بتتكسفي تعملي اللي انتي عايزاه علشان الناس متنتقدكيش؟

ليه بنتكسف نقول إننا عايزين نرجع تاني نعمل الحاجات اللي بتبسطنا؟..
ليه بنخاف إن حد يقولنا المفروض تربي عيالك دلوقتي مش تفكري في نفسك؟؟

خوفنا وكسوفنا ده اللي بيوقفنا إننا نعمل حاجات كتير في حياتنا.. بيخلينا منقدرش نعبر عن اللي جوانا بشكل مفتوح وصريح، بيخلينا مش قادرين نعمل حاجات كتير نفسنا فيها…

هتقولولي طيب ما إحنا فعلا مش بيبقى نفسنا في حاجة نعملها، والحاجات اللي كانت بتبسطنا زمان معادتش بتبسطنا دلوقتي.. هقولك، دي حيلة مخك بيعملها علشان تريحي بيها نفسك.. ده كلام بتقوليه لنفسك علشان متبقيش زعلانة على كم الحاجات اللي انتي عايزة تعمليها وحاسة إنك متقيدة…

من سنتين تقريبا، كنت في مصيف وكنت واقفة على زحليقة في الأكوا بشاور عقلي أنزل ولا منزلش علشان كانت عالية أوي وأنا مليش في الأماكن المرتفعة خالص، ولقيت أم واقفة في الطابورفبصينا لبعض عادي ولقيتها بتقولي “أنا بلعب علشان ولادي”… أنا مسألتهاش واحنا منعرفش بعض أصلا، لكن إحساسها إنها مش من حقها تنبسط أو تلعب مخليها تبرر لنفسها وللي حواليها إن هي شخصيا مش عايزة تنبسط، بس بتعمل ده علشان ولادها.. وكأن ده مش حق من حقوقها.. وكأن ده عيب عليها…

طيب ازاي نقدر نعمل اللي احنا عايزينه من غير إحساس الكسوف والخوف من الناس؟؟؟

أولا: اعرفي إن أي حد بيقولك عيب عليكي انتي عندك ولاد طولك، إزاي عايزة تلعب أو ازاي عايزة تبتدي تذاكري من الأول أو تتخصصي في حاجة معينة كان نفسك تدرسيها من زمان، اعرفي إن الشخص ده أحلامه اتحطمت من زمان ومش عايز يشوف حد ناجح علشان ميحسش بالهزيمة.. أو إنه مش متطور كفاية علشان يعرف أهمية اللي انتي عايزاه.. أو عنده أسبابه اللي متخصش حد تاني غيره.. المهم إن الأسباب دي يخلوكي متاخديش كلامه على محمل الجد..

ثانيا: خصصي لنفسك ساعة واحدة كل يوم (أو نص ساعة على الأقل) تعملي فيها اللي بيبسطك.. نص ساعة مش كتير وهتقدري توفريها من أي حاجة تانية..

ثالثا: شاركي ولادك أحلامك، ولادنا منفتحين جدا، وهتتفاجئي إنهم هما كمان نفسهم إنك تعملي الحاجة اللي بتحبيها مجرد ما تشاركيها معاهم وتحكيلهم أد إيه انتي كنتي بتحبي تعملي الحاجة دي وانتي صغيرة.. اطلبي منهم المساعدة، هتتفاجئي بيهم..

رابعا: هاتي ورقة وقلم واكتبي كتير عن كل حاجة نفسك تعمليها.. اكتبي عن مشاعرك وانتي يتفكري فيها.. تخيلي نفسك وانتي محققاها فعلا.. يعني عيشي حلمك، حتى لو كان الحلم ده إنك تتمرجحي في النادي، متستصغريش أمنياتك علشان محدش يستصغرها..

خامسا: شاركي أحلامك مع ناس شبهك، دوري على صحاب ليهم نفس التفكير واندمجي معاهم واتعلمي منهم…

ومهما كنتي مشغولة في بيتك وولادك اللي هيفضلوا دايما نمرة واحد في حياتك، هتلاقي الوقت إنك تبسطي نفسك وتبسطي ولادك معاكي وتبقي قدوة ليهم…