عايزة تغيري سيناريو العصبية في ردود أفعالك؟

راجعة من شغلك متنرفزة؟ واقفة تطبخي بسرعة علشان الأكل اتأخر؟ وابنك المراهق دخل عليكي وقالك حاجة نرفزتك… أول رد فعل منك هو الزعيق مع جملة من دول:

١. امشي من قدامي دلوقتي..
٢. انت بني آدم مستفز..
٣. إيه قلة الأدب اللي انت فيها دي؟
٤. انت …….

والسيناريو المعتاد بعد ما الموقف يخلص وتخلصي اللي وراكي، هو الندم الشديد على التسرع في رد فعلك…

طبعا احنا كنا اتكلمنا عن ان وقت التوتر الجزء المسؤول عن المنطق والعقلانية في المخ بيقفل تماما و ده بيخلي ردود أفعالنا مش طبيعية…

طيب تعملي إيه علشان السيناريو ده ميتكررش كل يوم، النرفزة—>الندم—> الوعد بعدم التكرار—>النرفزة—> الندم،…… وهكذا….

أبسط حاجة تعمليها هي الصمت لمدة ٥ ثواني وتشربي بق ميه أو تاخدي نفس عميق بس، أيوة هما ٥ ثواني بس من الصمت هتديكي فرصة انك تعملي واحدة من ردود الأفعال التالية:

١. لو مستوى التوتر مش عالي أوي عندك فال ٥ ثواني دول كافيين انك تقدري تردي على ابنك رد معقول وعقلاني وتدخلي في حوار هاديء معاه…

٢. لو التوتر أعلى شوية ومش هتقدري تديله رد مناسب لكلامه فعلى الأقل فترة ال٥ ثواني هتخليكي تقوليله ان ابموضوع ده مهم وعايز روقان فخلينا نتناقش فيه بعد الغدا أو بليل بعد المذاكرة، المهم انك تديه معاه للمناقشة…

٣. لو بقى كنتي على آخرك ومش قادرة تعملي ١ ولا ٢ فهتقوليله أنا همشي دلوقتي وهرجع بعد شوية (ودي أقل حاجة بحبها وأقل حاجة تستخدم)..

وهنا لازم نقول ان فيه فرق كبير بين انك تقوليله “امشي من هنا” وبين انك تقوليله “أنا همشي وهرجع تاني”…. الجملة الأولانية بتبعديه عنك، بتقوليله انك مش عايزة تشوفيه، بتعملي انفصال بينك وبينه…. لكن الجملة التانية بتقوليله أنا اللي عندي مشكلة في التواصل دلوقتي ودي مش مشكلتك خالص، علشان كده أنا همشي علشان أهدى شوية وهرجعلك تاني علشان أنا حابة أتواصل معاك… فرق كبير جدا بين الجملتين…

رد فعلك هيغير سيناريو موقف بالكامل وهيخليكي قادرة انك تتواصلي مع ولادك أفضل…