بنتك بتتصرف بعصبية مبالغ فيها؟؟

بنتك بتتصرف بعصبية مبالغ فيها؟؟

بنتك دايما عصبية؟؟.. مبتعرفش تسيطر على نفسها ولا كلامها؟؟😵‍💫..
وانتي بالتالي بتتعصبي قصادها، وعايشين في دايرة من الزعيق والعقاب لا تنتهي🤨..
المشكلة مع المراهقين إنه قدرتهم على التعبير عن الغضب بتطلع في شكل مش مظبوط لو متعاملناش صح😕..
يعني الزعيق، والصوت العالي، والعنف، والسجاير، وأي سوء سلوك عبارة عن وجع وغضب من مشاعر سلبية جواهم، بس محدش ساعدهم إنهم يطلعوها بشكل سليم وصحي، فبتخرج بالشكل العنيف ده😥..
المشكلة في مرحلة المراهقة بتاعة بنتك إن أوجاعهم وغضبهم ممكن يفضل مسيطر عليهم وعلى حياتهم الشخصية أو المهنية بعد كده طول حياتهم، حتى لو هما ناجحين بشكل ظاهري😣، لكن لو ساعدناهم يخرجوا آلامهم وغضبهم بشكل صحي، هيبقوا أكثر عظمة ونجاحا من جواهم وبراهم..
📌📌 ازاي تساعدي بنتك إنها يبقى عندها الإرادة والسيطرة إنها تخرج غضبها بشكل سليم؟؟ وفي نفس الوقت تبقي انتي دايما داعمة لبنتك برغم سوء سلوكها أحيانا؟:
١. خلي بالك من العلامات اللي بتظهر قبل الغضب مباشرة.. زي مثلا لما تبتدي ترتعش، تبرق، تهاجمك أو تنتقدك، تعلي صوتها،…. انتي حافظة بنتك، أول ما تشوفي العلامات دي، تقوليلها حاجة من اتنين:
** يا تقوليلها، “انتي شكلك متضايقة دلوقتي، واحنا عايزين نتكلم بهدوء، فلو قادرة نتكلم بهدوء، تمام هنكمل”.. وفي الحالة دي انتي هتتعاطفي مع مشكلتها، مثلا قوليلها “أنا كمان هبقى متضايقة أوي لو معرفتش أخرج مع صحابي”.. “لو كنت مكانك هبقى متضايقة جدا إني مش هيبقى معايا الموبايل بقية اليوم”..
** أو تقوليلها “احنا نوقف كلام مؤقتا، ١٠ دقائق بس، ونتكلم تاني”.. بس فعلا خليهم ١٠ دقائق مش أكتر من كده.. وارجعي اتكلمي معاها بهدوء..
٢. الثبات على طريقة التربية.. يعني مثلا إنتي بتعاقبيها على حاجة معينة بإنك تسحبي منها الموبايل نص يوم.. المرة اللي بعدها لما تعمل نفس التصرف، اديها نفس العاقبة.. يعني العقاب ميبقاش خاضع للمزاج، انتي النهاردة مبسوطة، فهتلغي العقاب.. يبقى احنا كده مبنعاقبش علشان نعلّم، احنا بنعاقب علشان نفشّ غلّنا بس.. العاقبة أو العقاب محتاجين يبقوا واضحين لبنتك، هي بتتعاقب على إيه و ليه.. ويبقى معروف إنها لما تعمل التصرف ده هتتعاقب..
٣. التغافل أحيانا.. وده مش عكس الثبات على طريقة عقاب.. ولكن التغافل هنا فيما يخص أهمية المواضيع.. مش كلنا بنشوف المواضيع بنفس المنظور.. يعني ممكن تصرف معين يبقى عادي جدا بالنسبة لأم، وأم تانية تشوفه حاجة خارجة عن المألوف.. طبعا هنا أنا مبتكلمش عن الدين ولا الأخلاق.. أنا بتكلم عن تصرفات يومية عادية.. زي مثلا إن أم تشوف إن لما البنات يعملوا اكسسوارات زي حلقان وغوايش ويبيعوها، دي حاجة مش حلوة أو مش راقية، وأمهات تانيين يشوفوا إن ده عادي جدا وملهاش علاقة بحد غني أو لأ، لأن ده بيزنس، والبنات بيتعلموا نوع من أنواع الاعتماد على النفس حتى لو البنت معاها فلوس كتير..
فهنا محتاجين نفكر كتير قبل ما نخلي حياتنا سجن كبير، وفيه تعليمات وقواعد كتير زيادة عن اللزوم.. واللي يديني صفارة إنذار هنا، إن البنت تبتدي تخبي أو تكذب، أو تحس إنها مختلفة عن جيلها أو زمايلها، يبقى محتاجة أفكر في كم القواعد اللي أنا حاطاها، لأن مش شرط يكون منظوري دايما هو الصح..
٤. متتناقشيش مع بنتك في موضوع عليه مشكلة أو خلاف، ولا تقرري عقاب وانتم في عز المشكلة أو الخناقة.. مش هينتج عن ده إلا خناقة أكبر بكتير.. أجلي اللوم أو العتاب أو النقاش لوقت انتم الاتنين هاديين فيه علشان توصلوا لحل منطقي..
٥. إنتي محتاجة تعرفي طريقة مناسبة إنك تفرغي بيها غضبك وتهدي، علشان بنتك تقلدك.. شاركي بنتك الطرق المناسبة، مثلا إنك تنزلي تمشي شوية.. أو تكتبي في الجورنال بتاعك.. واسألي بنتك إيه احسن طريقة تفرغي بيها ضيقك وغضبك؟ تعالي نفكر سوا..
٦. ساعدي بنتك إنها تقلل مشاعرها السلبية عن طريق عمل تغييرات بسيطة في حياتها، زي الرياضة، والنوم الكويس، ودخول أكل صحي أكتر، وإنها تعمل هواية بتحبها بانتظام..
٧. اسمعيلها كتير ومتزهقيش.. ساعديها إنها تقول اللي جواها، ده مهم جدا علشان تفرغ مشاعرها اللي مضايقاها واللي بتضغط عليها وتخليها تبقى عصبية بشكل مبالغ فيه..

Share this post

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *