علاقتك ببنتك بقت وحشة؟؟
كتبت بوست امبارح، قلت فيه ان جالي سؤال من أم ان بنتها اتغيرت ومبتتقبلش النقد..
فالاجابة كانت محدش بيتقبل النقد ولا بيحبه..
التعليقات على البوست ده كانت: وازاي نصلح غلطاتهم من غير ما ننتقد؟؟.. وايه الحل بدل ما ننتقد؟؟.. وازاي يتعلموا؟،…..
واضح ان فيه لبس كبير جدا بين اني أنتقد بنتي وإني أعلمها الأخطاء اللي بتقع فيها
..خلينا الأول نعرف إيه هو تأثير الانتقاد:أولا: النقد بيهز صورة بنتك عن نفسها وبيحسسها إنها مش كويسة
..
..ثانيا: النقد بيخليها قلقانة و مش سعيدة ومحبطة
..
..ثالثا: النقد بيخلي بنتك تنتقدك انتي في كل حاجة وبتهاجمك في كل تصرفاتك
..
..رابعا: النقد مبيغيرش أي سلوك إطلاقا
..
..
الانتقاد واحد من الاربع حاجات اللي قال عليهم جوتمان إنهم كفيلين يبوظوا أي علاقة:١. النقد: انك تقولي على بنتك صفة معينة في وسط الكلام، مع أي موقف تغلط فيه..
مثلا بنتك اتأخرت بره..
* النقد: “انتي عمرك ما بتفكري في تأثير عدم التزامك بالاتفاقات على الناس التانية.. مبتفكريش غير في نفسك وبس.. انا مش قادرة أصدق أد ايه انتي أنانية”..
***العلاج للنقد: انا كنت خايفة عليكي لما اتأخرتي، واحنا اتفقنا انك ترجعي الساعة ٩، ولكنك ملتزمتيش باتفاقنا..
وعلشان كده الويك اند اللي جاي مش هتخرجي، وده حسب اتفاقنا اللي قبل كده..
****️ المطلوب: ابدئي جملتك ب “أنا”، وقولي اللي حقيقي انتي حاسة بيه، واطلبي طلب واضح بدون تهزيء..
٢. الازدراء والاحساس بالفوقية، وانك بتلمحي إنها أقل منك.. وده دايما بيتغذى بالافكار السلبية عن الطرف الآخر..
مثلا بنتك مغسلتش الاطباق..
*الازدراء: انتي نسيتي تغسلي الاطباق تاني؟.. انتي مهملة أوي.. انا لما كنت أدك، كنت بنضف البيت كله..
*** علاج الازدراء: أنا عارفة إنك انشغلتي بالموبايل ونسيتي تغسلي الأطباق.. ممكن تقومي تغسليهم دلوقتي علشان يبقوا جاهزين؟؟..
****️ المطلوب، افتكري دايما الصفات الحلوة في بنتك وقوليهالها علشان دايما تفضلي فاكراها ، والأفكار السلبية تقل تدريجيا..
٣. ال defensiveness او الوضع الدفاعي او وضع نفسنا في مود الضحية..
يعني مثلا بنتك تسألك “انتي غسلتي هدومي؟”، فانتي تردي:
*الوضع الدفاعي: أنا كنت مشغولة، مش شايفاني وأنا بنضف طول النهار؟ انتي مبتشوفيش غير نفسك انتي بس؟ ليه مغسلتيهمش انتي بدل ما انتي قاعدة طول النهار مبتعمليش حاجة؟؟..
*** العلاج: يا خبر، أنا نسيت خالص.. يا ريتني كنت قلتلك انك تغسليهم انتي علشان أنا كنت عارفة إن يومي هيبقى مشغول..
****️ فالمطلوب هو تحمل المسؤولية المشتركة وعدم القاء اللوم كليا على بنتك
٤. ال stonewalling أو عدم الرد أو البلوك: يعني لما يبقى فيه حوار بينك وبين بنتك،
* فجأة مترديش وتعملي نفسك مشغولة أو تبعدي من غير أي رد خالص..
** تعملي ايه بدل ما تعملي بلوك؟ انك تقولي انك حقيقي زعلانة أو متضايقة ومش قادرة تكملي حوار، وانك محتاحة ١٠ دقائق علشان تهدي وبعدين هترجعي تاني تتكلمي معاها..
**** المطلوب إنك تلاقي طرق تهدي بيها نفسك.. وممكن ترجعي للبوست اللي كتبته امبارح للطرق دي وهحط اللينك بتاعه في أول تعليق..
منع الانتقاد لوحده، بإذن الله هيحسن علاقتك ببنتك بدرجة مش هتتخيليه
اترك تعليقاً