بنتك مبتتعلمش حاجة من العقاب؟؟
كان في ماتش كورة بين الأهلي وفيوتشر، فلاعب من فيوتشر خبط لاعب من الأعلي خبطة جامدة لدرجة ان الحكم طلع الكارت الأحمر 
..
..لفت نظري في الموقف ده حاجتين مهمين جدا، طبعا ملهمش أي علاقة بالكورة
..
..
بالرغم من إن لاعب فيوتشر كان غلطان جدا، إلا إن لما الحكم طرده، لاعب من الأهلي حضنه وواساه.. مواساة لاعب الأهلي للاعب الغلطان أبهرتني جدا، علشان هما المفروض انهم بيتنافسوا، وعلشان كمان، طرد لاعب ده عقاب شديد، فهو حب يخفف عنه العقوبة اللي حصلتله، وده كرم أخلاق كبير منه
.. وده المبدأ اللي أنا بتكلم عليه في البوست ده، متعاقبيش بنتك عقاب مركب.. يعني لما بنتك بتغلط، بتسحبي منها الموبايل وبتزعقيلها وتهزئيها وبتخاصميها كمان.. يعني مش كفاية إنها اتعاقبت بالحرمان من حاجة بتحبها، لأ، دي كمان بتحس إنها اتحرمت من حنانك ومن حبك، وكمان بقت في نظرك حد مش كويس، وده في حد ذاته شيء قاسي جدا بالنسبالها
.. العقاب المركب بيخلي بنتك مش قادرة تفكر في خطأها بشكل صح، وكل اللي هي بتفكر فيه هو إنها مش كويسة، والاحساس ده بيخليها تعند أكتر علشان هي مش بتتحمل الإحساس الصعب ده.. والمناطق المسؤولة عن الفهم والاستيعاب في مخها بتقفل، وبالتالي بتكرر الأخطاء مرة ورا التانية
.. أنا مش بقول إنك متعاقبيش بنتك لما تغلط، إذا كان ولا بد من العقاب.. لكن أنا بقول إن كفاية عقاب واحد بس، ويكون مناسب للخطأ، ومبيهنش كرامتها، والأهم إن العقاب يكون هيعلمها ويخليها تستوعب إن السلوك اللي عملته خاطيء.. ودايما بكرر، علشان النقطة دي مهمة جدا:العقاب بيوقف السلوك السيء، لكنه مبيعلمش سلوكيات جيدة
..
.. الحاجة التانية اللي لفتت نظري، إنه بعد المواساة، لاعب فيوتشر سجد لله وبعدين طلع من الملعب
.. بمنتهى الهدوء، هل ده طبعه، ولا التهدئة اللي عملها لاعب الأهلي خلاه يتقبل الطرد؟ مش عارفة.. أيا كان السبب، المهم إن انفعالات اللاعب العاطفية كانت هادئة في موقف صعب زي ده..وهو ده بالضبط اللي احنا محتاجين نعلمه لولادنا وبناتنا.. إنه في الأوقات اللي بتبقي متنرفزة منهم، بتقدري تتعاملي بدون خروج عن المنطق لأن بنتك بتتعلم منك.. وده بيحصل لما مبناخدش الأمور بطريقة شخصية، وبنهدى قبل ما نرد
اترك تعليقاً