إجازة الأمومة فرصة لبداية جديدة
أجازة الولادة بالنسبة للأم اللي بتشتغل ليها معاني كتير، فيه ناس بتشوفها انها هتستريح من الشغل حتى إذا كان هيقابلها مجهود كبير لرعاية بيبي صغير، لكن فيه وجهة نظر تانية بتشوف انها هتبقى زهقانة لأنها هتبعد عن الشغل و الانجازات اللي بتعملها كل يوم و انها هتفضل محبوسة مع البيبي 24/7 و هتبقى منعزلة عن العالم اللي بتحبه و بتلاقي نفسها فيه و بالتالي بتقل فرصها في انها تتقدم في شغلها أو تترقى. أيا كانت وجهة النظر للفترة دي، سواء كانت سلبية أو إيجابية، إلا إني شايفة انها فرص مهمة للتوقف و إعادة تقييم الذات و الحياة بشكل عام.
بعد ولادتي لبنتي قررت اني آخد أجازة طويلة شوية خصوصا اني كنت خلصت الدكتوراه و حسيت إني لازم أستريح شوية و أستمتع مع البيبي الجديدة علشان مكررش غلطتي مع بناتي الكبار و أستعجل و أنزل الشغل بدري لأني ساعتها لسه كنت بحضر الماجستير و الدكتوراه و ده موضوع بياخد مجهود و شغل كتير خصوصا لعضو هيئه تدريس في كلية عملية زي طب الأسنان.
و لأني حد مبيعرفش يقعد فاضي- بالرغم ان العناية بالبيبي بتاخد 24 ساعة- إلا إن لما بنتي كملت 6 شهور، جتلي فرصة إني أعمل دبلوما في التدريس و التدريب من جامعة كامبردج و بالرغم انه التدريب مش تخصصي إلا إني لقيتها فرصة إني أشتغل على تطوير مهاراتي في مجالات مختلفة و أعيد اكتشاف ذاتي وقدراتي، و لإن شروطها كانت ميسرة الحمد لله أنا قبلتها فورا… الحضور كان مرة واحدة في الأسبوع لمدة 6 ساعات و باقي الشغل بيتعمل من البيت والدبلوما كانت مدتها 6-9 شهور و مكنتش سهلة إطلاقا، كانت عايزة شغل كتير و الموضوع كله كان محتاج مهارة إدارة وقت عالية علشان مفيش حاجة تيجي على حساب حاجة تانية . البيبي كانت ابتدت تاكل فدي كانت فرصة اني أقدر اسيبها الكام ساعة دول من غير تأنيب ضمير و إحساس بالذنب.
الدبلوما كانت فرصة اني محسش بالانعزال، الإحساس اللي بييجي لكل أم بتشتغل و هي في أجازة الأمومة. و اعتبرت كمان ان الخروج للدبلوما هو ال “me time” بتاعي و فعلا ده كان المتنفس الأسبوعي بتاعي… نجحت في الدبلوما بفضل الله و بعد حوالي 15 شهر من الولادة رجعت الشغل مش بس كعضو هيئة تدريس في الكلية، كمان ك certified trainer من جامعة كامبردج و ابتديت أدرب أعضاء هيئة التدريس بالجامعة. بس حاجة مهمة كمان اني قبل ما ارجع الشغل كنت اتفقت مع رئيستي في العمل على أوقات مرنة في الشغل علشان مسيبش بنتي كتير و هي لسه مكملتش سنتين.
أجازة الولادة بالنسبة للأم اللي بتشتغل ممكن تبقى فرصة ذهبية لإيجاد فرص جديدة في شغلك و تطوير نفسك من خلال كورسات أونلاين أو قصيرة المدى أو لا تتطلب الحضور الكتير لأن دايما أولوياتك هي طفلك.
و دي الحاجات اللي ممكن تعمليها و انت بتستعدي للولادة:
- تحددي قائمة عمل ( to-do-list) لكل الحاجات اللي عايزة تنجزيها أو تحققيها سواء مع طفلك أو في تطوير مهاراتك.
- تقبلي الوضع واستمتعي بكل دقيقة مع طفلك و العبي معاه أكنك في سنه.
- اتكلمي مع جوزك بصراحة و اشرحيله أحاسيسك و احتياجاتك.
- اعملي لنفسك “me time” كل ما يكون الوقت متاح ل ده علشان تحسي انك سعيدة و قادرة تتحملي ضغط فترة ما بعد الولادة
- متشغليش نفسك باللي بيحصل في الشغل و متفتكريش ان الدنيا هتقف من غيرك
- ركزي في تطوير نفسك طول الوقت
- اطلبي المساعدة لو احتجتيها، ممكن تطلبيها كمان من مامتك، أختك، صاحبتك.
- اتقني مهارة إدارة الوقت لأنك محتاجاها ف كل حياتك مش بس في شغلك.
اترك تعليقاً