تحديات ومصاعب الحياة

تحديات ومصاعب الحياة

ربنا قال في كتابه العزيز:
“لَقَدْ خَلَقْنَا الْإِنسَانَ فِي كَبَدٍ” (4) سورة البلد
يعني الإنسان يكابد مصائب الدنيا وشدائد الآخرة..

سبحان الله، الحياة كلها مصاعب والنجاح مش سهل بس مش مستحيل واللي عايز ينجح، لازم يعافر كتير..

🍀 احنا بنقلق لما ولادنا ميكونش عندهم موهبة فطرية، فبيفتكروا إنهم هيبقوا مش متميزين..

🍀 الناس فاكرة إن الموهوبين بالفطرة هما بس اللي بينجحوا، لكن الحقيقة إن النجاح ليه مقاييس كتيرة..

🌼 و المقياس الأهم هو السعي الدائم والمثابرة والاستمرار في المحاولة والتوكل الدائم على الله..

أول ما بدأت رحلتي كاستشاري تربية بالتواصل للأمهات المشغولين جنب شغلي كأستاذ في كلية طب الأسنان، كنت الحمد لله قبلها مدربة دولية معتمدة دربت الكثير من أعضاء هيئة التدريس، فمكانش التدريب عقبة بالنسبالي ولا تصميم البرامج التدريبية ولا إني أعمل خطط استراتيجية لأني عملت الكلام ده كله في الكلية وعلى مستوى برنامج دراسي كامل مدته ٥ سنوات…

🚫 لكن أهم عقبة قابلتني هي إني مكنتش أعرف أي حاجة عن البيزنس ولا عن قواعد التسويق لأني حد أكاديمي خبراتي المهنية هي في الجامعات والتدريس والإدارة وبعيدة تماما عن قواعد البيزنس.. وكنت فاكرة إن دماغي متجيبش الكلام ده لأن عمره ما كان بيستهويني ولا عمري دخلت فيه قبل كده…

🌼🌼 والحمد لله ده خلاني أتعلم حاجات جديدة تماما عليا وأخدت كورسات كتير في الموضوع ده واستشرت ناس كتير وأخدت coaching sessions كتير علشان أقدر أفهم بيزنس وماركيتينج، وبقيت عضو في اكتر من كوميونيتي فيهم ناس داعمين ومشجعين وفي رأيي، ده بردو مفتاح مهم من مفاتيح النجاح، وجودنا وسط الداعمين.. اللي دايما بيفكروا في نجاح غيرهم زي نجاحهم.. اللي بيشجعوا من غير أنانية❤..

🍁 التحديات والصعوبات في الحياة كتيرة ومبتخلصش، لكن ده يخلينا منعملش لولادنا حماية زائدة overprotection علشان ميتعرضوش لمشاكل، بالعكس تماما.. إحنا نعلم ولادنا إزاي يواجهوا مشاكلهم بإنهم يحاولوا باستمرار ومييأسوش ودايما يتوكلوا على الله لأنه حسبنا ونعم الوكيل…

Share this post

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *