أنا مش لاقية نفسي خلاص

أنا مش لاقية نفسي خلاص

في ال workshops  و ال coaching sessions  اللي بعملها مع الأمهات فيه حاجة مشتركة دايما بتحصل، لما تكون الأسئلة بتدور حوالين الولاد فبتبقى الإجابات في معظمها جاهزة وواضحة والأم بتجاوب عليها بسهولة.. لكن فيه أسئلة معينة بتبقى إجابتها دايما: مفيش… معنديش…. كان فيه و راح…

ومع الأسئلة دي دايما بيبقى فيه ألم واضح في نبرة الصوت.. الأسئلة دي بتبقى حوالين الأم نفسها، حياتها، اللي بتعمله، ، صورتها الحالية عن نفسها، طاقتها، طموحاتها، تصوراتها للي جاي.. وكأنها عايزة تقول إن حياتها دلوقتي مش مهمة ومش أولوية ومش عايزة تفكر فيها أصلا والأهم دلوقتي هما ولادها ومذاكرتهم ومستقبلهم و بس.. و أنا مع جدا إن الأم لازم تكون مهتمة بولادها وبكل تفاصيل حياتهم ..

المشكلة إن التفاصيل دي هتخلص في يوم من الأيام ودورك هيقل جدا مع ولادك بالتدريج وهتلاقي نفسك في يوم مش لاقية حد فيهم تتكلمي معاه، مش علشان هما وحشين أو إنك معرفتيش تربيهم، لأ خالص، بس علشان دي سنة الحياة، هما مشغولين في جامعاتهم أو شغلهم والحياة فعلا بقت زحمة وصعبة..

ساعتها هتحسي إنك وحيدة وهتبتدي تدوري على حاجة تشغلي نفسك بيها أو تبتدي تحفظي قرآن أو تتعلمي علم شرعي أو تدوري على شغل تشتغليه، بس الموضوع هو إننا عندنا limited resources  يعني عندنا موارد محدودة من الطاقة النفسية والجسمانية، وانتي حرة بتصرفي طاقتك في إيه.. هل هتستهلكيها بدري في حرقة الدم والأعصاب في خناقاتك مع ولادك على درجة ودرجتين خسروهم في المدرسة؟… ولا دخولهم في كلية انتي مكنتيش بتتمنيها ليهم وكان نفسك أوي يحقق أملك في دخولهم طب أو هندسة؟…  ولا هتستهلكيهم في علاقات بترممي فيها بقالك سنين وبتستغربي هي الناس مالها بقت عاملة كده ليه؟… ولا هتستهلكيهم في شغل مبيحققش طموحاتك لا المادية ولا المعنوية؟…

في بحث عملته باحثتين في علم النفس سنة 2018 في بلجيكا اتنشر في المجلة البحثية frontiers in psychology عن استنفاد أو استهلاك الأم.. البحث ده كشف كوكتيل مرعب من الأحاسيس اللي بتيجي للأمهات واللي بتخليهم مستهلكين حرفيا و اللي سموه إرهاق/استهلاك التربية، أو parental burnout  ولقوا إن الخوف الشديد هو محور مهم جدا عند الأمهات.. الخوف من إنها متبقاش أم كويسة.. الخوف من إنها متقدرش تسيطر على أولادها بشكل كويس وتمنعهم من الانحرافات… ده زائد الإحساس بالذنب والعار والوحدة..

البحث ده هو أول بحث يتعمل على أمهات  عندهم burnout  .. وأنا بقرؤه كان نفسي أقولهم تعالوا عندنا، تجدوا ما يسركم من الإرهاق والاستهلاك التربوي و الأمراض النفسية اللي بقت عند الأمهات عمركم ما كنتم متخيلين إنها موجودة في الحياة بسبب كم الضغوط اللي عندنا  ….

هما لقوا إن ال burnout  ده بيحصل لما التوترات في حياة الأم بتعدي قدرة الأم personal resources للتأقلم مع الأحداث في حياتها ( ودي أقل حاجة عندنا في مصر .

نتكلم جد شوية؟؟.. إيه بقى أعراض إرهاق/استهلاك التربية parental burnout ؟

  1. الإرهاق البدني الشديد وخصوصا بيظهر على هيئة وجع في الرقبة، صداع، دوخة و احتراق تام للطاقة لدرجة إن الأم مبتبقاش قادرة تعمل أبسط المهمات في الببت..
  2. الإرهاق العاطفي الشديد.. واللي بيظهر في هيئة غضب وعصبية والإحساس بإن الأفكار غير واضحة وضبابية
  3. الابتعاد العاطفي عن أطفالها وعدم الاستمتاع بأي حاجة مشتركة بينهم لدرجة إن الأم بتبقى حاسة إن تنظيم اي نشاط ولو بسيط لولادها كأنه جبل من المسؤوليات؟؟
  4. الشعور بعدم كفاءتها كأم

والأعراض دي بتشترك بشكل كبير مع اكتئاب ما بعد الولادة في الأعراض لكنها بتختلف في إنها بتصيب الأمهات اللي عندهم أطفال أكبر من سنة ونص، و إنه مرتبط أكتر بطريقة تربية الأم لولادها، يعني بتربي بأي نمط تربية وكمان الحالة المزاجية مرتبطة فقط بالتربية ومش حالة عامة في حياة الأم..

طبعا توابع الاستهلاك ده معروفة، يا إما عنف من الأم تجله ولادها، أو انسحاب من حياتهم..

طيب الأم الغلبانة دي اللي هتخسر كل حاجة وهتخسر نفسها في الأول تعمل إيه؟

أولا: أرجوكي لما تحسي بالأعراض اللي فوق دي وانتي غالبا بتحسي بيها معظم الوقت، اطلبي المساعدة.. اطلبي حد يساعدك بدنيا ونفسيا .. بدنيا يعني حد يساعدك في البيت .. يساعدك في الحاجات اللي انتي مش قادرة تعمليها حتى لو هي بسيطة.. نفسيا، روحي ل coach  .. كلمي واحدة صاحبتك فضفضيلها شوية بس من غير نصايح الله يكرمك..

ثانيا: اسألي نفسك 3 أسئلة مهمين جدا:

  1. إيه اللي بستمتع وأنا بعمله؟ وقت لنفسك من فضلك.. على أد ما فكرة ال me time بسيطة والأمهات فاكرة إنها مش هتفيد، أحب أقولكم إن الأمهات اللي بتاخد ال me time  بتاعها بشكل منتظم، صحتها النفسية بتتحسن بشكل كبير جدا.. تعملي فيه إيه؟ اللي بيبسطك.. ومعلش حاولي متقوليش مفيش حاجة بتبسطني، ساعدي نفسك، شديها، قوميها بالعافية.. خدي ال me time  بتاعك بالإجبار، دي ضرورة مش رفاهية..
  2. إيه أكتر حاجة بتحبيها في نفسك؟ دوري على إنتي مين بره كونك مامة فلان .. انتي ليكي كيان منفصل تماما.. ليكي صفات كويسة جدا وشاطرة في حاجات معينة.. حاولي تلاقي حاجة تعمليها تحسي إنك موجودة بجد، عمل خيري، زيارة مريض متعرفيهوش، روحي مستشفى أو ملجأ تساعديهم وتشوفي إيه ممكن تكون احتياجاتهم حتى لو هتشاركي ب حاجة بسيطة ولو معنويا.. افتكري هواياتك القديمة، ارسمي، خيطي.. اقعدي مع نفسك كتير وفكري …
  3. إيه أكتر إنجاز انتي فخورة بيه؟ والإنجاز اللي اقصده هو حاجة عملتيها بمجهودك وربنا وفقك فيها.. أكيد في وقت من الأوقات أنجزتي حاجة.. إيه هي؟ في حاجات كتير بس إنتي نسيتيها أو تناسيتيها..

Share this post

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *