العقبات العقلية بتخسرنا كتير

دلوقتي مصر خسرت الماتش والناس اللي تعرفني كويس، تعرف اني مليش في الكورة خالص ومش هتكلم في المدرب ولا التشكيل، لكن خليني أحلل تحليل عقلاني عاطفي مش تحليل كروي طبعا 😁….

احنا مخسرناش علشان المنتخب مبيعرفش يلعب أو امكانياته قليلة، بالعكس لما لعبوا بعد جه فينا ٣ أجوان، لعبوا كويس جدا وكانوا ضاغطين على المنتخب الروسي…

طيب احنا خسرنا ليه؟ في رأيي، احنا خسرنا علشان احنا حاطين في دماغنا اننا يا دوب كويس أوي علينا اننا وصلنا لكأس العالم، خسرنا علشان الإعلام اللي بيسمعنا طول الوقت اننا منستاهلش أكتر من كده، خسرنا بسبب ال mental block ، اللي هي بنحط غمامة على عقلنا ومبنبقاش شايفين نفسنا صح وكما تستحق، بنحط لنفسنا عقبات عقلية لنفسنا وبنصدقها ونتصرف على أساسها… والدليل الطريقة المبهرة اللي لعبنا بيها بعد ما جه فينا اجوان كتير، لو كنا لعبنا بيها من الأول كنا فزنا بسهولة…

استوديوهات التحليل والكلام الإعلامي كان بيقول كويس أوي اننا بقينا في كأس العالم من ٢٨ سنة وحلو أوي على كده، – بغض النظر طبعا إن الإعلانات طبعا بتقول حاجة تانية خالص، بتقول اننا هنكسب واننا محصلناش علشان دي طبعا فلوس كتير بتتصرف فلازم يبقى فيها تشجيع وأفورة جامدة كمان !! – … الكلام ده ميخصش المنتخب المصري بس، لكن المنتخبات العربية كلها بتتعامل بنفس العقلية، إننا يا دوب علينا كده…

العقبات العقلية دي احنا بنعملها مع ولادنا طول الوقت من غير ما نقصد، بنقولهم انهم قدراتهم محدودة وانهم ميقدروش يعملوا أحسن من كده يا إما بطريقة مباشرة بالكلام (verbally) او بطريقة غير مباشرة ودي اللي احنا بنستعملها أكتر مع ولادنا عن طريق النظرات المحبطة والصوت الغير مشجع ولغة الجسد اللي كلها بتقول لولادنا “مش هتفلحوا” ومش بنقولها مباشرة علشان نشيل من علينا الحرج اننا نقولنا بشكل مباشر ومحدش يقدر يلومنا…

اللي يعرف مهارات تواصل، عارف كويس ان لغة الجسد مؤثرة في الشخص اللي قدامك أكتر من الكلام ب ٨ أضعاف… يعني نظراتنا، صوتنا وإيماءاتنا ممكن تكسر ولادنا واحنا مش حاسين، ممكن توصلهم ألف رسالة سلبية تهدهم وتخليهم يفقدوا الثقة في نفسهم تماما وتحط في عقلهم انهم غير قادرين ومعندهمش مهارات يمكن الاعتماد عليها. (Incapable)… وبعدين نطالبهم بعد كده انهم يحققوا درجات كويسة أو نجاحات مبهرة، طب ازاي؟؟

رسائل التشجيع والإحساس بالثقة اللي لازم نوصلها لولادنا بيتحدد عليها رؤيتهم لنفسهم، ال self-image اللي بيكونوها عن نفسهم، مستقبلهم وطريقة ردود أفعالهم في حياتهم…