بنتك بترفض كلامك لما بتقوليلها غيري لبسك والبسي حاجة تليق بيكي وتخليكي أحلى وأجمل؟؟
ومش بس بترفضه، دي كمان ممكن تتريأ عليكي وتستهزأ بكلامك؟؟..
وانتي بتستغربي جدا من إنها بتحاول تكسر كلامك في كل حاجة بتوجهيها ليها علشان تبقى أفضل
..
..كلنا عارفين ان سن المراهقة فيه تحديات كتيرة.. لكن اللي بتتفاجيء بيه إن البنت اللي كانت مهذبة وكويسة، بقت شخصية مختلفة، مبقيتيش عارفاها ولا عارفة هي ازاي بقت كده..
وأكيد أكيد ان الحل الوحيد اللي قدامك هو إنك تعاقبيها على أسلوبها الوحش معاكي..
تمام، عاقبيها، مفيش أي مشكلة.. لكن قبل ما تقرري ايه هو العقاب المناسب، اقعدي فكري شوية، هي ليه بتعمل كده؟؟.. إيه اللي وصلها ل ده؟!!!..
ممكن تكون أسباب كتير.. ممكن يكون تمرد.. وممكن يكون عِند.. وممكن يكون سوء خُلُق محتاج تقويم..
من السبب بنطلع الحل
..
..من وهي صغيرة، حاجات بسيطة أوي ممكن تفرق معاها..
لما يكون شعر بنتك كيرلي، متبينيش أد ايه انتي زهقانة وانتي بتسرحيلها وانك مش عارفة تتعاملي معاه.. متقوليلهاش ده..
لما تكون أقل جمالا من اختها “من وجهة نظرك”، متقوليلهاش..
لما يكون ذكاءها أقل من اللي حواليها، متقوليلهاش..
لما بنتك تسألك أنا حلوة؟، متقوليلهاش الجمال جمال الروح، ومتقوليلهاش كل واحد حلو بطريقته، ده بيدمر صورتها عن نفسها.. قوليلها انها حلوة وجميلة وزي القمر..
قوليلها انها حلوة وجميلة وزي القمر..لأن ببساطة وجهة نظرك مش دايما بتعكس حقيقية بنتك..
لأن كل الناس جميلة وأذكياء بأشكال مختلفة.. متخليش بنتك تشوف نفسها بنضارة غلط.. متخليهاش تشوف نفسها انها أقل من اللي حواليها.. لأنها هتفضل تتصرف على الأساس ده طول عمرها، وهتفضل مشتاقة لكلمة حلوة تتقالها.. كلمة تجبر بخاطرها وتداوي كسرها..
نظرتك وكلامك ليها بيفضلوا معاها طول عمرها..
مواقف ممكن تشوفيها صغيرة لكن بتولّد عِند ورفض لكل حاجة بتقوليها..
علشان كده، ومن النهاردة متقوليلهاش كلمة هتكسرها طول عمرها.. قولي الكلام اللي عايزاه يوصلها لنفسك واختبريه، وشوفي هيوجع ولا لأ.. اذا وجعك، فهيوجع بنتك ويسيب أثر أكيد..
الكلمة ممكن تكسر وممكن تطبطب.. انتي اللي بتختاري
اترك تعليقاً