بوظتوا بنتي بالتربية الحديثة
مين اللي اخترع جملة “التربية الحديثة”؟
يعني الجملة دي حد اخترعها وملهاش أصل، والأمهات معترضين عليها كمان..
يعني أصلا مفيش حاجة اسمها تربية حديثة، ده مبدئيا..
تاني حاجة التربية لازم تكون تربية محترمة، بنحترم فيها بناتنا وولادنا حتى لو أخطأوا.. 
وحتى لما نعاقب، هنعاقب واحنا بنحترمهم، يعني من غير اهانة ولا تكسير لشخصيتهم.. تقدري تسحبي الموبايل، و تقدري تحرميها من الخروج، وتقدري تخاصميها، وتقدري تديها درس في الأخلاق من غير ما تضربي بنتك ولاتهزئيها ولا تشتميها..
الرسول صلى الله عليه وسلم مكانش بيضرب أبدا.. ومكانش عصبي.. نقدر نقول انه كان بيربي ولاده وأحفاده والصحابة تربية حديثة؟
لو ده المفهوم تمام، يبقى كلمة تربية حديثة هي التربية الراقية اللي بنتبع فيها هدي الرسول صلى الله عليه وسلم
..
..وبالنسبة للأمهات اللي بتعلق وتقول انه من يوم ما طلعت علينا التربية الحديثة وهي بوظت عيالنا، أحب أقولهم ليه بتفضلوا الضرب والزعيق على الحنية واحترام الولاد؟؟.. الاحترام عمره ما بوظ حد.. والعنف بيجيب عنف، والعصبية بتجيب عصبية، والتوبيخ والاهانات بتكسر وبتبعد بنتك عنك
..
..البنات بتتطاول على أهاليها دلوقتي كتير وده قطعا عقوق وعدم بر وملوش أي مبرر خالص
.. ولكن ايه اللي أدى ل ده؟؟ يا إما عنف شديد أو دلع زايد وسلبية أو إهمال مادي أو عاطفي.. وكل الطرق دي متنفعش في تربية بني آدم سوي..
.. ولكن ايه اللي أدى ل ده؟؟ يا إما عنف شديد أو دلع زايد وسلبية أو إهمال مادي أو عاطفي.. وكل الطرق دي متنفعش في تربية بني آدم سوي..
نخلي بالنا ان اهمالنا لمشاعر ولادنا كمان بيضغط عليهم لأن الزمن صعب وهما في أشد الاحتياج لدعمنا حتى لو أظهروا انهم بيرفضوا نصيحتنا علشان هما عاملين نفسهم شخصية وبيقهموا، بردو نديهم التوجيه والارشاد والنصيحة بلطف.. تكون نصيحة مقبولة ومنطقية علشان تدخل مخهم..أنا فعلا مشفقة على الأم اللي بتضرب وعنيفة مع بنتها، علشان ممكن تتأذي نفسيا من بنتها لما تكبر وتتجوز وتبعد عنها، وهتبقى “مضطرة” ان يبقى فيه بر، يعني البر هيبقى اضطراري، مش علشان هي عايزة تقرب من مامتها..
وبالنسبة للأمهات اللي هيقولوا انهم اتضربوا وبيحبوا أمهاتهم.. محدش بيكره مامته أبدا مهما عملت فيه.. انا مبتكلمش عن الحب والكره، أنا بتكلم عن البُعد النفسي عنها حتى لو بنتها قاعدة جنبها.. بتكلم عن الذكريات اللي بتسيبهالها.. بتكلم عن كم الناس اللي بيدعوا لأمهاتهم لما يموتوا علشان بس صعباين عليهم انهم ماتوا، مش علشان هما مفتقدينهم.. تفرق كتير أوي
..
..تعالوا نجرب.. جربي انك متضربيش.. جربي تقللي الزعيق.. جربي متهينيهاش ولا تقوليلها كلام يجرحها.. وهتشوفي الفرق.. بس استمري شوية واستعيني بالله.. واعرفي ان التربية جهاد عظيم جدا
.. وافتكري ان بنتك وابنك أمانة عندك.. فأحسنوا إليهم..
.. وافتكري ان بنتك وابنك أمانة عندك.. فأحسنوا إليهم..
اترك تعليقاً