ازاي الأم تختار كورسات صح
admin2023-10-04T22:43:59+00:00اعلانات كتير عن كورسات بترفع الثقة بالنفس أو بتخلي الطفل منطلق وأقل خجلا والأم بتبقى محتارة تعمل ايه؟ تدفع المبالغ دي كلها على أمل ان ابنها يثق في نفسه أو يبقى أفضل وترتاح في التعامل معاه وفعلا كتير بيدفع مبالغ كبيرة جدا على الأمل ده وكتير بردو مبتلاقيش النتيجة اللي كانوا متوقعينها…
والأفضل من إن الأم تدور على كورسات لولادها علشان تزود ثقتهم بنفسهم أز انها تخليهم منفتحين على الحياة، إنها تشتغل على ده بنفسها… ثقة الطفل بنفسه هتعلى لما الأم تتواصل معاه بشكل صح، لما تكون إيجابية معاهم أكتر، لما تركز على الحاجات الحلوة اللي بيعملوها أكتر من الحاجات الوحشة… ثقة الطفل هتعلى وهيبقى اكثر ذكاءً وهيبتدي ينطلق في الحياة لما الأم تقضي وقت كبير مع ولادها تسمع لهم أكتر لأنها هتفهم اللي هما حاسين بيه وهتقدر تساعدهم في مشاكلهم اللي هما بيعانوا منها فعلا مش في المشاكل اللي هي بتعاني منها اللي هي الدراسة والدرجات…. الحياة مش دراسة ودرجات وواجبات، الحياة فيها أكتر من كده بكتير….
نصيحتي للأم انها تنقي كويس وتشوف توصيف الكورس (course description) اللي ولادها هياخدوه..
أنا بشجع كل أم وأب انهم يودوا ولادهم كورسات كتير، بس في إيه؟ في المهارات اللي ناقصاهم، زي إيه على سبيل المثال وليس الحصر:
١. مهارات التواصل مثلا، ازاي يتواصلوا مع صحابهم، مدرسينهم وكل اللي حواليهم علشان ميدوش رسائل خاطئة للي قدامهم…
٢. مهارات التفاوض، علشان يطلعوا من المناقشات كسبانين واللي قدامهم كمان كسبان…
٣. مهارات إدارة الوقت علشان يقدروا ينظموا مذاكرتهم وأنشطتهم وكل حياتهم…
٤. مهارات العمل في فريق علشان يتعلموا التعاون والنظرة الإيجابية للآخر…
٥. مهارات العرض والتقديم، ازاي يتكلم عن أي حاجة بشكل جذاب يخلي اللي قدامه ينتبهله طول الوقت..
٦. ازاي يقدر يحدد ميوله ويدخل الكلية اللي بيحبها وميسيبش التنسيق هو اللي يحدد له
كل ما يحضر كورسات من دي أكتر، كل ما زادت ثقته بنفسه واتغيرت نظرته للحياة وفهم الدنيا أكتر لأنه هيتعامل مع ولاد أده ومع ناس أكبر منه وهيخلي عنده خبرات أكبر بكتير…. أثر التدريب بيستمر لفترة مع المتابعة…
ولكن…
لكن تظل دايما البداية من البيت، لو حضر كل الكورسات دي ومامته أو باباه بيحبطوه طول الوقت، أو بيدوله رسائل سلبية، أو بيقولوله إنه أقل من زمايله، أو مش عارفين يتواصلوا ولا يتعاملوا معاه بشكل صح، مش هيتحسن ولا يتقدم…
فالمطلوب مننا اننا نفهمهم أكتر، نعرف ازاي نتعامل معاهم، ازاي دايما نتواصل معاهم، ازاي نحسن العلاقة بينا وبينهم…
لو عايزة تفهمي ولادك صح وتقدري تتعاملي معاهم بشكل اسهل وتبقي مرتاحة في التعامل معاهم، احضري ورشة العمل “ماما افهميني” – “emotional decoding” علشان تقدري تفهمي ولادك أفضل و تفكي شفرة الرسائل الغامضة اللي بيبعتوهالك وبتبقي مش عارفة تتصرفي معاها ازاي…
اترك تعليقاً