السر في إجهاد أقل للمخ…

كلنا بيمر علينا أوقات صعبة، بنبقى زهقانين ومش مستحملين حد ييجي جنبنا 😤..

لما بحب أفصل بجد، بحب أرسم 🖌.. طول عمري بحب الرسم بس للأسف مبعرفش أرسم.. وان شاء الله ناوية أتعلم الرسم زي ما اتعلمت السباحة كده من ٣ سنين بس…

الرسمتين اللي في الصورة دول مش رسم بالألوان، دي طريقة كنت اتعلمتها وبعدين لقيت كراسات جاهزة وبشتغل فيها مباشرة..

دي عبارة عن شمع أسود تحته ألوان.. وبمجرد ما بشتغل على الشمع الأسود بخلة الأسنان، الألوان اللي تحت بتبان وبيطلع اللي انتو شايفينه ده..

وأنا برسم، كنت مركزة بس في اللي بعمله وكنت فاصلة تماما عن معظم الأفكار اللي بتجيلي طول اليوم..

في الأوقات اللي بيبقى فيها ضغط شديد لازم نفصل شوية.. ومن أكتر الحاجات اللي بتفصل المخ، الرسم والفنون اليدوية زي ما بتساعد المخ إنه يفضل شغال ومصحصح وبيحسن الذاكرة جدا وبيزود التركيز وبيزود الإبداع، كمان بتخلينا نفصل ومنفكرش غير في اللحظة اللي احنا فيها وده بيخلي الإجهاد والتوتر يقل وبتخلينا أقدر على التعامل مع الضغوط اليومية اللي بتقابلنا…..

أنا نفسي جدا أتعلم كمان الصلصال اللي بيعملوا بيه الفخار ان شاء الله.. طول عمري بنبسط وأنا بتفرج على الناس اللي بيعملوا الفخار.. تبقي الإيدين كده كلها طين و هما عمالين يشكلوا حاجات من كورة طين لإبداع جميل وأشكال مختلفة…

إحنا لما بنختار إننا نفصل، ده مش معناه إننا فاضيين، بالعكس.. ده معناه إننا بنختار إننا نكمل صح ونتعامل مع ضغوطنا وتوترنا صح..