أنا مش متأكدة إني بعمل اللي عليا.. أنا مش متأكدة إني أم كويسة..

أنا مش متأكدة إذا أنا قادرة أوازن بين شغلي وبيتي.. أنا مش متأكدة إن ولادي بيحبوني وواصلهم إني بحبهم وبعمل علشانهم مجهود كبير أوي…

الشك الدائم في إني أم كويسة أو إني بعمل اللي عليا، بيوجه المخ إنه يعمل ارتباط بين الشك و الخوف..

ولما الخوف بيبدأ يدخلنا، ده معناه إن اللي سايق هو ال limbic system المسؤول عن المشاعر وده بيؤدي لنتيجة حتمية إن ال prefrontal cortex بيقفل وده الجزء المسؤول عن المنطق والتفكير العقلاني..

ولما ده بيحصل بنبتدي نتصرف بطريقة لاعقلانية وقراراتنا مبتبقاش صح… يعني مثلا كل ما بكون شاكة إني بعمل اللي عليا كأم وضميري يأنبني إني بشتغل ببتدي آخد أي تعليق من زوجي أو حماتي أو اي حد بطريقة سلبية لأن اللي بيحركني هو الخوف إن حد يلاحظ أصلا أو يتكلم في النقطة دي، وممكن يبقى تعليق عادي، لكن بيعملي تحفيز لمشاعر سلبية عندي، زي تأنيب الضمير والخوف والقلق من إني فعلا مبعملش اللي عليا.. يعني لو زوجي مثلا قالي هو انتي ليه معملتيش أكل النهاردة، فيقوم ناطط في دماغي فورا إني بشتغل وإني مقصرة وازاي هو يقول اني مقصرة (بالرغم انه مقالش ولا حتى لمّح بكده) بالرغم اني بعمل اللي عليا (defence mechanism) وأبتدي أرد على الكلام اللي في دماغي مش على اللي قاله زوجي وتبتدي خناقة كبيرة…

في حين إنه لو معنديش شك ولا خوف، ال prefrontal cortex بيبقى فاتح ف هرد على سؤاله، هو انتي ليه معملتيش أكل النهاردة؟ إني كان عندي اجتماع مهم وملقيتش وقت أطبخ فطلبت من بره.. الرد ده هيبقى ملوش خلفيات، لا شك ولا خوف وبالتالي اللي قدامي هيتقبله عادي (أيوة.. صدقيني هيتقبله عادي لأنك قلتيه عادي بردو، بس انتي اللي مجربتيش 😀).. طبعا فيه أزواج ممكن يبقوا بيتلككوا وعايزين يحسسوكي انك مقصرة بس صدقيني انتي اللي اديتيه المفتاح إنه يعمل كده لأنه غالبا مكانش في دماغه بس انتي اللي لفتي نظره من كتر ما انتي اللي حاسة بالتقصير..

It’s all in your head..

⭐ طيب ازاي بقى نبتدي نتغلب على الشك وبالتالي الخوف والقلق المصاحب ليه والنتائج السلبية اللي بتتبع كل ده؟..

١. اننا نعرف ايه اللي بيحصل في مخنا اول ما ندخل دايرة الشك في نفسنا.. المعرفة دي لوحدها هتجيب نتائج كويسة جدا ان شاء الله..

٢. أول مانحس إن ال limbic system هو اللي سايق، نبتدي نفكر في أي حاجة حلوة حصلت النهاردة حتى لو صغيرة جدا ونحمد ربنا عليها (gratitude)..

٣. افتكري ان مفيش حد مثالي أبدا و انتي you don’t have to be خالص..

٤. دوري على حد بتثقي فيه علشان يسمعلك ويسمع مشاعرك من غير احكام ولا نصايح ( listening partnership)..الاستماع لوحده هيخلي ال prefrontal cortex يفتح وهتعرفي تفكري تاني..

٥. أهم حاجة بقى، تفاءلي بالخير دائما واستغفري وادعي كتير جدا…

لما الشك والخوف بيتشالوا بتعرفي تشوفي كلام زوجك صح، بتعرفي تفهمي ولادك وتستجيبي ليهم صح من غير عصبية ولا نرفزة.. ومش أي كلمة بتستفزك ولا بتاخديها بحساسية….