بترجعي من شغلك وحاسة انك متوترة؟

بترجعي من شغلك وحاسة انك شايلة جبال من الهموم ومتوترة وبعدين بتقابلي ولادك وانت مش مؤهلة نفسيا انك تتعاملي معاهم بشكل متوازن؟ مش عارفة ليه وانت متوترة بتزعقيلهم مع انهم ملهمش ذنب؟ ….

التوتر والضغط: كلنا عارفين ان التوتر والضغط مش كويس وبيجيب أمراض عضوية بس مش عارفين ليه. في البوست ده أنا مش هقول كل حاجة بيسببها التوتر… أنا عايزة أتكلم عن جانب واحد بس، نتيجة واحدة من نتائج التوتر ألا وهي: إن التوتر بيسبب انخفاض السيروتونين….

عارفين ايه هو السيروتونين؟… السيروتونين هو مادة كيميائية بتفرز في الجسم مسؤلة عن حاجات كتير في الجسم من ضمنها توازن الحالة المزاجية للإنسان علشان كده بعض العلماء بيسموه “هرمون السعادة”. وعندما يصبح التوتر مزمن بينخفض انتاج السيروتونين في الجسم بشكل دائم….

العلماء ربطوا انخفاض السيروتونين بكذا مشكلة زي الاكتئاب والإدمان، والأرق، والصداع النصفي، نوبات الغضب، اضطرابات الأكل، الزهايمر الخ… وده طبعا بيؤدي إلى المزيد من المشاكل وبندخل في دوائر مفرغة.

انتي كأم بيحصلك كده وولادك كمان بيحصلهم كده لأنهم بيتنقلهم توترك وبالتالي هرمون السعادة بينخفض عندهم….

طيب ايه الحل علشان نرفع مستوى السيروتونين في الجسم؟

1- انتي وولادك لازم تاكلوا الأطعمة الصحية وخصوصا الغنية بفيتامين ب زي السبانخ والثوم والقرنبيط والأسماك…

2- اتمشي ولو نص ساعة في اليوم، المشي بيحسن المزاج وبيرفع مناعة الجسم.

3- اتعرضي لأشعة الشمس خصوصا الصبح.

4- قللي من تناول السكريات.

5- حاولي الاسترخاء واتكلمي عن مشاعرك تجاه الأحداث اللي مضايقاكي ، مش الأحداث نفسها، مهم جدا ان احنا نطلع مشاعرنا السلبية المكبوتة جوانا علشان نقلل من التوتر ونقلل من حدوث الغضب… كمان شجعي ولادك على الكلام عن مشاعرهم كتير…