انواع العلاقة بين الام وبنتها
١. أسلوب كسر الحواجز:
يعني الرؤوس متساوية، بيتعاملوا مع بعض كأنهم واحد.. هنا بتبقى العاطفة كبيرة جدا.. ولكن مفيش توجيهات لأن محدش أعلى من حد في العلاقة دي.. هنا البنت هيبقى عندها ثقة كبيرة جدا في نفسها ولكنها هتعاني جدا لما تكبر من فكرة وجود مدير أو حد ليه سلطة عليها لأنها متربتش على وجود تعليمات
..
..٢. أسلوب التعامل الرسمي:
الأسلوب ده فيه توجيهات من ناحية الأم، والأم بتطمن من بنتها على المدرسة، والواجبات والمذاكرة..
لكن مفيهوش مشاعر.. مبيتكلموش على مشاعرهم ناحية اللي بيحصل في البيت أو في المدرسة.. كلها كلام عن الأحداث اليومية اللي بتحصل.. محدش بيشارك حد قلقه ولا همه ولا هي خايفة من إيه، ولا إنها بتعاني من صحابها في المدرسة..
جفاف تام في العلاقة برغم وجود حب وحنان ولكن الام مش بتعبر عنه غير في الواجبات، والأشياء المادية
..
..٣. أسلوب الاتجاه الواحد:
الأم بتعتبر نفسها هي بس اللي عارفة مصلحة بنتها، ومبتسمحش لبنتها انها تنفذ أحلامها، لأنها بتقول ان بنتها لسه مش عارفة مصلحتها.. مبتديهاش اختيارات.. مساحة الكلام عبارة عن أوامر فقط..
البنت بيبقى عندها انتقاد كبير لذاتها، كتكملة لانتقاد مامتها ليها.. وطبعا قلة الثقة في نفسها
..
..٤. أسلوب التوازن:
الأم وبنتها بيحكوا لبعض كل حاجة.. فيه أمان كامل بينهم.. مبيخبوش عن بعض حاجة..
فيه تعليمات فيما يخص الحاجات المهمة فقط، زي الدين والصحة والأمان، وفيه وجود للسلطة authority وفي نفس الوقت فيه دعم عاطفي كبير جدا.. يعني الأم بتدي التعليمات المنطقية، وبتدعم وبتساعد بنتها إنها تنفذها مع التشجيع وعدم الانتقاد ولا تصيد الأخطاء.. ولو بنتها غلطت، بتساعدها على التعرف على فين الخطأ عن طريق المناقشة وحرص الأم إنها تعرّف بنتها إنها بتحبها حتى لو هي غلطانة.. وعند تطبيق العقاب، بيبقى بطريقة فيها شرح ليه العقاب ده هيتنفذ، وبيبقى لمدة محددة، ومفيهوش كسر، ولا إهانة للبنت..
النتيجة إن البنت بتبقى شخصية قوية وبتبقى مستقلة، وكفائتها عالية وعارفة ايه المفروض تعمله في حياتها
اترك تعليقاً