ازاي نص ساعة في اليوم هتفرق في حياتك كلها..

معنديش وقت.. أنا مشغولة جدا.. اليوم خلص ومعملتش كل اللي ورايا.. طول اليوم متنرفزة على ولادي وبقوا بيخافوا مني وبيبعدوا عني…

إنتي مرهقة وعصبية طول الوقت؟ ازاي نص ساعة في اليوم هتفرق في حياتك كلها..

نص ساعة ده وقت قليل جدا إن حد يعمل فيه أي مهمة.. الكلام ده أكيد نظري مينفعش يتطبق..

طيب قبل ما نتسرع، انتي عارفة إن النص ساعة دي بتعمل إيه في السنة (365 يوم):

** أكتر من 11 وركشوب كامل مدة كل واحد 4 أيام.
** أكتر من 45 كورس صغير مدة الواحد يوم.
** قراءة من 20- 26 كتاب.
** مشاهدة 180 TED Talk..
** وفوق ده كله ممكن تقعدي مع ولادك قعدات جميلة لمدة 180 ساعة.

كل يوم ممكن نعمل إيه في النص ساعة دي وهتعمل فرق في حياتنا، ورقة وقلم واكتبي معايا يا ست الكل:

أولا، الفرق على المستوى الشخصي:
1- في أول يوم ممكن نكتب أهدافنا في حياتنا، نعمل خريطة ذهنية، ونكتب فيها أهدافنا مع ولادنا، أهدافنا في الشغل، في الحياة الاجتماعية، في البيت،…

2- تاني يوم نكتب في أول هدف، إيه الأهداف الفرعية اللي احنا عايزين ننفذها.. وتالت يوم نص ساعة علشان نكتب هدف تاني وهكذا..

3- كل يوم، هنبتدي نشتغل على أهدافنا لمدة نص ساعة بس

4- قراءة كتاب أو حضور كورس أونلاين..

5- اتمشي نص ساعة ولو حوالين البيت..

6- دوري في الانترنت على أدوات مطبخ أو أجهزة أو أفكار تسهل عليكي وتوفر وقت..

7- غمضي عينيكي وركزي على نفسك، اتنفسي وحسي بالنفس اللي داخل وخارج وابعدي أي فكرة ممكن تجيلك..

ثانيا، أعمل إيه مع ولادي في النص ساعة اللي بتعمل 180 ساعة في السنة:

1- احكيلهم قصة عن نفسك وانتي صغيرة. ومتتكسفيش من أي موقف مر عليكي.. مهم جدا إن ولادك يعرفوا إن انتي كنتي بتغلطي وانتي صغيرة بردو. ولادك هيقربوا منك أكتر لأنهم بيشوفوكي على طبيعتك أكتر..

2- اكتبي love notes لولادك وجهزيها علشان تحطيها تاني يوم مع الساندويتشات بتاعتهم.

3- اقرئي كام صفحة من كتاب ولخصيها لولادك تاني يوم واتناقشوا في الرسالة اللي ورا الكلام ده.

4- العبي مع ولادك أي لعبة هما بيحبوها وانطلقي وخليكي على طبيعتك في الوقت الصغير ده.

5- اقعدوا مع بعض وخليهم يكتبوا 10 أفكار لساندوتشات حابين ياخدوها في المدرسة أو 10 وجبات غدا علشان متفكريش كل يوم هتعملي إيه..