كيف تهزمي وحش التأجيل عن طريق قاعدة ال 5 دقائق

أنا عندي مهمات كتيرة جدا في شغلي وفي بيتي وكتير كنت بأجّل حاجات كتير جدا لكن بقالي فترة بطبق قاعدة مهمة جدا اسمها قاعدة الخمس دقائق وفرقت معايا جدا في تنظيم وقتي في اللي يخص ولادي وشغلي.

ليه بنأجل؟ احنا بنأجل مهماتنا بدافع الخوف من الفشل أو النقد أو حاسين انها صعبة واننا مش هنعرف نعملها أو إنها خبرة جديدة علينا وإحساسنا إننا ممكن منعرفش نعملها.

احنا بنبقى خايفين من المهمات الكبيرة والصعبة واللي بتاخد وقت كبير مننا، علشان كده مخنا بيبدأ يدّعي اننا مش فاضيين دلوقت وبنأجل للسبب ده….

– علشان كده، قاعدة ال 5 دقائق بتقول إن المهمة اللي مش هتاخد مننا أكتر من 5 دقائق، نعملها الأول ونخلصها علشان نحس اننا خلصنا مهمة من المهمات.

– كمان مجرد ما نبتدي نعمل المهمة بتاعتنا واحنا عارفين اننا مش هنشتغل فيها أكتر من 5 دقائق، لما يعدوا فعلا ال 5 دقائق هنلاقي نفسنا بنكمل شغل فيها تلقائيا (engaged) . احنا ممكن نقسم المهمة اللي بنشتغلها لمهمات صغيرة تاخد 5 دقائق فقط، فهنحس انها مش هتاخد مننا وقت كبير، فمش هيبقى عندنا مبرر للتأجيل.

– التخطيط لليوم اللي بعده مش هياخد مننا أكتر من 5 دقائق ودي حاجة هتخليكي على الطريق (on track) دايما وعارفة بالضبط انتي عايزة تعملي إيه في وقتك ويومك.

انتي بالطريقة دي مش بس بتوفري وقتك، انتي كمان بتوفري طاقتك علشان تعملي حاجات مهمة في حياتك.