كل حد فينا عنده جمل تحفيزية بيحب يقرأها علشان تزقه و يتحرك.. quotes دايما بيحطها قدامه علشان يفضل متشجع..

وأنا صغيرة كل ما كانت تمر عليا أزمة، أيا كانت، حد عايز ينقصني درجات، دكتور ظالم بيزود حد تاني علشان هو اللي يطلع الأول، تعيين في قسم غير اللي أنا عايزاه، غلاسة من ناس،… كانت ماما الله يرحمها دايما تقرألي آية ١٧٣ من سورة آل عمران “الَّذِينَ قَالَ لَهُمُ النَّاسُ إِنَّ النَّاسَ قَدْ جَمَعُوا لَكُمْ فَاخْشَوْهُمْ فَزَادَهُمْ إِيمَانًا وَقَالُوا حَسْبُنَا اللَّهُ وَنِعْمَ الْوَكِيلُ” (173) ولما كانت بتقولهالي، كنت بحس بقوة شديدة منها وكانت القوة دي بتتنقلي أوتوماتيكيا من كتر ما هي واثقة وهي بتقولها وكانت بتديني عزيمة وإصرار إني أكمل..

وبعدها ” أَنَا عِنْدَ ظَنِّ عَبْدِي بِي فَلْيَظُنَّ بِي مَا شَاءَ “..

☘ وكل ما تمر عليا أزمة أفتكرها وهي بتقولي الآيات والأحاديث… إحساسي إن ربنا هو الوكيل اللي بيدبر أمري بيطمني.. فالله سبحانه وتعالى نعم من يوثق به في تفويض الأمور.. هو مين تاني ممكن نثق فيه؟ مين اللي في إيده تدبير الأمور؟ مفيش غير ربنا سبحانه وتعالى…

☘ فالتوكل على الله وحسن الظن به بيدينا دفعة push إننا منخافش من حاجة ولا من حد.. فالله هو المدبر واحنا على قوتنا دي كلها، منقدرش نعمل حاجة ولا حد يقدر يؤذينا غير بأمر الله.. ولا نقدر نغير قدر الله.. لكن في نفس الوقت ربنا رزقنا بحاجة قوية جدا.. الدعاء..

☘ الدعاء مع اليقين بالإجابة هي اللي ممكن تغير القضاء ودي مش حاجة سهلة ومحتاجة إيمان قوي واحنا بجد ضعفاء جدا.. لكن بنحاول إن يكون عندنا يقين بالله ثابت وقوي واحنا بندعي ونتوكل على الله ونحسن الظن به في كل أحوالنا.. في شغلنا، في تربيتنا لولادنا وأي حاجة عايزين نعملها في حياتنا❤..

اللهم ارزقنا إيمانا ويقينا ثابتا لا يتزعزع وارزقنا الإخلاص في القول والعمل❤❤