حاسة إنك أم فاشلة؟؟

حاسة إنك أم فاشلة؟؟

بتزعقي لبنتك كتير، أو بتضربيها؟؟.. 😔
مش مقتنعة إن فيه طريقة تانية ينفع تربي بيها بنتك، أو مقتنعة، بس مش قادرة تغيري طريقتك معاها؟؟🙄..
عارفة ليه ده بيحصل؟؟🤔..
⚡️ علشان ده الروتين بتاعك، سواء اللي شفتيه في طفولتك أو دي الطريقة اللي اتعودتي تعاملي بنتك بيه.. هو ده الروتين اللي تعرفيه✋️..
⚡️لورا شلسنجر عالمة النفس والكاتبة، قالت إن خوفنا من تغيير الروتين أكبر بكتير من إننا نستمر في ممارسة أخطاء.. احنا بنخاف من التغيير، حتى للأفضل..
📌📌 الحل علشان تقللي الزعيق وتمنعي الضرب تماما:
١. هو إن يبقى عندك الإدراك والوعي إنك تغيري طريقتك وإنك تقرري.. قرارك هو اللي هيفرق لما تشوفي تأثير الضرب والزعيق المستمر على بنتك..
أنا هنا مبتكلمش عن الزعيق أحيانا، لأن كلنا بنفقد أعصابنا ومبنقدرش نتحكم فيها ١٠٠% من الوقت. ده مبيحصلش.. ومتصنفيش نفسك أبدا على إنك أم فاشلة..
مفيش أم فاشلة أبدا.. احنا بنفشل في حاجات وبننجح في حاجات تانية.. انتي بتحاولي.. كلنا بنحاول إننا نحسن نفسنا طول الوقت..
٢. متجلديش نفسك.. اعتبري كل يوم الصبح إنك بتبدئي من الأول.. امبارح معرفتيش تمنعي نفسك من الزعيق ٥ مرات.. النهاردة خليهم ٤ بس.. ابدئي بداية جديدة كل يوم..
٣. ركزي على ايه اللي بيمنعك إنك تتغيري للأفضل.. واعملي خطوات صغيرة فيه كل يوم.. هل علشان انتي متوترة؟ شوفي مصادر توترك وخاولي تقللي منها حاجة واحدة بس.. هل شغلك موترك؟.. شوفي إيه اللي ممكن تعمليه او تمنعيه علشان بيئة العمل تبقى أفضل.. وهكذا.. خطوة واحدة صغيرة هتفرق معاكي..
٤. حددي العقاب أو العواقب المناسبة مسبقا لما تلاقي الخطأ بيتكرر، بس قرري وانتي رايقة، مدة وحجم العقاب، مش في وسط الخناقة علشان هيبقى مبالغ فيه، وهترجعي تغيريه وده بيعمل خلل في التربية..
٥. اعتذري لما تغلطي، علشان هي هتعمل نفس الحكاية معاكي..
٦. اسألي نفسك، كم مرة ضحكنا أنا وبنتي النهاردة؟؟. لو لقيتي إن الزعيق هو اللي طاغي، بكرة زودي الضحك والقعدة الرايقة والرغي اللي بترغوه سوا..
٧. انتي مش بيرفكت، ومش مطلوب منك تبقي بيرفكت.. ومتقارنيش نفسك بحد.. كل شخص فينا بيحسن من نفسه في حتة محدش تاني يعرفها..
⚡️⚡️ وافتكري إن أي غلطة بتغلطيها، أو بنتك بتغلطها، هو مجرد خطأ، لكن مبيعبرش عن إنتي مين، وجواكي إيه.. حطي الخطأ في حجمه💕💕.. إنتي أم بتعملي أقصى حاجة عندك، وده أكبر دليل إنك أم ناجحة جدا

Share this post

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *