بتحسي بالذنب وتأنيب الضمير علشان انتي أم بتشتغلي؟ ٧ خطوات تقللي بيهم الإحساس بالذنب…
⭐ البوست اللي فات أنا سألت الأمهات اللي بيشتغلوا، هما إيه هدفهم من الشغل ودي كانت ملخص الإجابات:
١- أمان مادي (متصدر معظم الإجابات)..
٢- يبقى عندي كيان مستقل واحساس بقيمتي وتنمية لذاتي (تاني أعلى إجابة)..
٣- توسيع الخبرات..
٤- قضاء وقت مفيد ليا ولولادي..
٥- الدماغ من غير شغل مع الزمن بتقف وبتصدي.
٦- زيادة النشاط وتجنب الكسل..
٧- علاقات اجتماعية..
٨- تربية جيل متعلم وقادر على تحديد اهدافه..
لما نبص على الإجابات كلها إجابات مهمة للحياة، طيب ليه الأم اللي بتشتغل بتحس بالذنب؟..
⭐ خلينا الأول نشوف احنا فين في هرم ماسلو للاحتياجات:
١. الاحتياجات الفسيولوجية: التنفس، والطعام، والماء، والجنس، والنوم، ….
٢. احتياجات الأمان: الأمان من العنف، الأمان في الوظيفة يعني الأمان النفسي والمعنوي..
٣. الاحتياجات الاجتماعية: العاطفية والأسرية والأصدقاء..
٤. الحاجة للتقدير: إنه يبقى عايز يشوف الناس بتقدره وتحترمه كشخص وانه يبقى عنده مكانة اجتماعية محترمة..
٥. الحاجة لتحقيق الذات: دي بتحصل لما الشخص بيحصله تطور في وعيه و يبقى عايز يبتكر حاجة ويبدع ويستخدم فيها قدراته الكامنة علشان يوصل لمراحل عليا من الغايات والأهداف..
وفيه حاجات أخرى في هرم ماسلو الجديد بس هكتفي بالقدر ده..
⭐ طيب نفهم ايه من هرم ماسلو؟ اننا بنتدرج في احتياجاتنا، لما بنحقق الاحتياجات الفسيولوجية بنبتدي ندور على احتياجات الأمان اللي لما بتتحقق بنبتدي ندور على الاحتياجات الاجتماعية ثم الحاجة للتقدير وبعدين تحقيق الذات اللي انتو سميتوه الكيان..
اذن دي احتياجات طبيعية جدا لأي إنسان سواء كان أم بتشتغل أو مبتشتغلش.. يعني بلاش نفكر هو انا من حقي ولا مش من حقي اني أحقق ذاتي وأحس بكياني.. لأن الإجابة هي ان ده احتياج إنساني طبيعي…
⭐ نرجع للسؤال الوجودي ليه عندي إحساس دائم بالذنب تجاه ولادي؟
أولا: الإحساس بالذنب مرتبط بالأمومة مش بالشغل ولما عملوا إحصائيات بين إحساس الأم اللي بتشتغل واللي مبتشتغلش بالذنب لقوا إن الفرق بسيط..
ثانيا: الإحساس بالذنب من الموروثات في كل المجتمعات، ان طالما سايبة ولادي وبشتغل حتى لو برجع في معادهم بردو هحس بالذنب والتقصير تجاههم.. وخصوصا لو حوالينا ناس بيكبرولنا الإحساس ده…
ثالثا: الإحساس بالذنب هو راجع أصلا إن الأم اللي بتشتغل بتحس انها مش لاقية وقت تقعد مع ولادها ( مع ان على فكرة، الأم اللي مبتشتغلش حاسة بنفس الإحساس نتيجة شغل البيت الكتير بردو)..
⭐⭐ نعمل ايه بقى؟..
١. كونك ام وبتشتغلي ف ده في حد ذاته بطولة.. انتي بطلة 💪.. ولازم تفكري على إنك بطلة…
٢. محدش بيعرف يفكر وهو في قلب المشكلة… حاسة انك مقصرة في حق ولادك وشايفة انه صعب توفقي بين شغلك وتربيتك لولادك ووصلتي لمرحلة صعبة جدا من الحيرة؟ خدي أجازة أسبوع أو أسبوعين تقدري تقيمي الموقف صح وتشوفيه من بعيد وعلى فكرة اللي هتقول ان صعب جدا انها تاخد أجازة من شغلها، أحب أقولها إنه لو لا قدر الله مرضت أو حصلتلها ظروف قهرية، هتاخد أجازة إجبارية وهيتصرفوا من غيرها لأن الشغل مبيقفش على حد (عن تجربة 😉) .. ف خدي أجازة مؤقتة، الدنيا مش هتتهد بس هتبقى مهمة جدا علشان:
– تقيمي علاقاتك، علاقتك بشغلك وايه هدفك منه، علاقتك بولادك و إيه اللي ناقصها ومحتاجة إيه علشان تتحسن…
– وإيه الأفضل في المرحلة دي انك تاخدي أجازة من شغلك ولا انك تكملي.. إيه المحاسن والمساويء. Pros&cons بالنسبالك ولشغلك ولولادك…
– ولو كملتي هتكملي ازاي؟ دوام كامل ولا نص دوام؟..
