متقارنيش بينك في الزمن ده وبين حد تاني في زمن فات
عايزنا نرجع زي زمان، قول للزمان ارجع يا زمان…
كل ما تعملي حاجة في بيتك أو لولادك، تفتكري مامتك أو حماتك كانوا بيعملوا إيه زمان، وتقارني بين قدراتهم وقدراتك؟ وبين حجم اللي كانوا بيعملوه وحجم اللي انتي بتعمليه؟ فضميرك يعذبك وتحسي بالتقصير تجاههم؟ وتحاولي ومتقدريش فتتعبي فتتعصبي على ولادك؟ فتندمي وتقارني تاني وتدخلي الدايرة اللي ملهاش نهاية؟.. ولو كمان بتشتغلي بيبقى تأنيب الضمير أضعاف مضاعفة…
أرجوكي متعمليش كده تاني، متظلميش نفسك بمقارنة متنفعش…
⭐ طيب مصرة تقارني وعايزة المقارنة تبقى صح؟ قارني بين عدد ساعات المدرسة زمان ودلوقتي… تمارين زمان (اللي مكانتش موجودة أصلا) وتمارين دلوقتي… الوقت الفاضي المتاح زمان ودلوقتي… المدة اللي كان بياخدها أي مشوار زمان ودلوقتي… إمكانية لعب العيال في الشارع والأمان اللي كان موجود … سعر الحاجات… قرب العائلات والدعم اللي كانوا بيقدموه… مساعدة الجارة لجارتها… السوشال ميديا… التكنولوجيا… السرعة الرهيبة من حوالينا…
انتي بتقارني أزمنة متباينة وأجيال مشاكلهم كانت طبيعتها مختلفة تماما عن مشاكلنا…
كفاية مقارنة، كفاية ضغط، كفاية تكسير في نفسك، كفاية تسجني نفسك جوه أفكار مش هتنفع تتنفذ، قارني نفسك بنفسك، يعني قارني انتي كنتي بتعملي ايه من كام سنة ودلوقتي بقيتي بتعرفي تعملي ايه وتديري البيت ازاي وتتعاملي مع ولادك ومع الناس اللي حواليكي ازاي، صلحتي أد إيه واتعلمتي في حياتك إيه؟.. دي المقارنة الوحيدة العادلة وهتلاقيها دايما في صالحك ❤..
ودايما فكّري نفسك إنك أم عظيمة 💪💪
اترك تعليقاً