علاقة التوتر بتقدير الذات
مش عارفة إيه اللي اتغير فيكي عن زمان؟؟ تعالي وأنا أقولك
لاحظت جمل معينة بتتكرر مع أمهات كتير زي مثلا “أنا زمان كنت بعرف أعمل كذا حاجة في نفس الوقت بس خلاص انشغلت بالولاد وشغلي كمان واخد وقت مني كتير وإمكانياتي قلت عن قبل كده” أو “أنا كنت برسم حلو أوي وبعمل كروشيه وكانوا صحابي بيطلبوا مني أعملهم حاجات بس دلوقتي، مع شغل البيت ومسؤولية الولاد نسيت الكلام ده بيتعمل ازاي” أو “أنا كنت بلبس حلو أوي وبهتم بمظهري بس دلوقتي …”
الجمل دي بتتكرر بشكل أو بآخر بصيغة الماضي وفيها نبرة حزن و حاجة مهمة تانية هي قلة الثقة بالنفس أو قلة تقدير للنفس إنها مش هتعرف تعمل اللي كانت بتعمله زمان مش علشان هي فقدت لياقة رياضية أو حاجة محتاجة مجهود، لكن لأنها شايفة نفسها معادتش تعرف و لم يعد عندها نفس القدرات أو الإبداع بتاع زمان…
هي هي نفس الست، نفس الشخصية، طيب إيه اللي اتغير.. معقولة الجواز ومسؤولية الولاد والبيت والشغل قللت من قدراتها؟ أكيد لأ، العكس هو الصحيح، هي بقى عندها خبرة أكتر من الأول بكتير، بقت بتشيل مسؤوليات وبتعمل واجبات كتير جدا لكن اللي زاد هو… التوتر…
التوتر ده بقى من أكبر المشاكل اللي بتواجه كل الناس عموما، والستات خصوصا..
أبحاث علمية كتير اتعملت على علاقة التوتر بتقدير الذات وأثبتوا انها تتناسب تناسب عكسي، كل ما زادت مستويات التوتر، قلة التقدير اللي احنا بنديه لنفسنا وقلت الثقة بالنفس ودي بدورها بتؤدي إلى توتر أكبر.. يعني بندخل في دايرة مدمرة اسمها destructive pattern أو النمط المدمر.. الأمهات اللي بيدخلوا في دايرة النمط ده مبيبقوش شايفين نفسهم ولا قيمتهم الحقيقية خصوصا اللي مبيتلقوش أي دعم معنوي من اللي حواليهم، وده بيؤدي لمشاكل كتير أقلها اضطراب التغذية وقلة النوم والإحساس الرهيب بالذنب..
الحل؟؟..
- إنك تعرفي ودلوقتي إن الدايرة دي هتأثر على صحتك إنك تبتدي تنقصي وتزودي.. تنقصي حاجة واحدة بس من الحاجات اللي موتراكي، يعني تقللي المهام من عليكي ولو مهمة واحدة بس..
- طيب تزودي إيه؟ تزودي حاجة واحدة بس إنتي عارفة كويس إنها هتفرق في مودك، زي مثلا إنك ترجعي تعملي الحاجات اللي كنتي بتحبيها أو تعملي me time وقته كويس علشان تفصلي.. حاجة واحدة بس هتفرق معاكي كتير
- وراكي مليون حاجة ومش عارفة تبتدي بإيه؟ ابدئي بالحاجة اللي هتاخد منك 5 دقائق بس علشان تحسي إن دماغك فضيت شوية..
- اكتبي مشاعرك تجاه كل اللي مضايقك أو اعملي listening partnership مع حد بتثقي فيه علشان تخفي من حدة الضغط اللي عليكي..
- شاركي ولادك بمشاعرك واللي انتي فيه واطلبي من كل واحد فيهم إنه يمسك مسؤولية صغيرة لمدة كام يوم بس..
- لما تعملي أي حاجة مهما كانت صغيرة، ركزي فيها أوي ومتفكريش في أي حاجة تانية، ده هيخلي مخك مرتاح لأنه مش هيبقى overloaded بمعلومات أو تفكير كتير..
اترك تعليقاً