3 ساعات تجددي بيهم أمومتك

بتمر علينا أيام كتير بنبقى فعلا مش قادرين.. مش قادرين نشيل.. مش قادرين نسمع زن.. مش قادرين نحل مشاكل.. مش قادرين حتى نبقى أمهات..

ولما تبقي فعلا مرهقة لدرجة إنك ممكن تكرهي كونك أم في لحظة.. يبقى لازم تقفي.. اقفي لنفسك وقفة.. اقفي علشان متبوظيش علاقتك بولادك اللي معندكيش أغلى منهم.. اقفي علشان تقدري تفتكري أد إيه جوزك سندك كتير.. اقفي علشان متنهاريش..

ولادنا لما بيبقوا صغيرين، بنبقى عاملين زي الغرقانين اللي الموجة بتحدفها يمين وشمال واحنا ولا لاحقين نتنفس ولا عارفين نخرج على الشط نستريح شوية.. وخصوصا لو مفيش حد معاكي يساعدك.. و لو بتشتغلي، الموضوع بيبقى أصعب جدا..

إحساس صعب إنك مش لاحقة تاخدي نفسك.. ومحدش حاسس بيكي ولا حد بيساعد..

وللأسف أسهل حاجة نعملها إننا نشيل كل غضبنا ونحدفه على ولادنا.. ليه؟ لمجرد إنهم أضعف حد في دايرتنا..

انتي بتبقي عايزة إيه في لحظات زي دي؟ بتبقي عايزة لحظة صمت، يسكت فيها العالم كله.. بتبقي عايزة تترمي في حضن دافي تعيطي وتخرجي كل اللي جواكي.. بتبقي عايزة تكوني لوحدك..

لما تحسي إنك فعلا مش قادرة، متقاوميش.. متقاوحيش.. ومتحاوليش تثبتي لحد إنك قوية.. إنتي إنسان بيمر عليه لحظات ضعف.. اسمحي لنفسك تضعفي، علشان تقدري تقومي قوية تاني..

متدفنيش راسك في الرمل وتقولي مش هعرف أعمل ده وتستسهلي تكوني ضحية أفكارك..

لما يمر عليكي يوم صعب زي ده، اتكلمي مع جوزك، وقوليله إنك هتاخدي أجازة لمدة 3 ساعات، أجازة من الزوجية.. أجازة من الأمومة.. وأجازة من المسئولية.. 3 ساعات بس في الأسبوع.. هتظبطيهم من أول الأسبوع، هو يشيل عنك وانتي كمان هتقوليله ياخد أجازة ويشحن.. بغض النظر بقى عن رأيك فيه إنه أصلا شايل مسئولية أو لأ.. مجرد ما تقوليله إنت كمان محتاج ترتاح، هو هيحس بيكي وباحتياجاتك.. سواء هو اللي هيشيل عنك الولاد في ال 3 ساعات دول.. أو هتلاقي حضانة، أو توديهم لواحدة صاحبتك أو قريبتك، الكام ساعة دول هيعملوا فرق رهيب في أفكارك ومشاعرك وحتى نظرتك لحياتك..

ال 3 ساعات دول هيفرقوا في طريقة تعاملك مع ولادك، لأنك هتسمحي لمخك إنه يشتغل صح من تاني، هتسمحي لل amygdala  في المخ إنها تستريح من التوتر شوية وبالتالي مراكز التعلم والتفكير هتشتغل صح من تاني.. هتقدري تحسي بأمومتك، هتقدري تفهمي ولادك وتصبري عليهم.. هتقدري تلعبي معاهم وتسعديهم.. 

من أول الأسبوع خططي لل 3 ساعات دول، هتعملي فيهم إيه؟ هتروحي فين؟ هتلبسي إيه؟ وهترجعي لبيتك بأي مود؟