كلنا حلة ضغط ….

حلة الضغط بتسوّي الأكل أسرع بكتير من الحلل العادية عن طريق رفع درجة حرارة الغليان بإنتاج البخار وحبسه بداخلها أثناء الطبخ وبكده بيرتفع الضغط ويستوي الأكل…..

من ضمن الإرشادات إنه بيقولك سيبي الحلة ترتاح لمدة 10 إلى 20 دقيقة تقريباً قبل فتح الغطا و طبعا معروف إنه خطر جدا إنك تستعجلي و تفتحي غطا حلة الضغط من غير ما تخفي الضغط – عن طريق فتح الصفارة الأول أو إنك تسيبيها لغاية ما تبرد خالص علشان الضغط اللي جوه يقل- وإلا الغطا هيلبس في وش اللي بتطبخ والسائل اللي جوه الحلة هيندفع بقوة ويغرق الحيطان وقد يتسبب في حروق خطيرة…..

– احنا عاملين زي حلة الضغط بالضبط، علينا ضغوط من نواحي كتير زي البيت والولاد والشغل وغيرهم… فلو قعدنا نكتم مشاعرنا جوانا ومنخرجهاش خالص، الضغط بيزيد جوانا وممكن عند أي موقف ولو بسيط وتافه ننفجر في وش اللي قدامنا…..

– واحنا كمان لما بنزود الضغط على ولادنا ومنسمحلهمش بالتعبير عن مشاعرهم والتنفيس شوية هينفجروا في وشنا وساعتها بنبقى مش فاهمين هو إيه اللي حصل فجأة….

فيه فرق كبير أوي بين حكاية أحداث حياتنا والتعبير عن مشاعرنا، أي حد ممكن يحكي حاجة حصلت، لكن التعبير عن المشاعر محتاج وعي عالي مننا إننا نقدر نحط إيدينا على اللي احنا حاسين بيه ونعبر عنه وللأسف مجتمعنا مش متعود على الكلام ده بالرغم من أهميته الشديدة جدا…..

*** طيب ازاي تعبري عن مشاعرك علشان متنفجريش؟
أفضل شيء إنك تختاري أم تانية وتفضفضيلها بمشاعرك من غير نصائح ولا تعليقات منها غير انها تدعمك نفسيا فقط (مهم جدا).. إنتي لو عرفتي تعبري عن مشاعرك صح وتدخلي بعمق في مشاعرك، هتعرفي تحلي كتير من المشاكل اللي انتي بتمري بيها علشان الضبابية اللي موجودة على الجزء المسؤول عن التفكير العقلاني في المخ وقت التوتر هتروح وهتبتدي تفكري كويس وتلاقي حلول كتير، الأداة دي اسمها listening partnership وهي أداة مهمة من ادوات التربية بالتواصل (hand in hand, parenting by connection)…..

*** ازاي تخلي ولادك يعبروا عن مشاعرهم علشان مينفجروش؟
تسمعيلهم كويس من غير ما تقاطعيهم، تحاولي تفهمي الرسائل اللي بيبعتوهالك ورا كلامهم، تسمعيلهم وهما بيعيطوا ومتمنعيهمش عن العياط، تقدري مشاعرهم ومتقلليش منها (staylistening) ، تعلميهم ازاي يعبروا عن مشاعرهم وعن كل اللي جواهم، تبقي قدوة ليهم في التعبير عن مشاعرهم…

خفي الضغط عن نفسك وعن ولادك….