افهمي نفسك صح

النهاردة الصبح شنطة التمرين كانت خفيفة ومعنديش مشكلة وانا شايلاها…… بعد الشغل، شلت الشنطة لقيتها تقيلة وشيلتها بالعافية مع انها هي نفسها اللي نزلت بيها من البيت، متفتحتش ومزودتش فيها حاجة، طيب إيه الفرق؟ ليه كانت خفيفة الصبح وبقت تقيلة بعدها بكام ساعة؟؟….

الفرق مكانش في الشنطة، الشنطة زي ما هي، الفرق في قوة إحتمالي أنا….. أنا اللي كان عندي قوة وقدرة على الاحتمال إني أشيلها الصبح وأنا بردو اللي فقدت القدرة دي بعد كده…..

علاقتنا بولادنا كده بردو، أحيانا بنبقى مستحملين تصرفاتهم ومعندناش معاها مشكلة واحنا بردو اللي بنبقى مش مستحملين نفس التصرفات في أوقات تانية…… المشكلة في أوقات كتير بتبقى فينا إحنا….. هتقولولي يعني الولاد مبيغلطوش؟ …. هقولكم طبعا بيغلطوا، لكن احنا الأكبر والأنضج والأكثر خبرة واحنا اللي بنعلمهم ردود الأفعال بتبقى ازاي لما تواجههم مشكلة صعبة…. هما من حقهم يغلطوا علشان يتعلموا، أومال التعليم بيبقى ازاي؟ الإنسان بيتعلم من أخطاؤه ووقعاته أكتر ما بيتعلم والحياة ماشية من غير مشاكل……

مطلوب مني إني أفهم نفسي صح، إني أعرف إنا أنا اللي تعبانة دلوقت، علشان كده مش هتكلم في مواضيع معينة لأن حكمي عليها مش هيبقى موضوعي ولا سليم…. لما أفهم نفسي صح، هعرف أعدي تصرف من تصرفات ابني/بنتي اللي ممكن أشوفها مستفزة ومعملش أي رد فعل ممكن أندم عليه بعد كده….. ولما احس نفسي بقيت كويسة، أفتح الموضوع واتكلم مع ولادي بهدوء…..

لما أفهم نفسي صح، هعرف إني مش مؤهلة دلوقتي للحكم على الأمور فمدخلش نفسي في صراعات غالبا هطلع منها خسرانة…..

لما أفهم نفسي صح، هشوف الأمور كلها بطريقة أصح وأوضح…..

تواصلي مع نفسك واسمعيلها وافهميها…..