– الأولويات بتتغير في كل مرحلة من مراحل حياتنا، إيه أولوياتك دلوقتي؟..
بُعدك عن الشغل هيخليكي تفكري أحسن..
٣. مبدئيا كده لازم تخصصي لولادك وقت خاص ومميز ليهم حسب عمرهم، لو صغيرين لغاية ٦ سنين يبقى من ربع لتلت ساعة كل يوم.. لو من ٦ ل ١١ نفس الوقت كل يومين.. من ١٢ ل ١٨ من نص ساعة لساعتين كل أسبوع… الوقت المميز ده بتعملوا فيه مع بعض اي حاجة ولادك بيحبوها، بتبقى one to one ، كل ابن لوحده.. لو صغيرين هتلعبوا اللعبة اللي هو عايزها، لو كبار هتتكلموا في الحاجات الجذابة بالنسباله، وقت ممتع مليان ضحك خالي من أي تعليقات أو نصائح…
الوقت المميز ده زي ما هو مهم جدا لتنمية مخهم زي ما اتكلمنا قبل كده، فهو مهم جدا ليكي علشان بيخليكي تفصلي من الشغل وبتفهمي ولادك وتقربي منهم أكتر وفي نفس الوقت إحساسك بالذنب هيقل جدا لأنك فعلا بتعملي معاه تواصل مهم جدا ليه..
الوقت الخاص و المميز ده تحطيه في جدولك قبل الشغل..
٤. عارفة ايه كمان اللي يبقى في جدولك قبل أي حاجة تانية؟ وقتك الخاص (me time) اللي هيخليكي بتعرفي تفصلي وتبعدي شوية وتفكري في نفسك وتستمتعي وتستريحي كإنسان.. وهتلاقي نفسك عارفة تفكري صح، قادرة انك تاخدي قرارات مظبوطة…
٥. التخطيط.. التخطيط.. التخطيط، كل يوم بليل هتخططي إيه اللي هيتعمل تاني يوم وتكتبيه، الكتابة هتنظملك مخك جدا.. في خطتك، هتسيبي وقت لنفسك ولو ١٠ دقائق، ووقت لولادك ووقت لشغلك ووقت لأهدافك التانية..
٦. مبدأ “when I weave, I weave” وده مبدأ سيدة في سكوتلاندا وكانت أحسن وأشهر واحدة بتغزل وراح مصور ناشونال جيوجرافيك علشان يصورها ولما سألها بتفكري في ايه لما بتغزلي، قالتله بفكر هو الخيط هيخلص امتى؟ وبعدين قالتله الجملة ” لما بخيّط، بخيّط”، يعني هي بتركز في كل مهمة ومبتخليش أي حاجة تانية تشتتها.. وده مش عكس ال multi-tasking لكن مينفعش نبقى شغالين في حاجة ونبقى بنفكر في حاجة تانية، مش هنعرف ننجز صح..
المصور وهو ماشي من عندها كان بيقول:
“When I weave, I weave; when I photograph, I photograph; when I serve, I serve; when I celebrate, I celebrate…”
فبناء عليه، وقت الشغل للشغل من غير تشتيت إلا وقت الطواريء… ووقت الولاد للولاد وبردو من غير تشتيت….
٧. اطلبي من المدرسة مواعيد الحفلات ومقابلات أولياء الأمور وأي إيفنت هما ناويين يعملوه، هما بيبقوا مرتبين الكلام ده من قبل الدراسة، علشان تسجليهم عندك في ال calendar وتبقي مرتبة مواعيد شغلك على أساسهم وتطلبي أجازة في الأيام دي أو ترتبي شغلك عليهم وبكده مش هتفوتك الإيفنتات ولا هتتفاجئي وترتبكي…
طبعا الكلام كتير في الموضوع ده وأكيد مش هيخلص في بوست واحد.. وتأنيب الضمير عمره ما هينتهي بس هنستخدمه بطريقة تفيدنا…
و ال ٧ خطوات دول هما البداية لأي أم بتشتغل إنها تخفف عن نفسها عبء تأنيب الضمير الدائم المصاحب لشغلها…
اترك تعليقاً