خايفة أبقى أم فاشلة

كام مرة في حياتك كأم بتشتغلي خفتي من الفشل؟

كلنا بنخاف من الفشل في حياتنا عموما.. لكن إننا نفشل كأمهات، ده الخوف الأعظم عندنا..

لما كانوا ولادي لسه صغيرين وكنت بجرب فيهم جميع أنواع التربية، أنا مكنتش خايفة من الفشل.. خالص، أنا كنت فعلا متأكدة إني أم فاشلة..

والفشل عندي وعند أمهات كتير معناه إن ولادي يرفضوا حضني، إنهم يفضلوا يزنوا على حاجات وأنا معرفش أرد على الزن ده غير بالزعيق والعقاب، إننا لما نخرج خروجة، نرجع كلنا متنكدين، وأقعد أعدلهم جمايلي وأفضالي عليهم وأفكرهم إني بأكلهم وأشربهم وبوديهم تمارين و.. و.. وما إلى ذلك من الحاجات الغريبة بجد اللي كنت بقولها.. واللي معظمنا كان بيقولها.. واللي كان بيحسسني بالفشل أكتر إني بشتغل وكان في اعتقادي إن الأمهات اللي قاعدين في البيت مبيزعقوش لولادهم ولا بيعاقبوهم لأن بالهم رايق ومش محتاجين يعملوا ده لأن أكيد ولادهم بيحبوهم أكتر.. لغاية ما اكتشفت إني عايشة في أوهام تأنيب الضمير اللي سببه مش موجود أصلا..

المشكلة بتتعاظم جدا لما كمان تبقي perfectionist ، عايزة كل حاجة كما يقول الكتاب وعايزة تمشي ولادك على القواعد والتعليمات..

وكل اللي المكتوب ده بيؤدي في الآخر إنك انتي وولادك علاقتكم بتبقى مش كويسة، فيها شد وجذب كتير، ممكن يبقى فيها حماية زايدة لولادك وبالتالي هما بيتخنقوا وممكن يردوا ردود متعجبكيش فتزعقي والدايرة تلف تاني..

طيب نعمل إيه علشان نقلل الإحساس بالفشل ده وحتى لو فضل موجود بنسبة ميبوظش علينا حياتنا؟

أولا: كل الناس بتتعلم، يعني إنتي مأخدتيش شهادة مع الجواز إنك قادرة على تربية أطفال، الستات مخلوقين بالفطرة حنينين وعطوفين وعندهم مشاعر كتير علشان يقدروا يحبوا ولادهم بعد الألم الرهيب اللي بيشوفوه في الولادة وإنهم يفضلوا يحبوهم مهما شافوا منهم، لكن متخلقوش مربيين بالفطرة.. التربية محتاجة شوية حكمة على شوية خبرات من آخرين منقولة صح، على شوية قراءة وتثقيف، على حبة مهارات تواصل، هوني على نفسك، يعني إنتي وجوزك محتاجين تتعلموا سوا يعني إيه تربية، مش إنتي بس اللي محتاجة تتعلمي..

ثانيا: كل الناس بتغلط، يعني لما تتعصبي على ولادك، اقعدي مع نفسك شوية، واسألي هو إيه بالضبط اللي منرفزني؟ هل ابني فعلا عمل غلطة تنرفز؟ هل عندي مشاكل في الشغل وده اللي خلاني مش قادرة أتحكم في أعصابي؟ هل فيه حاجة تانية ضاغطة على أعصابي؟

ولما تعرفي سبب عصبيتك، اكتبي المرة الجاية لما أحس إني هبتدي أتنرفز، هسكت شوية مش هرد على طول أو هقول لابني إحنا ممكن نتكلم بعد شوية ، أو أي رد فعل تجهزيه من قبلها وتكتبيه علشان المخ يكون صورة ذهنية للي مكتوب ويبقى تطبيقك ليه أسهل..

لما نقعد نفكر في ردود أفعالنا وإزاي نحسنها، ده بيفرق معانا في علاقتنا مع كل اللي حوالينا..

وافتكري دايما إن الأخطاء هي فرصة عظيمة للتعلم..

ثالثا: فكري في إنجازاتك حتى لو البسيطة منها، فكري في المشاكل الكتير اللي عدت عليكي وقدرتي بفضل الله تحليها.. هتقدري تحلي مشاكل ولادك بردو..

رابعا: حمد الله على كل النعم اللي بنألفها والامتنان لكل حاجة.. كل يوم بليل، اكتبي كل الحاجات الحلوة اللي حصلتلك والنعم اللي موجودة في حياتك، الامتنان بيفرق جدا في النفسية وفي رؤيتنا للأمور اللي حوالينا..

خامسا: متقارنيش نفسك بحد، كل أم فينا ليها ظروفها وخبراتها وتربيتها المختلفة عن الأمهات التانيين.. ارفعي ثقتك بنفسك طول الوقت وتقبلي نفسك بأخطائك وبمحاولاتك المستمرة للتحسين..