ازاي منفقدش الأمل في التغيير؟ (الجزء الثاني)
بتلاقي نفسك بتتصرفي مع ولاك بطريقة معينة؟ عصبية.. بتردي من غير ما تفكري.. يتزعقيلهم وبعدين تكتشفي إن الموضوع مكانش يستاهل.. لكن ده بيتكرر مع كل موقف..
نفسك أوي تتغيري لكن علشان إنتي كبرتي ومقتنعة إن الإنسان عمره ما بيتغير لما بيكبر.. وشايفة إنك عمرك ما هتعرفي تتغيري مع ولادك..
أنا بقولك إن فيه أمل كبير تتغيري وتغيري معاملتك مع ولادك..
في وركشوب Maestro Mom ، بنعمل تمارين كتير وأنشطة كتيرة بتساعدك على بداية التغيير، بتساعدك إنك تشوفي ولادك بشكل أفضل…
من الحاجات القوية اللي بنتمرن عليها هي إزاي نخلي عقلنا مرن growth mindset ،
المرونة هي التكيف مع المتغيرات اللي حوالينا.. التكيف مع فكرة إن ولادنا بيكبروا وسمات شخصيتهم بتتغير.. وإننا لازم نتأقلم مع التغيير ده بتغيير شوية استراتيجيات للتعامل بينا وبين بعض..
مرونة العقل أو جموده بييجي من الأصل من التربية، يعني لو أنا عقلي جامد واتعلمت تمارين لمرونة العقل وأنا في وسط بيئة مرنة، عقلي هيتعلم المرونة بالتريج والعكس بالعكس…
الخطوات الصغيرة تأثيرها سحري.. متحاوليش تمشي خطوات كبيرة وتغيري تغييرات كبيرة، إنما لما تغيري حاجة واحدة بس كل مرة، ده هيبقى أنجح كتير..
- يعني مثلا ممكن كخطوة أولى تمنعي حاجات معينة، ممكن مثلا تمنعي الانتقاد.. امنعي نفسك إنك تنتقديه في لبس ابنك، ف شكل شعره، في طريقة كلامه..
- كلمي نفسك بشكل إيجابي طول الوقت.. قولي لنفسك أنا عايزة أعمل علاقة متميزة مع ولادي، ممكن مكونش عارفة إزاي لكن أنا هدور وأتعلم لغاية ما أعرف…
- لو معرفتيش تنفذي خطتك في يوم، متقوليش لنفسك إنك فشلتي، قولي إنك لسه بتتعلمي حاجات كتير ولسه دايما فيه فرصة للتحسين…
اترك تعليقاً