خناقاتك مع بنتك لا تنتهي؟؟
كل يوم بنتي الصغيرة اللي لسه داخلة المراهقة جديد
تلبس يونيفورم مخالف.. وكل يوم أقولها هيدوكي عقاب.. وتقولي لأ محدش بيقول حاجة.. كل يوم على هذا الحال
..
تلبس يونيفورم مخالف.. وكل يوم أقولها هيدوكي عقاب.. وتقولي لأ محدش بيقول حاجة.. كل يوم على هذا الحال..وبعد حوالي ٣ أسابيع من اللبس المخالف كلموني في المدرسة وقالولي إن بنتي لابسة مخالف وإنهم طلعوها بره الكلاس.. وقالولي انها مش هتدخل غير لما تلبس اليونيفورم الصح..
والحقيقة إنها من بعدها التزمت باليونيفورم..
ولما بشوفها مش ملتزمة في المذاكرة وبتحل أي كلام، بقولها إن طريقة المذاكرة دي مش هتجيب درجات.. ولكنها بتستمر في نفس الأسلوب لغاية ما تجيب درجة وحشة فعلا
.. ولكنها بتتعلم إن الأسلوب ده هيجيب درجات قليلة.. وعادي جدا ممكن ترجع تنسى تاني.. وأقول ملاحظات تاني..
.. ولكنها بتتعلم إن الأسلوب ده هيجيب درجات قليلة.. وعادي جدا ممكن ترجع تنسى تاني.. وأقول ملاحظات تاني..
لو اخترتي تتخانقي على كل حاجة، بنتك مخها هيقفل ومش هتستجيب.. وعلشان كده بنشوفهم مهنجين مهما زعقنا ومفيش حاجة بتتغير.. اللي انا عايزة أقوله، إن ليه أتخانق خناقة مش بتاعتي؟؟.. أنا اخترت إني مدخلش معركة مش بتاعتي.. قليل أوي إن حد بيتعلم بالتلقين وإننا نقعد نحفظه ونقوله اعمل ده ومتعملش ده.. الأسلوب ده مش أسلوب طويل المدى.. انتي دورك هنا إنك تقولي ملاحظة وتوجهيها.. وتكرري.. تكرري.. تكرري لغاية ما تستوعب.. فيه حاجة اسمها العواقب الطبيعية.. يعني بنتك هتتعاقب بشكل طبيعي نتيجة الخطأ اللي عملته بدون تدخل منك.. سيبيها تغلط علشان تتعلم.. لكن متتخانقيش معاها.. مش كل المعارك المفروض إنك تدخليها.. مش لازم تزعقي على كل حاجة.. محتاجين نركز يا جماعة
.. اللي يخصنا وحاجة تستاهل العقاب، نعاقب.. لكن جربي إنك تشوفيها بتغلط، وجّهيها ومتخافيش.. سيبيها تغلط علشان تتعلم.. بس بعد ما تاخد عقابها، متقفيش دور الشمتان أبدا وتقوليلها “شفتي.. أنا قولتلك وانتي مسمعتيش كلامي”.. انتي مامتها، يعني خففي عنها واتكلموا واتناقشوا في الخطأ وكيفية تصحيحه، لكن متشمتيش فيها أبدا
.. مش هتنسالك الشماتة
.. أكيد مش هتسيبي بنتك تسقط في دراستها أو تعمل اخطاء فادحة.. اللي بقوله إنهم محتاجين يحسوا بالأخطاء علشان لما بيتعملوا، تكرارهم لنفس الأخطاء بتقل.. وتدخّلي في الوقت اللي محتاج تدخّل فعلا.. متحليش كل مشاكلها من الأول.. عمرهم ما هيتعلموا طول ما احنا بنحل مشاكلهم اول بأول.. هتقولولي نجيب أعصاب منين.. وجربنا الهدوء مش نافع، والزعيق مش نافع.. هقولك أكيد تكرار الملاحظات شيء متعب.. ولكن نتيجته مضمونة مع الهدوء والمناقشة وإنك تفهميها وتفكريها بإذن الله.. لكن المتعب بجد، إنك تزعقي وتضيعي طاقتك وأعصابك وتلاقي مفيش فايدة بعد كل ده.. يبقى نجرب طريقة جديدة ونستمر عليها فترة علشان تلاقي نتيجة أفضل..وأهم حاجة، اختاري المعركة اللي تستاهل إنك تتخانقي علشانها
اترك تعليقاً