ذكرياتنا محفورة جوانا

مع شمس العصر، ليّا ذكريات كتيرة…
منها ذكريات الأجازة واللعب ومنها ذكريات مذاكرة وحاجات تانية…

بس أول حاجة جت في دماغي لما شفت شمس العصر بالجو ده النهاردة هي ذكرياتي لما كنت بنزل مصر في أجازة الصيف، لأن ده المكان الوحيد اللي كان مسموح لي فيه بالانطلاق والنزول تحت البيت للعب وركوب العجل..

لما بنشوف حاجة معينة وبيجيلنا ليها إحساس معين حتى لو مش فاكرين الذكرى، ده معناه إنها متخزنة في الذاكرة الضمنية في المخ، الإحساس هو اللي بنقدر نحسه لكن مش شرط إننا نبقى فاكرين الذكرى نفسها..

ليه ده مهم؟

🌿 🌿 أولا مهم لينا دلوقتي إننا نفهم ليه بنحس الأحاسيس دي مع أحداث معينة…. أحاسيس الفرح جميلة وبالتالي كويس اننا نفتكرها.. المشكلة بتبقى مع أحاسيس الحزن المصاحبة لل events دي،

١. لازم نعرف نسميها أولا: ضيق، حزن، وحدة، غضب، إنهاك، إحراج،..

٢. وبعدين مهم جدا إننا نعبر عنها ونطلعها برانا، سواء بالكلام عنها أو الكتابة…

٣. و بعدين ندرك إنها خلاص خلصت بكل أذاها واحنا دلوقتي في مكان وزمان تانيين…

🌿🌿 ثانيا، مهم لولادنا علشان:

١. من دلوقتي نعمل معاهم ذكريات حلوة يفتكروها لما يكبروا ان شاء الله..

٢. مع أي مكان بنروحه، نتكلم معاهم عن أحاسيسهم في المكان ده ونناقشهم في رأيهم في أي حاجة حصلت واحنا موجودين… ده بيعلمهم إنهم يعبروا عن اللي جواهم بشكل دقيق وبيعلمهم بناء الحكم الصحيح على الأمور من خلال المناقشة.. وكمان بيبني ثقتهم بنفسهم بشكل قوي جدا..

الذكريات الحلوة مع ولادنا هي اللي هتعمل فرق كبير في حياتهم..