاركوني وتكتبولي معاني وأهداف مهمة في حياتكم 💖💖