كايزن: خطوات صغيرة تؤدي إلى نجاحات كبيرة
دايما كنت مستعجلة و بضغط على أولادي انهم يحققوا نجاحات في كل المجالات، كنت بضغط عليهم في الرياضة علشان يبقوا أفضل رياضيين، وبدفعهم في الدراسة علشان يبقوا الأوائل. كنت بسعى للكمال في كل شيء بعمله وفوجئت أنهم مكنوش بيحققوا تقدم سريع في الرياضة. الامهات عموما والأمهات العاملات تحديدا بيبقوا عايزين ولادهم يكونوا الأفضل و الأكثر تقدما في كل شيء بيعملوه.
الأم اللي بتشتغل بتبقى طموحة وبتنجز حاجات كتير في حياتها المهنية وبتبقى عايزة تشوف أطفالها ناجحين زيها وبتبقى عايزة تشوف ولادها أفضل ناس على وجه الأرض و ده طموح كل الأمهات. الأم العاملة دايما بتتوقع دائما إنجازات كبيرة وتغيرات هائلة من أولادها. بس ده مش عدل خالص لأولادك. عمرك شفتي مزارع بيضع البذور في الأرض و بيلاقيها طلعت ثمر تاني يوم؟ كل أم في العالم ده بتخاف من أن أطفالها تفشل في المدرسة أو الرياضة أو في أي مكان. ولكن دفعهم في كل وقت انهم يعملوا انجازات كبيرة مش هيوصلك للنتيجة المرجوة. لا تتوقعي من طفلك انه هيندمج و يشارك فورا ويكون أعظم رياضي في البلد أو الأول على فصله و لكن الخطوات الصغيرة هيبقالها مفعول السحر. احنا كلنا عارفين قصة السلحفاة والأرنب حيث تغلب الأبطأ على الأسرع. صحيح السلحفاة كانت بطيئة لكنها كانت مستمرة في الذهاب نحو الهدف. و في نفس الوقت سرعة الأرنب مساعدتوش في الفوز لأنه استريح عدة مرات في السباق و تخلى عن الاستمرارية و المثابرة.
إذا بتحسي ان في صعوبة في تحقيق تغييرات حقيقية في حياتك، فمن الممكن انك تحاولي تعملي تغيرات صغيرة تقدري تنجزيها بشكل مستمر.
لما بتدفعي ولادك انهم يعملوا انجازات كبيرة، الجزء المسؤل عن المنطق في المخ بيتوقف عن التفكير و بيشعر بالرعب من المهمة اللي المفروض ينجزها، وبالتالي بيفشل. ولكن إذا تم تقسيم التغيير المطلوب إلى مهام صغيرة، طريق النجاح هيبقى مفتوح قدامه.
كتاب “خطوة صغيرة واحدة يمكن أن تغير حياتك: طريقة كايزن ” ل روبرت مورير بيتكلم عن إحداث تغيير كبير ودائم من خلال اتباع خطوات صغيرة ثابتة.
“كايزن” (كاي-زين) تتكون من كلمتين يابانيتين: “كاي” “Kai” وتعني التغيير و “زن” “zen” وتعني للأفضل. ومفهوم كايزن في الأساس يعتمد على التغيرات الصغيرة اليومية المستمرة التي تؤدي إلى التحسين المستمر و النجاح الكبير والدائم. وبدأ تطبيق مفهوم كايزن في اليابان بعد الحرب العالمية الثانية لبناء اليابان و فيه معتقد بأن المفهوم ده هو سر معجزة النهضة اليابانية السريعة بعد الحرب بالرغم من ان اللي ابتدى تطبيقها في اليابان هما الأمريكان اللي كانوا بيحاربوا اليابانيين ساعتها ولكن اليابانيين تقبلوا المفهوم ده بل و خلوها فلسفة حياتهم.
لماذا العمل بمفهوم كايزن ؟:
مورير بيقول ان مفهوم كايزن له تأثير فعال لأنه:
• بيمنع حواجز الإلهام (حواجز الإلهام هي اللي بتخلي الطفل مش قادر يوصل لمرحلة الإبداع في أي حاجة بيعملها).
• بيخلي الطفل ميتعرضش لردود الأفعال المرتبطة بنوبات الخوف اللي بتواجهه في المواقف الصعبة زي التجمد، الهروب، القتال.
• الخلايا العصبية بتعمل اتصالات جديدة بينها و بين بعض بحيث إن المخ بيبتدي عملية التغيير بحماسة.
تعملي ايه؟
نصيحتي ليكي هي:
- اتخاذ إجراءات صغيرة. لا تجبري طفلك على الاندماج في أي نشاط لفترة طويلة في البداية. على سبيل المثال لا تسمحي له بالدخول الرياضة لمدة ساعة يوميا. ابدئي معاه ب 5 دقائق و متضغطيش عليه في البداية. زودي الوقت لمدة 5 دقائق كل يوم لغاية ما يوصل طفلك إلى المشاركة الكاملة بشكل مريح بالنسبة له
- احتفلي معاه بالنجاحات الصغيرة علشان يحس بطعم النجاح في كل خطوة و يحس انه حقق انجاز و يشعر بالارتياح.
- راجعي أهدافك كل فترة.
التغييرات الصغيرة اللي ممكن تعمليها لنفسك وولادك ممكن تغير العالم اللي انتم عايشين فيه. انتي دلوقتي عايزة تغيري ايه؟ عايزة ولادك ياكلوا أكل صحي ويكونوا رياضيين؟ عايزة تبقي أقل عصبية ؟ ضعي لنفسك أهداف صغيرة و ابدئي بخطوات صغيرة هتوصلي لنجاحات كبيرة ان شاء الله. طبقي كايزن
اترك تعليقاً