استراتيجيات تقللي بيها ضغوط الشغل الكتير؟
شغلي كان واخد وقت كبير من وقتي ولأني مجتهدة في شغلي وبحاول أعمل كل حاجة صح، كنت فاكرة إني لما يدوني شغل أكتر، يبقى دي حاجة كويسة.. هو ده طبعا دليل على ثقة رؤسائي في العمل فيا وأنا بصراحة كنت مبسوطة بده، فكنت كل ما يدوني مهمة أو يدوني منصب جديد، أفرح أوي وأقبل طبعا لأن ده دليل نجاح كبير ليا في نجاحي. و المهمات والمناصب اللي أخدتها كانت كتير جدا وبزيادة وطبعا لازم أعمل كل مهمة كما يجب…..
طبعا ده كان جاي على وقت ولادي وبدأ يضغط على أعصابي لأن المهمات بقت كتير أوي. ساعتها وقفت مع نفسي وقفة، هو أنا إيه بالضبط هدفي؟ تجميع مناصب وخلاص؟ طيب ده بدأ ييجي على وقت ولادي وبيتي، ده غير الضغط العصبي الرهيب اللي بقيت فيه…. فكرت إنه ده الوقت إني أختار عدد محدد من المهمات والمناصب اللي أنا عايزاها و اللي متجيش على وقت ولادي، يعني أقول “لأ” … أيوة أنا قررت أقول “لأ” وكانت واحدة من القرارات المهمة في حياتي.
اعتذرت رسميا عن مناصب وكانت حاجة مش سهلة خالص طبعا….
قلت “لأ” ازاي؟ هو ده المهم… مممن تتبعي واحدة من الاستراتيجيات الآتية:
- متقوليش “لأ” صريحة، رئيسك مش هيتقبل الكلمة دي.
- اعرضي كل المناصب والمهمات على رئيسك في العمل و قوليله انها اكتر من الوقت المتاح ليكي، وإنك ممكن لما تخلصي المهمات اللي وراكي، تاخدي مهمات جديدة بس مش دلوقت، بمعنى إنك تجدولي المهام بالطريقة اللي تناسبك.
- قوليله وبصراحة تامة انك مش هتقدري تاخدي أكتر من عدد معين.
- رشحي لرئيسك زميل/ة ليكي يقدر يقوم بالمهمة دي بدالك.
اترك تعليقاً