3 خطوات علشان بنتك تحب تتكلم معاكي تاني..

By admin Uncategorized 0 Comments

بنتي لما دخلت على مرحلة المراهقة، لاحظت إني كل ما أشوفها بقولها صلّي.. ذاكري.. اهتمي ب لبسك، شوفي أي حاجة اعمليها غير الموبايل..

وعلشان طبيعة مرحلة المراهقة هي التسويف والنسيان والتطنيش، فبقيت أقول الحاجة كتيييير جدا وأقعد أكرر طول الوقت..

لغاية ما وقفت، وقلت محدش أبدا يتحمّل كم الأوامر والنواهي دي..

كلنا بنخاف على بناتنا ميصلوش، أو يطنشوا المذاكرة، أو يبتدوا يبقى كل اللي شاغلهم هو صحابهم والموبايل والأغاني والفيلم الجديد اللي نزل في السينما..

بنتك هتعمل كل ده أكيد..

لكن انتي أكيد مش عايزة علاقتك ببنتك تبقى انتي تؤمري وهي تنفذ وخلاص.. لأن الأكيد إنها هتطنش وانتي هتتنرفزي وتبقى خناقات طول الوقت..

انتي عايزة تعلمي بنتك كل حاجة في الحياة بسرعة جدا.. وخصوصا التمسك بدينها وأخلاقها وسط الفتن الكتيرة أوي دي، وعلشان كده، الأوامر لانهائية..

بس بعد كده للأسف الشديد بتتفاجئي إن بنتك مش بتسمع كلامك ومش عايزة تقعد معاكي أصلا.. وبقت بتتجنبك طول الوقت..

وانتي تسألي نفسك “أنا عملتلها إيه علشان تتعامل معايا كده؟؟ أنا عايزة مصلحتها وهي مش عارفة مصلحتها فين.. وبعدين احنا كنا ولازلنا بنتكلم مع بعض كتير وقريبين أوي من بعض.. إيه اللي قلبها فجأة كده؟..

علماء الأعصاب درسوا ازاي مخ المراهق بيتطور.. وقالوا انه من سن عشر سنوات، بيحصل خلل في الوصلات العصبية اللي بين الخلايا العصبية.. فالنشاط العصبي للمراهق بيختلف عن نشاط الشخص الكبير لأنهم بيستخدموا مناطق مختلفة من المخ علشان ينجزوا المهمات اللي هما مكلفين بيها زي الصلاة والمذاكرة عند المراهقين، والشغل والتقارير عند الكبار..

يعني ببساطة كده، في مخ المراهقين مركز المكافأة reward center بيتطور قبل مركز التحكم في المكافأة، فالمراهق بيعمل حاجات متهورة علشان يشبع مركز المكافأة ومبيبقاش قادر إنه يرفض الحاجات المتهورة المغرية زي شرب السجاير والصحوبية بين الولاد والبنات وردود الأفعال المبالغ فيها وكمان إنه ينجرف ورا تريند إلحاد أو شذوذ علشان يبقى مختلف.. وده طبعا بيؤدي لكوارث كتير..

وعايزة أقولك إنك حتى لو انتي أم ربيتي كذا بنت وولد، بس مش فاهمة طبيعة الفتن المحيطة ببنتك ومش قادرة تمشي مع التغيرات اللي بتحصل في مخ بنتك، بنتك مش هتحب تقعد معاكي ولا تسمعلك..

عايزين نفتكر حاجة مهمة هنا، إن الصلاة مثلا الرسول أمرنا إننا نعلمها لولادنا في 3 سنين وكمان مبيتحاسبوش عليها لغاية ما يبقوا مكلفين.. يعني تعليم العقيدة والدين والأخلاق وكل الأمور المهمة لازم تاخد وقتها، متستعجليش..

طيب الحل هنا إيه، بدل كل الأوامر والنواهي اللي شغالة طول النهار، واللي انتي بردو هتعمليها لأنه لازم تقولي لبنتك صلي وذاكري وخلي بالك من نظافتك وكل الحاجات المهمة دي..:

1. اسمعيها كويس جد listen وافهمي هي بتقول إيه وعايزة توصلك إيه؟؟.. حتى لو انتي مش عاجبك كلامها وبتبقي متغاظة منها و من طريقة تفكيرها، لو مسمعتيهاش كويس، مش هتبقي قادرة تعرفي إيه اللي هي بتمر بيه ولا المصايب اللي هي وصحابها بيعملوها ولا الولد اللي هي معجبة بيه..

2. شوفي الحاجات اللي بنتك بتحبها وشاركيها فيها involve، لو انتي مبشاركيهاش اللي بتحبه، مش هتقدري توصليلها، وهي مش هتسمع كلامك.. حتى لو هي بتسمع موسيقى وانتي مبتسمعيهاش، شوفي هي بتسمع إيه، انتي محتاجة تشوفي إيه الحاجات اللي بتدخل مخها علشان تعرفي تصلحيه بطريقة مش مباشرة.. ومتهاجميش اللي هي بتعمله حتى لو انتي مش موافقة عليه.. الأول، وشوفي حاجة كويسة الفريق اللي هي بتحبه بيعملها وقوليلها عليه، يعني مثلا الكلمات لطيفة، النغمة ظريفة، أي حاجة، كده هي هتبقى مستعدة تسمعلك علشان مفيش هجوم..

بعد كده ابتدي فكريها إن سماع الأغاني مش حاجة كويسة، وإنها تخلي بالها إنها متسمعش أغنية فيها كلام خارج أو مش مناسب.. وإننا هنتحاسب على كل اللي بنسمعه واللي بنعمله كله.. وخلي بالك المنع التام مش هيفيد لأنها هتلاقي مليون طريقة تسمع بيها وتشوف اللي هي عايزاه من وراكي.. أنا ياما شفت أمهات منعوا بناتهم من سماع الأغاني والفرجة على التليفزيون والنتيجة كانت إن البنات كانوا حافظين كل حاجة.. خليها قدام عينيك ومتنفريهاش علشان تسمع لنصايحك..

3. لما تصرفات المراهقة العجيبة تبتدي، خليكي داعمة ليها supportive، ومتقفيش الناحية التانية، ولو هي عندها مشكلة مع صحابها مثلا، ومش عارفة تحلها أو عايزة تخرج وعارفة إنك مش هتوافقي.. أيا كان، هي محتاجاكي في الوقت ده إنك تسمعيها وتدعميها، سواء هترفضي طلبها أو هتقبليه، سواء شايفة إنها هي اللي غلطانة أو صحابها، مش مهم بجد، مش هي دي القضية.. حتى لو انتي شايفة إنها غلطت، متحكميش عليها إنها مبتعرفش تتصرف وتبتدي تهزئيها.. قوليلها لو اتكرر الموقف هتتصرفي ازاي.. السؤال ده هيفتحلها أفكار جديدة وهتبني سلوكيات جديدة لأنها متهزئيتش وكرامتها اتبعترت.. إحساسها إنك سامعاها ومعاها في نفس صفها ومش بتحققي معاها هيفرق معاها جدا حتى لو رفضتي طلبها أو شفتي إنها غلطانة..

شاركيني هتعملي إيه مع بنتك علشان متهربش من القعاد معاكي؟؟..

و متنسيش تعملي لايك و شير للبوست

3 خطوات علشان بنتك تحب تتكلم معاكي تاني..