أنا مبقدرش أتحكم في رد فعلي وبلاقي نفسي بزعّق لبنتي، أنا عمري ما هقدر أتغير، دي طبيعتي…. يا ترى الكلام ده صحيح؟…
admin2023-10-04T22:45:26+00:00هو احنا لما بيضربنا أو يقرصنا بيبي بنعمل إيه؟ بنبعد ايدنا بسرعة كرد فعل لا إرادي من الوجع وبنضحكله كمان كرد فعل إرادي (بمزاجنا تماما)…
طيب لما ولد عنده ١٠ سنين غصب عنه ايده تيجي في وشك، هتبعدي من الألم و هتتنرفزي عليه أو حتى هتضربيه….
ايه الفرق بين الموقفين؟
الفرق في طريقة تفكير المخ، أو بمعنى أصح الفكرة اللي احنا غذينا مخنا بيها.. اننا مع البيبي مش حاسين بأذى ولا بخطر علشان كده ادينا لنفسنا فرصة وفكرنا وقيّمنا رد فعلنا فابتسمناله، لكن الولد الكبير لما تيجي ايده في وشنا والضربة تبقى جامدة، بنحس بالأذى وممكن نحس بالإحراج وبتكون فكرتنا هي ان الولد كبير ولازم يحسب تصرفاته ولازم يتربى ،هو ده ال perception اللي في دماغنا فمش بندي نفسنا فرصة ولا بنفكر، ورد فعلنا بيبقى عنيف..
لسه عندك شك في إننا نقدر نتحكم في ردود أفعالنا تجاه ولادنا؟ علشان أأكدلك الفكرة، لما يكون الولد الكبير ده ابن صاحبتك مش ابنك، هتحسي بالإحراج والأذى بردو لكن هتسكتي أو هتقولي مكنش يقصد لأنك فكرتي واخترتي رد فعلك..
اللي عايزة اقوله إننا عندنا القدرة اننا نتحكم في ردود أفعالنا تجاه ولادنا، الأم العصبية تقدر تتحكم في نفسها لو راقبت الأفكار اللي هي بتبنيها عن ولادها وعن نفسها، لو وقفت لحظة واحدة وقيّمت رد فعلها واختارت رد الفعل المناسب…
اترك تعليقاً