علاقة زوجية كويسة = أطفال مطمئنين
وأنا صغيرة، ماما الله يرحمها وبابا كانوا بيحبوا يتكلموا مع بعض قبل ما يناموا وكان بيبقى كلام هادي وحكايات وشوية ضحك.. ماما كانت بتشتغل، فبالنسبالها ده كان ال me time بتاعها الل بتريح فيه أعصابها وتحكي ل بابا اللي هي عايزاه… هما كانون couple مميز ومختلف وبالنسبالي كلام بليل اللي ساعات مكنتش ببقى سامعة منه ولا كلمة وأنا نايمة في سريري كان أحلى حاجة ممكن أسمعها قبل ما أنام.. أد إيه كنت ببقى مبسوطة وأنا سامعة كلامهم الهادي وضحكة ماما الرايقة.. مش بس كنت مبسوطة، كنت ببقى مطمنة جدا.. الكلام ده مش بس وأنا طفلة، إحساس الإطمئنان ده كان بيجيلي حتى وأنا كبيرة لما بسمعهم..
عارفين إيه أكتر حاجة ممكن توتر ولادنا؟ الزعيق والخناق.. وخصوصا خناق الأم والأب.. حتى لو متخانقوش قدامهم بالكلام، لكن باين عليهم إنهم غضبانين..
الأبحاث أثبتت إن الخناقات بتأثر على الأطفال من سن 6 شهور ل 19 سنة..
تأثير الخناق على ولادنا ممكن نلخصه في 10 نقاط:
- الخناق بيخلي الولاد خايفين، قلقانين، متوترين. وعندهم حزن رهيب. لأن كل اللي بييجي في دماغهم هو إن مامتهم وباباهم مبيحبوش بعض و هيطلقوا.. كده خبط لزق..
- إحساس الولاد بعدم أمان
- علاقة الأهل بالولاد بتبقى متوترة، لأنه لايمكن نبقى عطوفين على ولادنا واحنا نفسنا متوترين وغضبانين طول الوقت..
- قدرات الأطفال الذهنية بتتأثر جدا، بمعنى إن انتباههم وعواطفهم وقدرتهم على حل المشكلات بيقلوا جدا..
- أداءهم في المدرسة مش كويس مع سلوكيات عنيفة..
- علاقاتهم مع الناس هتبقى متوترة، لأنه بيقلد النموذج اللي شافه.. وبالتالي صداقاتهم مبتبقاش قوية.. وحتى علاقاتهم مع زمايلهم بتبقى على المحك..
- اهتزاز الصورة الذاتية ليه (self-image)..
- تحيز الطفل لأحد الوالدين حسب ميوله وحسب اللي بيشوفه في الخناقات من ضعف أحد الطرفين أو تسلط الطرف الآخر ودي مشكلة كبيرة جدا..
- ميل الولاد إنهم يبعدوا عن أهاليهم وينسحبوا عاطفيا عن العائلة..
- قلة نوم وصداع وألم في المعدة..
تعملوا إيه لو حصل خناقة؟؟ 5 خطوات..
- متحاولوش تجرجروا ولادكم لأي طرف.. ومتخليهومش شاهد على الخناقات ومين اللي صح ومين الغلطان..
- ادخلوا أوضتكم واتخانقوا جوة، مش قدامهم وحاولوا صوتكم يبقى واطي، بلاش عرض الرعب اللي بنعمله لولادنا.. وإذا حسيتي إن الخناقة هتطول، حاولي تخرجي لهم وتطمني عليهم وتكلميهم عادي علشان يطمنوا إنك كويسة على الأقل مؤقتا..
- حاولي تشغليهم بأي ألعاب أو كتب أو تشغليلهم فيلم ينشغلوا بيه.. أو تخليهم يكتبوا ليستة بالوجبات اللي عايزين ياكلوها أو الأماكن اللي عايزين يروحوها.. اشغليهم بأي حاجة إيجابية..
- أهم خطوة تعمليها، إنك بعد الخناقة، افتحي معاهم الموضوع.. اسمعي مشاعرهم، إيه كانت أحاسيسهم أثناء الخناقة.. تقبلي كل مخاوفهم وكل اللي هيقولوه..
- فهميهم إن مش معنى الخناقة إنك إنتي وباباهم هتنفصلوا أو إنكم مبتحبوش بعض.. بالعكس، فهميهم إن طبيعي إن يبقى الناس مختلفين عن بعض في الطباع وإن الخناقات ساعات بتحصل بس مع الاحتفاظ بالاحترام..
اترك تعليقاً