بتشتغلي من البيت؟ 7 خطوات لإنجاز أكتر..

جالي كذا سؤال إنه لو الأم بتشتغل من البيت، تنظم وقتها ازاي وتعمل إيه..

الشغل من البيت يبدو إنه حاجة لطيفة ومريحة، الأم مش مضطرة إنها تنزل وتضيع وقتها في مواصلات أو إنها تكون بتجري علشان تلحق معاد ولادها في المدرسة.. لكن الحقيقة إنه فيه صعوبات كتيرة بردو .. وعلشان كده لازم نبقى واضحين مع نفسنا تماما لما نقرر قرار زي دي..

أنا اشتغلت شغل الكلية من البيت في فترة من الفترات وفيه حاجات بسطتني جدا وفيه حاجات معجبتنيش..

اللي بسطني:

• إني قعدت مع ولادي فترة أطول..
• بشتغل وفي نفس الوقت مبضيعش وقت كتير في ترتيبات الشغل اليومية من مواصلات ولبس وتعامل مباشر مجهد مع الناس..
• المرونة والحرية في الشغل..

سواء كنتي موظفة بتشتغلي من البيت أو  business ownerزي التدريب أونلاين، جرافيك ديزاينر،.. الشغل من البيت فرصة لتزويد الدخل من غير ما تيجي على ولادها، وإن وقت الشغل فيه مرونة بترتبه على حسب بيتها وولادها..

إيه أصعب تحدي بيواجه الأم اللي بتشتغل من البيت؟

• إن يبقى عندها بيبي صغير، مواعيد نومه لسه متلخبطة، وأكله لسه محتاج يتعمل وجبة بوجبة.. وييجي ميتنج أونلاين في الوقت اللي البيبي لسه بيصحى فيه، فبتبقى مش عارفة تعمل إيه..
• ممكن تشتغل زيادة أو في أي وقت بما إنها مش مرتبطة بمواعيد شغل ثابتة..
• ممكن وقت النوم ييجي على حساب الشغل..
• مقاطعات كتير ممكن تحصل، زي تليفون أو تنضيف أو غسيل تفتكره، فمبتقدرش توقف نفسها إنها تروح تغسل أو تنشر في وسط الشغل بما إن الوقت مفتوح قدامها..
• تحس إنها وحيدة لأنها مبتتعاملش مع حد بشكل مباشر..

تعملي إيه علشان تعرفي تشتغلي من البيت وفي نفس الوقت تاخدي بالك من ولادك وتحققي الهدف اللي انتي قاعدة علشانه في البيت؟؟

1. الروتين ثم الروتين: مخك بيرتاح لما بيبقى عارف ترتيب الحاجات اللي المفروض تتعمل فبتقدري تفكري أحسن.. خصوصا الروتين الصباحي، إنك مثلا تفطري وتجهزي حاجات للغدا مثلا وتحطي غسلة في الغسالة، تحضري أكل البيبي وبعدين تبتدي تشتغلي..
2. من بليل ترتبي ليستة بالخطوات المرتبطة بأهدافك اليومية، وترتبيها حسب رغبتك، من الأصعب للأسهل، أو من الخطوات اللي بتاخد وقت أقصر لأطول..
3. الترتيب مهم setup يعني مينفعش تكوني بتشتغلي في الليفنج وقدامك التليفزيون وجنبك اللب والسوداني.. لازم يبقى فيه مكتب صغير أو ركنة صغيرة تشتغلي منها، علشان تدخلك في مود الشغل بسهولة..
4. حطي على المكتب جمل تحفيزية inspirational and motivational quotes تفكرك دايما ب ليه انتي بتشتغلي من البيت وجمل تحفيزية للإنجاز..
5. يبقى قريب منك snacks خفيفة علشان متضطريش تقومي كل شوية تجهزي حاجة تاكليها، زي فاكهة، مكسرات، لبن رايب أو زبادي،..
6. رشي spray ريحته حلوة علشان المكان يبقى مشجع ويبعث على النشاط والحيوية..
7. علشان تنجزي وتتجنبي التشتيت الكتير، ممكن تستخدمي تكنيك بومودورو Pomodoro technique.. تكنيك سهل وبسيط جدا وهو إنك تقسمي مدة الشغل اللي عندك كلها على مدد زمنية قدرها 25 دقيقة شغل و5 دقائق راحة أو تطمني فيهم على ولادك إذا محتاجين حاجة . وبعدين تاخدي كمان 25 دقيقة شغل و5 دقائق راحة وهكذا.. ال 25 دقيقة بتظبطيها على المنبه أو تايمر الموبايل.. و سماها مخترع التكنيك “بومودورو” و هي أقصى مدة زمنية الإنسان ممكن يركز فيها، بعدها تركيزه بيبقى مش تمام.. بعد ما نخلص 4 بومودورو، بناخد بريك من 15 ل 30 دقيقة.. ال 25 دقيقة شغل، ولادك مش هيلحقوا يحسوا إنهم مفتقدينك، خصوصا إنهم بيشوفوكي كل شوية.. بومودورو بيحفزك تنجزي أقصى إنجاز في ال 25 دقيقة علشان تاخدي راحة وكمان بيخليكي تركزي على مهمة واحدة بس من غير تشتيت..