للفضفضة أصول…

للفضفضة أصول…

أحيانا زوجة بتبقى مش سعيدة مع زوجها و في حياتها عموما و بتبقى مخنوقة طول الوقت، فالحل اللي بتحس انه ممكن يريحها انها تروح تفضفض لواحدة صاحبتها و تقعد تعدد في مساويء زوجها و أد ايه مش حاسس بيها و تقعد توصف في صفاته الوحشه…

صاحبتها بقى تقوم تعمل ايه؟؟…. لازم طبعا تدعمها معنويا و تحسيها انها مش الزوجة التعيسة الوحيدة في الدنيا، لأ ده هي كمان تعيسة زيها و تبتدي الصاحبة هي كمان تعدد في أوصاف زوجها السيئة و تحكيلها حكايات تدلل بيها على كلامها …. و بدل ما الزوجة اللي عايزة تفضفض تبقى مرتاحة بعد الجلسة الغنية بالسلبيات دي، يقوموا هما الاتنين منهكين و مش مبسوطين و يقولوا لنفسهم انا مرتحتش بعد الفضفضة !!…

أحب أقولكم دي مكانتش فضفضة، دي كانت قعدة غير إيجابية تم توليد الكثير من الطاقة السلبية المتبادلة بها و اللي ملت روحكم انتم الاتنين…
طيب ايه الحل؟

أولا لما تيجي تفضفضي لحد، لازم تركزي على مشاعرك انتي مش على أوصاف زوجك و عمايله، تركيزك على مشاعرك هيخليكي تطلعي المشاعر السلبية بشكل اسرع و أصح…

دورك كصديقة بقى لما واحدة صاحبتك تيجي تفضفضلك، لو سمحتي بلاش تحكيلها حكاياتك انتي كمان، هي مش ناقصة… التدليل ان زوجك هو كمان مش كويس لا هيفيدها ولا هيفيدك انتي كمان…

لو سمحتي اسمعيها كويس جدا و تعاطفي أوي معاها بس متعيشيش في حكايتها، لأنها بتبقى عايزة حد طاقته أقوى منها علشان يدعمها نفسيا…. لو عيّشتي نفسك في حكايتها، هتضعفي.

كمان متقوليلهاش رأيك أو تديها حلول في المرحلة دي، هي كل اللي عايزاه حد يسمعها كويس و يفهمها و تعيط على كتفه…

لما صاحبتك توصل لمرحلة العياط، متوقفيش عياطها و تقوليلها مفيش حاجة مستاهلة دموعك، سيبيها تعيط لأن البكاء شكل من أشكال ال emotional release ، و هتحس انها مرتاحة بعد ما تعيط، خليكي جنبها و اسمعيها و هي بتعيط لغاية ما تخلص…

اذا صاحبتك بدأت تبقى مرتاحة بعد الكلام و العياط و بدأت تغير الموضوع لوحدها، يبقى متحاوليش تفتحي الموضوع اللي كان مضايقها و لا تجيبي سيرة جوزها ولا جوزك طبعا، جاريها في الكلام اللي هي عايزة تقوله، ده معناه انها بقت مرتاحة و مش عايزة حاجة أكتر من كده منك، انتي كده نجحتي… أي محاولة منك للتخفيف عنها بأنك تفتحي الموضوع تاني، ده معناه انك هترجعيها تاني لمضايقتها و هتبقى محتاجة حد يسمعها من أول وجديد.

خليكي مستمعة جيدة و صديقة كويسة و اعرفي ازاي تخففي عن صحابك مش تزودي همومهم…

لما تفضفضي و تعبري عن كل مشاعرك وتعملي emotional release هيبتدي ال prefrontal cortex في المخ يشتغل كويس و ساعتها هتقدري تشوفي ولادك صح وهيبقى عندك خُلق إنك تتناقشي معاهم وتسمعيلهم وتفهميهم ….

Share this post

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *