عندك parents meeting قريب وهيبقى صعب تروحيه؟

عندك مقابلة أولياء أمور واجتماع في الشغل في نفس الوقت؟ هتحضري أي واحد فيهم؟

الحقيقة إني وقعت في الموقف الوحش ده كتير، لأني أولا كنت بسافر لأن شغلي كان في جامعة المنصورة، وثانيا لأن ممكن يبقى عندي محاضرة أو سكشن أو اجتماع أو امتحان في نفس الوقت ده.. وأمهات كتير بتشتغل بتعاني من الموضوع ده😔..

طبعا معظم الناس بتبقى شايفة الأم اللي بتشتغل مقصرة طول الوقت، بس علشان بتشتغل، ودي ممكن تبقى حقيقة طبعا لأن أمهات كتير مبتاخدش بالها وبتتزحلق في شغلها جامد على حساب بيتها..

وطبعا فيه أمهات كتير هتقول طبعا الولاد أهم، سيبي شغلك و روحي ال parents meeting علشان تبقي دريانة ولادك بيعملوا إيه في المدرسة..

هقولكم الموضوع مش بالسهولة دي وأحيانا فعلا بيبقى غصب عن أي أم بتشتغل إنها متقدرش تسيب الاجتماع لأنه متحدد بقاله فترة وهي رئيس اللجنة أو فيه امتحان هي مشرفة عليه أو مناقشة رسالة.. يعني حاجة مينفعش فيها التأجيل أو عدم تواجدها في الشغل..

إحساس الذنب وتأنيب الضمير هيفضل ياكل فيكي وتقعدي تفكري في اللحظات الصعبة دي وازاي إنتي مقصرة بالشكل ده وإنك لازم تستقيلي من شغلك، بس انتي محتاجة الفلوس أو قعدتي تبني في شغلك ده سنين وصعب إنك تسيبيه وما إلى ذلك من الأفكار المجهدة اللي بتقعدي تفكري فيها بالساعات..

طيب الحل إيه؟ تفتكروا هسيبكم كده من غير حلول؟؟ أبدا

📌 لو الموضوع على أد ال parents meeting، ف حلها بسيط جدا… إنتي من أول السنة بتبني علاقة كويسة مع المدرسة والمدرسين علشان ده المفروض أصلا، إننا تبقى علاقتنا مع المدرسة علاقة تعاون ومساعدة، مش علاقة انتقاد وخلاص.. وعلشان كمان المواقف اللي من النوع ده لما تقابلك تقدري تحليها بسهولة.. من قبل ال parents meeting ، بتكلمي المدرسة وتشرحي الموقف وتطلبي منهم إنهم يحددوا مواعيد تانية لمقابلة مدرسين أهم مواد عند ولادك، يعني المواد اللي فيها مشاكل بس أو تحديد مواعيد للاتصال بالمدرسين، أو لو ده مش سهل يبقى على الأقل المدرسين يكتبوا أهم نقاط القوة والضعف عند ولادك واقتراحاتهم للتحسين.. والموضوع ده سهل وبسيط والمدرسة هتستجيب لو عرضتي الموضوع عليهم بهدوء وبطريقة فيها مرونة وتبقي محضرة طرق التواصل واللي هيقبلوا بيه وافقي عليه لأنك طالبة استثناء، يعني بلاش تزرجني معاهم…

📌 طيب لو الموضوع بقى فيه حفلة أو حاجة مهمة لازم تحضريها في المدرسة، ولو محضرتيهاش بنتك هتفضل زعلانة ومتأثرة منك؟؟

بردو حلها بسيط.. من أول السنة هتطلبي ال calendar يعني هتسجلي مواعيد كل الإيفنتات بتاعة المدرسة واللي فعلا إدارة المدرسة بتبقى محضراها قبل بداية الدراسة.. ولما يجيلك اجتماع، هتفتحي ال calendar الأول ومن بدري كده هتقولي إذا المعاد مناسب يبقى تمام، مش مناسب هتطلبي تغيير معاد الاجتماع أو تعتذري عنه أو تجيبي حد بدالك يحضره، و الخطوة دي كمان بتعتمد على قوة العلاقات اللي انتي عاملاها في شغلك..

⚡️قاعدة مهم جدا إنك تتبعيها وهي:

Build it before you need it

والقاعدة دي تنطبق على علاقتك بزوجك وولادك وشغلك، مينفعش تطلبي من حد يغير معاد أو يعملك استثناء من غير ما تبقي إنتي بذلتي مجهود في العلاقة دي علشان تبنيها وتصلحي فيها طول الوقت..

ب شوية تفكير وتخطيط وتنظيم هتقدري تحضري معظم إيقنتات ولادك، وحتى لو حاجة مقدرتيش تحضريها هيبقى في الإطار العادي اللي ممكن حتى الأم اللي مبتشتغلش تفوتها بردو علشان أي ظروف..